Átak

Ég eins og meirihluti þjóðarinnar ákvað það um áramót að taka mig á í matarræðinu. Ég var komin með nóg af sjálfri mér.

Þegar ég og maðurinn minn byrjuðum saman voru 25 kg. á milli okkar en nú eru þau allt í einu orðin 10 og hann hefur bætt þó nokkrum á sig á síðustu árum þó ekki sé rétt að tala um að hann sé feitur mér finnst hann alveg mátulegur. Þá þ.e. fyrir 18,5 árum síðan var ekki hægt að klípa hann það var bara ekkert nema þunn húðin en núna er komið smá lag en ekkert sem hann þarf að hafa áhyggjur af 190 cm langur maðurinn hann er bara fínn.

Jæja en nóg um það ég ákvað að fara í átak og kynnti mér hinn margumtalaða "Danska kúr" sem er auðvitað ekki neinn kúr heldur svona lífstílsbreyting og markmiðið er að ná af sér svona 20 kílóum!

Mér finnst ganga ágætlega að fylgja prógramminu en mér finnst vigtin ekki falla nógu hratt. Ég svindla stundum pínu, t.d. í gær fékk ég mér bollu en það er bara ein bolla! Stundum fæ ég mér í eitt glas eða svo en það er líka bara eitt glas en vigtin er ekki að síga nógu hratt. Mér finnst ég suma daga standa í stað samt eru farin næstum 4 kíló á 1,5 mánuðum og meðaltalið er ekkert slæmt en come on. Maður er alltaf að lesa um konur sem eru að missa á annað kíló á viku!! Hjá mér eru þetta nokkur skitin grömm!!

Jæja en ég ætla nú ekki að gefast upp strax og kannski þarf maður að stofna svona átakssíðu og láta vita af henni til að þetta fari að ganga eitthvað?

jæja meira seinna

Gamlir vinir

Ég átti einu sinni vinkonu. Við vorum svona ekta vinkonur eins og þær gerast bestar, gerðum allt saman. Við gengum nú reyndar ekki svo langt að ganga í eins fötum en næstum því. Við áttum margt sameiginlegt, báðar vorum við frekar sjálfstæðar, ákveðnar ungar konur. Okkur gekk vel í skóla og vorum svona frekar vinsælar stúlkur. Ósköp eðlilegar stúlkur báðar vorum við frekar lágvaxnar í gaggó og svona í saklausari kantinum.

Við fórum nú samt í partý saman og sátum aftan á mótorhjólum vina okkar. Við drukkum nú ekki áfengi á þessum tíma né reyktum en vorum nú samt alltaf með. Við spiluðum bridds!

Hvað gerðist?

Önnur okkar eignaðist kærasta í lok 9 unda bekkjar (það var þegar grunnskólinn var upp í 9 unda bekk en ekki 10 eins og núna)og svo fórum við í sitt hvorn framhaldsskólann.

Við héldum nú áfram þó nokkru sambandi en ekkert eins og áður. Við fórum báðar út sem skiptinemar (reyndar í sitt hvort landið) og fitnuðum um 15+ kíló hvor í sínu landi. Við skrifuðumst á.

Við týndum hvor annarri!!

Meira seinna.

Gleðilegt afmælisár!

Jæja

Þá er enn eitt árið gengið í garð, svakalega líður tíminn hratt. Ég held að þetta verði árið með öllum fertugsafmælunum! Ég tók forskot á sæluna á síðasta ári en allar eða allavega allflestar vinkonur mínar ná þessum áfanga á þessu ári. Ég fékk meira að segja fyrsta boðskortið á nýjársdag!!

Heyr heyr Ragga, en afmælið verður um næstu helgi og ég hlakka sko mikið til.

