7 tindar!

Helgin var nokkuð merkt af 7 tinda göngu skátanna alls 37 km. Gelgjan fór af stað kl. 10:00 á laugardagsmorguninn og gekk fram á kvöld þ.e. til kl. 22:00 er þau tóku næturpásu og svo voru síðustu tveir tindarnir kláraðir á sunnudagsmorgun og komið aftur að skátaheimilinu kl. 10:00. Þ.e. 7 tindar á 24 tímum. Þetta er í þriðja sinn sem skátarnir fara þessa leið og hafa krakkarnir safnað áheitum til að fjármagna skátamót og ferðir sumarsins.
Þessi ganga tókst bara mjög vel og komu allir nokkurn vegin heilir heim ef frá eru talin nokkur hælsæri. Tinna mín þ.e. tíkin fór með alla 7 tindana og er hún enn alveg lurkum lamin en náði að vinna hug og hjörtu krakkana eins og henni er lagið og þau tóku ekki annað í mál en að hún færi alla leið með þeim.
Ég hefði svo gjarnan viljað ganga með þeim og ætla að stefna að því að gera það næst, en vegna hnémeiðsla sem hafa verið að hrjá mig í vor treysti ég mér ekki með í þetta sinn.
Um leið og þessi ganga fór fram fór fram svokallað 7 tinda hlaup sem skátarnir skipulögðu í samráði við björgunarsveitina. Minn laugardagur fór að mestu í að vinna við þetta hlaup, vera við vatnspóst og stjórna umferð bæði manna og bíla.
En krakkarnir voru samt langflottust!

Hinar fjórar fræknu!

Var í yndislegu húsmæðraorlofi um helgina. Fórum 3 vinkonurnar að heimsækja þá fjórðu í hinni frægu grúbbu "Fjórar fræknu". Flugum til Dusseldorf aðfaranótt fimmtudags og lentum kl. 6:00 um morguninn, þetta var jómfrúarferð áætlanaflugs Icelandair svo við fengum kampavín í flugvélinni. Aðeins voru 35 manns í vélinni, næstum því aðeins við og golfhópur, þannig að hver og einn fékk bekk fyrir sig. Við tókum bílaleigubíl þaðan til Lúxemborgar, vorum hálfósofnar komnar til Lúx um hálfellefuleytið þar sem beið okkar glæsilegur "brunch" að hætti Ellu minnar. Ég ætla nú ekki að rekja hér ferðasöguna frá A-Ö, en segja má að nóg var drukkið af hvítvíni og freyðivíni, skemmtanalífið skannað og strákarnir mældir út hehehe...

Soffía frænka leiddi okkur á réttar brautir með sinni hljómfögru röddu (svona garmin). "Make an U-turn as soon as possible!" Svo koma svona gullkorn ferðarinnar.

"Glosstime...."
"Vá stelpur sko, nú er ég hætt að trúa henni Soffíu"
"Hin rosalega Patricia"
"Við erum retired og erum svona soldið í Charity..."
"Halla "secretaðu" þennan uppá flugvöll"
"Sko það er búið að breyta þessu síðan Soffía frænka var hér síðast..."
"Stelpur sjáiði þennan á vinstir hönd"
"I'm the wingman"
"Hvert erum við komnar eiginlega... (þá vorum við komnar á sveitaflugvöll í Mönstengladbach, því Soffía fann ekki alþjóðaflugvöllinn í Drusluþorpi)!"
"Við "krössuðum" parýið og nú ætlum við að "krassa" tertuna!"
"Vá ef ég væri svona 20 árum yngri"
"Halla secretaðu stæði"
"Ég versla ekki í svona konubúðum"
"Við erum orðnar þyrstar"
"Hvernig geta þessar konur gegnið um á þessum líka háu hælum á þessum ójöfnu strætum hér?"
"You lost your chance I'm a lovely guy!!!"
"Nú erum við komnar á veg sem heitir K-176.... við erum aðallega búnar að vera á A og B vegum... hvað þýðir það eiginlega?? (var svona einbreiður stígur sem þræddi okkur smá "detour" um sveitir, þorp og skóga Þýskalands)"
"Hvort eigum við að fara í tangó eða techno?"
"Vá þau eru yndisleg (amma og afi voru mætt á technostaðinn til að fá sér snúning)"
"Erum við svangar?"
"Við þurfum að fá okkur svona einkennisbúning!"
"Tröppur, tröppur og meiri tröppur"

Margt fleira var svo sem sagt og gert eins og þið getið rétt ímyndað ykkur, kannski bæti ég einhverju við hér þegar mér dettur það í hug og þegar víman rennur af mér og hugurinn fer að hugsa rökrétt á ný!!

Hundaþvottavél

Rakst á frábæra frétt á Vísir. Reyndar er höfundurinn með þágufallssýki en við reynum að láta það ekki trufla okkur.

"Fann upp hundaþvottavél
Frakkinn Romain Jarry er búinn að finna upp hundaþvottavél sem hefur slegið í gegn í heimabæ hans, St. Max. Jarry, sem er rúmlega þrítugt athafnaskáld, er að reyna að kynna nýjungina fyrir Bretum.
Ekki eru allir jafn sannfærðir en Jarry sver að vélin geri dýrunum ekkert nema gott og þau þjáist ekkert á meðan þvottinu stendur.
Nú þegar er hægt að fara á nokkurskonar dýraþvottahús þar sem dýraeigendur borga klink fyrir að þrífa dýrin.
Jarry segir að hundarnir sitji pollrólegir á meðan vélin baðar þá. Aftur á móti tekur talsverðan tíma að þurrka dýrunum.
Í viðtali við The Daily Mail segist Jarry vonast til þess að Bretar taki vel í þessa nýjung.
Þess má geta að það er einnig hægt að þvo köttum í sömu vél."

Ef fréttin er lesin kemur í ljós að höfundur vélarinnar fullyrðir að hundarnir sitji rólega á meðan vélin þvær. Ehemm.. ef myndin er skoðuð kemur í ljós skelfingu lostinn hundur sem gerir allt til að reyna að brjótast út.....

Ég sem hundaunnandi er nú ekkert sérstaklega hrifin af svona þvottavél, þar sem hundum finnst nú ekkert sérstaklega gaman að láta baða sig, allt í lagi að sulla í vatni og jafnvel synda en hún Tinna mín ljómar sko ekkert þegar baða á hana í bala útá palli hehehe.... Og síðast þegar ég vissi voru kettir ekkert hrifnir af vatni heldur...

Ég er orðin umhverfissinni....!! og mig langar til Róm.

Notaði blíðuna um helgina m.a. til að klára að lesa "Draumalandið". Og vitiði ég er bara nokkuð sammála honum Andra. Hvað höfum við að gera með öll þessi álver, er ekki nóg komið í bili. Ekki það að ég vilji hætta að virkja, en er álið málið? Hvet fólk til að lesa þessa bók, hún vekur allavega til umhugsunar og er mikið betri en myndin.

Ég hef tvisvar á ævinni komið til Rómar og nú langar mig afskaplega mikið þangað. Það er eitthvað við Róm. Ástæðan er tvennskonar, í fyrsta lagi er ég byrjuð á næstu bók sem heitir "borða, biðja, elska" og er komin langt inn í fyrsta hlutann og þar er söguhetjan stödd í Róm að njóta unaðsemda tungumálsins og matarins. Ég fór líka í bíó í gær með Skvísunni minni og sáum við myndina "Englar og Djöflar" sem gerist að mestu leyti í Róm og í Páfagarðinum. Góð mynd ja.. allavega skemmtileg, soldið ljót og ekki fyrir viðkvæma.

Mig langar....

Eurovision, stjórnin og svona almennt röfl.

Já nú er komið að hinni frægu Eurovision viku. Jú við komumst áfram í gærkveldi, og var nú farið að fara um marga þegar eitt umslag var eftir og Ísland ekki komið á listann. Skottan mín sagði reyndar stundarhátt, "mér er alveg sama hvort Ísland kemst áfram, ég held nefnilega með Noregi", Unglingurinn ja eða sá fullorðni sagði líka að sér þætti Jóhanna svo leiðinleg og hrokafull að hún hefði nú bara ekki gott af því að komast áfram á meðan Gelgjan sat með tárin í augunum og krosslagði fingur. Sá fullorðni fullyrti reyndar að hann þyldi ekki þessa keppni og ætlaði sko ekki að horfa á hana, til að sanna mál sitt var hann í tölvunni og á msn og "refreshaði" reglulega til að vinirnir föttuðu það ekki að hann væri að horfa á sjónvarpið hehehe.... Yndislegt lið.