Ella vinkona í Svíþjóð, bráðum Lúx, átti afmæli í gær, til hamingju Ella!, en hún náði hinum mikla áfanga á síðasta ári. Mér verður oft hugsað til þess er við héldum stóru þrítugs-afmælisveisluna í "sentrinu" á Kagså kollegiinu fyrir 11 árum síðan, þvílíkt fjör og fjöldi ég held að gestirnir hafi verið á annað hundraðið, enda ekki hægt að skilja neinn útundan í svona "Íslendinganýlendu"!!

Mér sýnist afmælið hjá Röggu ætla að vera mikið fjör ég held að þetta séu á þriðja tug kvenna á miðjum aldri sem ætla að sitja saman og njóta góðs matar og drykkjar í frábærum félagsskap.


Jæja nóg í bili

password

Þetta er nú alveg týpískt, maður þarf að muna 110 notendanöfn og lykilnúmer, er það bara ég eða eiga ekki fleiri í erfiðleikum með þetta? Kannski er þetta ellimerki eins og margt annað, það má ekki hreyfa sig þá þarf maður að hafa notendanafn og lykilnúmer. Það er auðvitað hægt að sameina þetta eitthvað, en fyrr má nú fyrrvera. Ég gat meira að segja ekki byrjað á þessu bloggi hérna nema hafa notendanafn og lykilorð sem ég var auðvitað búin að gleyma. En það var hægt að redda því eins og öllu öðru.

Jæja, þá er maður kominn í fullorðins manna tölu, komin á fimmtugsaldurinn og búin að ferma og allt. Reyndar bara fyrsta barnið, hin tvö eru eftir. Þetta gekk eins og í sögu, 70 manns allir í mat heima hjá okkur. Það er eins gott að maður er með stórt hús, en þetta gekk bara vel, fór vel um alla held ég.

Drengurinn var voða ánægður. Annars er hann að verða svolítill táningur, það koma svona góðir og slæmir dagar. Ég voða góð mamma bauðst til þess að keyra krakkana sem æfa með honum út að borða og svo í bíó, talaði við þjálfarann og fékk leyfi til að taka litlu systur með. Ég veit bara ekki hvert hann ætlaði, hann varð alveg svakalega móðgaður út í mig og fór í nokkurra daga fýlu. Svo var þetta ekkert svo hræðilegt held ég, ég skipti mér ekkert af þeim þegar þau voru með læti eða slíkt, lét þjálfarana alveg sjá um þetta og minn varð bara nokkuð kátur með þetta á endanum.

Erfiður aldur maður, ekki voru mín unglingsár neitt auðveld heldur segi kannski frá því seinna.

kv.

Fermingarpælingar

Jæja
Þar koma að því að maður færi að blogga aftur, hef ekkert gert þetta í marga mánuði. En málið er að nú er maður að fara að ferma. OK það er í góðu lagi, við ætluðum að hafa þetta voða létt og laggott, en þetta vindur alltaf upp á sig. Ég er enginn föndrari eða puntari og kann ekkert á svoleiðis, en tengdó er voða veik fyrir slíku. Nú fór hún á laugardaginn í heimsókn til vinkonu sinnar sem var að ferma í gær og það var þvílíkt punt og skraut. Hún má alveg skreyta ef hún nennir því, en henni skal ekki takast að draga mig í slíkt.
Jæja en við ætlum að hafa veisluna heima, en buðum fullt af fólki og svo verður bara að sjá til hvort þetta kemst fyrir eða ekki. En maðurinn minn þessi elska er búinn að redda kokki, frænda sínum, og tveimur konum til að aðstoða svo fær hann lánuð borð, glös, stóla og fleira í vinnunni sinni.

Fleiri pælingar seinna.

sumar og sól eða hvað?

Jæja það er að koma júlí, þessi helgi var alveg eins og helgarnar virðast oft vera á sumrin, það er þvílíkur hiti og sól núna en um helgina var bara rok og rigning og svo bara rok í gær.

Maður ætlaði að fara að viðra tjaldvagninn og koma sér í útilegustemmninguna svona úr því kallinn er loksins kominn í frí, en nei. Þetta er í fyrsta skipti í mörg ár sem við förum ekki á færeyska daga í Ólafsvík enda hvað á þetta líka að þýða að flytja færeysku dagana fram um eina viku. Ég er viss um að það verður gott veður fyrir vestan um næstu helgi eins og á að vera á færeyskum dögum.

Jæja, það fer að styttast í fríið hjá mér bara 2 vikur enn. En annars er tíminn ótrúlega fljótur að líða, er það ekki ellimerki?

sjáumst

Klemmudagar

Kannist þið við það að svona "klemmudagar" eru öðru vísi en aðrir dagar, manni líður svolítið eins og það sé mánudagur og svolítið eins og það sé föstudagur og veit ekki alveg hvernig manni á að líða!

Dagurinn í dag er svona "klemmudagur" (þ.e. hann klemmist á milli tveggja frídaga). Auðvitað á maður að taka sér frí svona daga. Það tekur því varla að byrja á neinu og samt er maður að rembast. Vinnufélagar mínir hafa líka margir tekið sér frí í dag, eða rétt kíkt fyrir hádegi af því að þeir þurftu að mæta á fund. Ekki nóg með það að það séu fáir í vinnunni og ekki mikið líf á skrifsstofunni að þá er tölvupósturinn líka niðri!

Hugsið ykkur fyrir ekki svo mörgum árum var þetta fyrirbæri ekki til en nú treysta allir á þetta og menn eru að fá verkefni og annað í gegn um tölvupóst. Mikilvæg persónuleg skilaboð og brandarar með tölvupósti eru orðnir jafnsjaálfsagðir og það að þurfa að borða og drekka!

Hérna hjá okkur fer fyrirtækið svolítið á hliðina við þetta að missa tölvupóstinn, sumir eru dauðfegnir það er að koma helgi og það koma ekki skilaboð um eitthvað svakalega mikilvægt sem þarf að klára fyrir mánudaginn þannig að menn geta verið í fríi, aðrir eru fegnir að losna við ruslpóstinn. En innst inni held ég að okkur líði öllum samt svolítið eins og kúknum í lauginni sem fær ekki póst!

Mánudagur

Það er kominn mánudagur eina ferðina enn. Mánaðarmótin með sínum gluggapóstum (þeim hefur reyndar fækkað upp á síðkastið)komin og farin. Ég komst í gegn um þau í þetta sinn svona stóráfallalaust.

Veðrið hefur auðvitað verið ótrúlegt síðustu dagana og maður trúir því varla að það geti verið svona gott veður á Íslandi í maí-júní.

Maður hefur verið að myndast við að vinna í garðinum og sinna börnum og búi.

Ég fór í fertugsafmæli um helgina, enda nálgast þessi tímamót með ógnarhraða. Okkur fannst margir þarna sem eru rétt að skríða í fertugt vera voða miklar kerlingar og kallar og við hjónin vorum sammála um það að við og okkar vinir værum miklu unglegri en fólkið þarna (dream on).

Hafiði tekið eftir því að tíminn er fljótur að líða, þetta eru ellimerki heyrir maður þegar það er mánudagur og áður en maður veit af er komin helgi aftur og maður komst ekki yfir helminginn af því sem maður ætlaði að gera í vikunni.

Svo er þetta með að fara að byrja í átakinu, þori ekki að byrja held að það gangi ekkert vel, ég er svo mikill sykurgrís.

kv.