En að öðru, já nú setti ríkisstjórnin sér það markmið að enginn forstjóri í ríkisfyrirtæki mætti vera með hærri laun en forsætisráðherra. Hljómar voða vel á pappír, spurning hvað er tekið inní, nefndarstörf, stjórnarsetustörf, bílahlunnindi osfrv. eða hvort aðeins er miðað við slétt grunnlaunin hmmm... svo kemur reyndar í ljós að þetta er nú kannski ekki svona einfalt, stjórnir viðkomandi fyrirtækja þurfa að samþykkja þetta og jafnvel þarf að breyta lögum í einhverjum tilfellum. Ég veit alveg hvaða leið þau fara til að bjarga þessu, og það er nú bara að hækka laun forsætirsráðherrans hehehe....

Bjarni minn Ben þarf nú líka aðeins að passa sig, ég ætla rétt að vona að Sjálfstæðisflokkurinn setji ekki hömlur á sína þingmenn þegar ESB málið verður tekið fyrir, það er fullt af sjálfstæðismönnum bæði á þingi og útí samfélaginu sem vill fara í aðildaviðræður og sjá svo til. Afhverju má það ekki bara? Ekki falla í sama gamla flokksræðisfarið í guðanna bænum....

Rokið er svo mikið úti þessa dagana og það fýkur allt sem fokið getur... líka aumingja hjólreiðamennirnir sem eru að rembast við að hjóla í vinnuna og taka þátt í þeirri keppni.... gangi þeim vel.

jæja nóg röfl í bili

Að umbreyta lánum í vafninga og selja - snilldar samlíking

Ester er bareigandi í Berlín. Til þess að auka veltuna þá ákveður hún að leyfa dyggum viðskiptavinum — sem flestir eru atvinnulausir alkar —að drekka út á krít.

Hún skráir allt sem drukkið er í þykkan kladda. Þegar þetta þægilega fyrirkomulag spyrst út þá flykkjast nýir viðskiptavinir á barinn. Frelsi fólks til þess að njóta augnabliksins og borga seinna gefur Ester valið tækifæri til þess að hækka verðið á vinsælustu veigunum, bjór og víni

Salan eykst gífurlega. Ungur og efnilegur lánafulltrúi í hverfisbankanum gerir sér grein fyrir að þessar skuldir viðskiptavinanna eru framtíðarverðmæti. Hann hækkar því yfirdráttarheimild Esterar í bankanum. Lánafulltrúinn telur þetta vandræðalaust vegna þess að skuldir alkanna eru haldgóð veð.

Í höfuðstöðvum bankans breyta sérfræðingar í æðri peningalist þessum viðskiptaskuldum í Drykkjuskuldabréf, Alkabréfavafninga og Gubbuafleiður. Þessi verðbréf — sem virt áhættumatsfyrirtæki hafa (gegn þóknun) stimplað AAA gæðastimpli — ganga síðan kaupum og sölum út um allan heim. Raunverulega skilur enginn hvað nöfn bréfanna þýða eða hvernig þau eru tryggð. Samt sem áður halda þau áfram að hækka. Þau eru metsöluvara.

Einn góðan veðurdag, þrátt fyrir að bréfin séu enn á uppleið, þá ákveður áhættusérfræðingur bankans að nú sé tímabært að drykkjuhrútarnir á bar Esterar borgi eitthvað upp í skuldirnar. Þeir geta það hins vegar ekki. Ester getur því ekki staðið í skilum við sína skuldunauta og lýsir yfir gjaldþroti. Drykkju- og Alkabréf falla um 95%. Gubbubréfin gera betur og ná stöðugkeika eftir 80% fall. Nýr veruleiki blasir við hjá fyrirtækjum sem seldu barnum á lánakjörum og hafa jafnvel líka fjárfest í fyrrnefndum bréfum. Heildsalan sem seldi Ester vín er gjaldþrota og fyrirtækið sem seldi bjórinn er yfirtekið af keppinauti.

Eftir dramatísk fundahöld og andvökustundir sem standa samfleytt í marga sólarhringa þá ákveða stjórnvöld að bjarga bankanum.

Nýr skattur er lagður á. Bindindismenn eru látnir borga brúsann.

Sporin í sandinum. - smá hugvekja

Nótt eina dreymdi mann draum. Honum fannst sem hann væri á gangi eftir ströndu með Drottni. Í skýjum himins flöktu myndir úr lífi mannsins. Við hverja mynd greindi hann tvenns konar fótspor í sandinum, önnur hans eigin, og hin Drottins. Þegar síðasta myndin birtist fyrir augum hans,leit hann um öxl á sporin í sandinum. Hann
tók eftir því að víða á leiðinni voru aðeins ein spor. Hann sá einnig að það var á þeim augnablikum Lífsins, sem hvað erfiðust höfðu reynst.

Þetta olli honum miklu hugarangri og hann tók það ráð að spyrja Drottinn hverju þetta sætti.

“ Drottinn, þú sagðir að þegar ég hefði ákveðið að fylgja þér, myndir þú ganga alla leiðina í fylgd með mér. En ég hef tekið eftir að meðan á erfiðustu stundum lífs míns hefur staðið, eru bara ein fótspor í sandinum. Ég get ekki skilið hvernig þú gast fengið af þér að skilja mig eftir einan þegar ég þarfnaðist þín mest ”.

Drottinn svaraði: “Þú dýrmæta barn mitt.Ég elska þig og myndi aldrei skilja þig eftir eitt. Á meðan þessir erfiðu tímar lífs þíns liðu – þar sem þú sérð aðeins ein fótspor – Var það ég sem bar þig “.

Mary Stevenson (f. 1922 d. 1999)

Draumalandið og fleira

Já, hef ekki sett mikið af póstum hér inn síðustu daga, er búin að vera pínu upptekin, var ekki í bænum alla helgina og naut sveitasælunnar í faðmi stórfjölskyldunnar. Ég er með tvær bækur á náttborðinu mínu og eru það Draumalandið sem ég er svona hálfnuð með og svo bók sem vinkona mín lánaði mér sem heitir "borða, biðja, elska..." bíð spennt eftir að byrja á henni. En ég er svo mikill "kassahaus" að ég þarf að klára eina bók áður en ég byrja á næstu.

Reyndar finnst mér bókin Draumalandið eiginlega mikið betri en myndin, þar sem ég er að lesa núna þá er hann að fjalla um uppbyggingu herstöðva hérlendis. Vissuð þið það að Bandaríkjamenn vildu byggja a.m.k. 4 herstöðvar hér og umsvifin áttu að vera miklu meiri en þau voru. En stjórnmálamenn þess tíma höfðu vit á að setja mörk á það sem leyft yrði. Í rauninn ætlar svo Andri Snær sennilega að líkja uppbyggingu hersins hérlendis við uppbyggingu álvera, það verður gaman að sjá hvað kemur útúr því. Þessi bók er reyndar ekkert svo slæm og greinilegt að Andri Snær er með heilmikið á milli eyrnanna og hefur pælt og hugsað mikið. Mér fannst reyndar bókin hans um Bláa hnöttinn þvílík gersemi að hann er alveg á mínum höfundalista.
Allavega góð pæling hjá Andra og ég mæli með bókinni frekar en myndinni.

Kosningaúrslit og fleira

Jæja, þá liggja nú kosningaúrslitin fyrir, gekk ekkert sérstaklega vel hjá mínum mönnum og vona ég svo innilega að þeir fari ekki í stjórn og taki aðeins til hjá sér. Það eru menn og málefni þarna sem þarf að hreinsa út.

Greinilegt er að þjóðin vill skoða aðildaviðræður við ESB, það voru þeir flokkar sem vildu það sem unnu þessar kosningar. Ég skil þess vegna ekki afhverju menn eru að tala um að kjósa um það hvort, já athugið hvort, það eigi að fara í aðildaviðræður. Eins og ég hef margoft sagt hér og annars staðar þá verðum við að hefja viðræður og svo kjósum við um hvað það er sem kemur útúr þeim viðræðum. Auðvitað verða skiptar skoðanir og misvísandi upplýsingar en er það ekki alltaf þannig þegar umdeild málefni ber á góma. Ég treysti algjörlega íslenskum almenningi til að velja það sem er best fyrir okkur þegar samningurinn er í höfn.

Allir bíða spenntir eftir því að sjá hvort Samfó og VG nái að mynda stjórn því þeir eru ósammála um stóra ESB málið. Ég hef reyndar áhyggjur af því að Samfó líti á ESB sem alsherjar bjargvætt, sem það er auðvitað alls ekki, og miði allar sínar efnahagsaðgerðir að því að við séum að fara í ESB. Það gengur ekki, það er ekkert búið að ákveða í þessu máli og óháð ESB þarf virkilega að taka til hér í skápum og skúffum og fara í aðgerðir.

Jæja, við bíðum enn spennt og sjáum hvað gerist.