Hvítasunnuhelgi

Jæja, nú er komin hin margumtalaða Hvítasunnuhelgi. Frábært að fá svona langa helgi. Nú þegar maður er orðinn fullorðinn er þetta ekkert sérstök helgi en þegar ég var yngri og á kafi í skátunum var alltaf skátamót hjá Hraunbúum (skátafélaginu í Hafnarfirði) á Hvítasunnunni nema hún væri mjög snemma þá var mótið flutt aftur um eina helgi eða tvær. Þetta voru góð skátamót og alltaf gaman en nær undantekningalítið rigndi viðstöðulaust á þessum skátamótum. Ég man að fyrsta mótið sem ég fór á þá var ég sennilega 9 fór ég ásamt vinkonu minni og pabbi hennar kom og tjaldaði fyrir okkur, við vorum langfyrstar af Víflurunum (Vífill skátafélagið í Garðabæ) og svo byrjaði að rigna og loksins komu hinir, en þá var vinkonan orðin svo leið að hún lét pabba sinn sækja sig strax um kvöldið og hún átti tjaldið!! En stóru strákarnir leyfðu mér að vera með sér í tjaldi því ég vildi ekkert fara heim. Þetta var fyrsta skátamótið mitt og ég var nú ekkert á því að gefast upp!

Mín auðvitað þrjóskust! Seinna fór ég svo oft sem stór foringi með fullt af krökkum á Hraunbúamótin og einu sinni man ég að mótinu var frestað vegna rigningar!! Þá mundi ég eftir mínu fyrsta móti og við fórum öll saman í skála Vífils eina nótt svona til að allir fengju nú að klára mótið.

Hugsið ykkur þarna var ég 9 ára og með prímus og nesti, fiskbúðing til að steikja og pulsur til að sjóða! Ég leyfi ekki einu sinni krökkunum mínum í dag 10 og 13 ára að kveikja á gaseldavélinni í eldhúsinu heima! Er maður ekki alveg í lagi?

Ég held að krakkar í dag geti gert mikið meira en þau eru látin gera eða þeim hreinlega leyft. Er maður ekki að hefta þessa krakka?

Hafið það nú gott um helgina.

kv.

Vinna og börn

Jæja, ég þarf að fara snemma heim í dag, þarf að ná í yngsta barnið til dagmömmu, pappinn upptekinn, annars er þetta í hans verkahring. Sumarið sem ég hélt að væri að koma í gær er farið aftur. Rigningin hangir í loftinu og mér finnst ég geta hreinlega komið við hana. Vonandi verður sæmilegt veður um helgina, annars ætla ég bara að vera heima. Kannski maður fari að grynnka eitthvað á þessum kössum í bílskúrnum. (Flutti sko í janúar og bílskúrinn enn hálffullur af kössum). Hver veit nema bróðir minn bjóði í kaffi um helgina, en hann á afmæli í dag. Til hamingju Brósi!

Annars eru að koma mánaðarmót, ég kvíði orðið fyrir þeim. Hvað varð um tilhlökkunina að fá útborgað? Nú er maður á nálum hvort maður eigi fyrir visanu, öllum afborgunum, dagmömmunni, tannréttingunum, símunum (sko ég held þeir séu 5 á þessu heimili)og öllum gluggaumslögunum. Svona geta tímarnir breyst, ætli það sé svona að vera fullorðinn??

kv.

Sól og blíða

Jæja, skyldi sumarið vera komið. Var að fá email frá einni af bestu vinkonum mínum (svona til að móðga engann), en hún býr í AMERÍKU. Hún segist gera hlaupið 5 km, og ætlar að hlaupa 10 km í haust. Ég horfi á mín 20-25 kg sem ég er með svona extra og hugsa að ég gæti ekki einu sinni hlaupið út götuna heima hjá mér:(. Þarf að fara að gera eitthvað í þessu! Jæja þýðir ekki að sökkva sér niður í þunglyndi yfir þessu. En svona er þetta bara. Tek á þessu seinna.

Ekki standa ef þú getur setið, ekki sitja ef þú getur legið og ekki gera neitt í dag sem má bíða til morguns. (kínverskur málsháttur, hann er örugglega eitthvað lagaður til þessi)

bæ bæ dagbók

fyrsta bloggið mitt

Það koma að því að maður fengi sér bloggsíðu, krakkarnir eru komnir með þetta, maður verður að tolla í tískunni.

Sumir dagar eru verri en aðrir
heyrumst