Kosningar - kosningar

Já, vitiði það eru kosningar á laugardag. Hvað á að kjósa? Þar sem ég hef oft haft mjög ákveðnar skoðanir á mörgum hlutum hef ég ekki verið í vandræðum með að blogga hér heilan helling um allt í sambandi við stjórnmál, en núna ég veit það eiginlega ekki. Ég veit eiginlega bara ekkert hvað ég á að kjósa á laugardag, auðvitað ætti ég bara að hlusta á minn landsfund og formann og hlýða, kjósa X-D eins og venjulega, en vitiði, ég er bara ekkert sammála þeim þessa dagana. Burtséð frá öllu ruglinu og vitleysuni, þá myndi ég fyrirgefa þeim það ef ég hefði trú á því sem þeir eru að segja. En jú sumt meikar alveg sens en annað er bara afturhaldssemi og roluháttur.

En þá kemur milljón dala spurningin. Hvað á ég að kjósa í staðin??
Tók einhvern svona kosningakompás á mbl.is og fékk Framsóknarflokkinn 77% sammála, tók hann aftur svona með aðeins breyttum áherslum og fékk aftur Framsóknarflokkinn efstan með 75% en hina flokkana í báðum tilfellum þ.e. Sjálfstæðis, Samfylking og Borgarahreyfingu með alla 75% í fyrri könnuninni en ca 72-73 % í þeirri seinni, þannig að þið sjáið að það er mjótt á mununum. Kannski er ég bara svona óákveðin sem ég held reyndar að sé málið og þá er Framsókn voða seif kostur svona opinn í báða enda og allt það hmmm....

En þá komum við aftur að rót vandans, ég veit ekki hvað er best fyrir þjóðina núna, er það ESB, er það að taka upp dollara einhliða, er það að fella niður skuldir, er það að fella niður verðtryggingu...

Það sem er kannski mergurinn málsins er að klára þetta ESB mál, fara í viðræður og fá samning og bera hann undir þjóðina, sjá hvað við fáum, við getum þá bara hafnað samningnum ef okkur líst ekki á eða ef okkur finnst hann of dýr... Ég er ekkert viss um að ESB sé svarið við bænum okkar, og er eiginlega viss um að það er það ekki, en það verður að skoða þann kost til hlítar, ekki ýta honum útaf borðinu strax.

Svo er það myntmálið, er kannski best að halda bara í lasna krónu og reyna að lífga hana við, er best að taka nýja mynt strax, eða er best að miða að því að taka upp evru í framhaldi af samningaviðræðunum, sem svo kannski verða felldar og þá sitjum við uppi með enn lasnari krónu hmmm....

Jú ég vil nýta auðlindirnar og já ég er alveg til í smá meiri stóriðju, ef hún sýnir sig að skila aðri, ég vil ekki fara í framkvæmdir bara til að fara í framkvæmdir, við eigum alveg að kunna að finna útúr því hvaða arð við viljum fá útúr þeim.

Svo ef við lítum á þessa blessuðu skjaldborg sem slá átti um heimilin, hmmm... mér finnst bara vera sett fata undir lekann en það er enginn sem nennir uppá þak til að gera við... Einu úrræðin sem bjóðast eru fyrir fólk sem er komið með allt í klessu. Er ekki betra að hjálpa fólki áður en allt fer í klessu, það er svo erfitt fyrir sálartetrið að vera með allt í klessu og við gætum örugglega sparað soldið í heilbrigðiskerfinu ef við björguðum fólkinu fyrr....

Já spara í opinbera kerfinu, það ætti nú ekki að vera svo hrikalega erfitt, auðvitað eru margar stofnanir vel reknar, en margar síður. Mér finnst t.d. aðþað ætti alvega að vera hægt að loka eitthvað af þessum sendiráðum sem Halldór Ásgrímsson opnaði hér hvert á fætur öðru með pompi og prakt. Til hvers að vera með sendiráð alls staðar, afhverju ekki reka samnorræn sendiráð sem myndu sinna öllum Norðurlöndunum á einum stað, er það ekki bara nokkuð góð hugmynd.

Annað svona í bríaríi væri ekki hægt að selja eitthvað af þessu dópi, sem fannst þarna á skútunni, í útlöndum... við erum hvort eð er búin að segja okkur úr lögum við þessi ríki, það væri örugglega hægt að stoppa eitthvað uppí þetta blessaða fjárlagagat sem allir eru að tala um hehehehe.....

Draumalandið

Fór í bíó í síðustu viku og sá Draumalandið.

Æji ég veit það ekki, mér leið ekkert vel á þessari mynd, leið pínulítið eins og glæpamanni. Jú, jú ég hef unnið við að skoða stóriðju og ýmsar framkvæmdir tengdar henni síðasta áratuginn eða svo, en í myndinni er mjög svo drungalegur boðskapur. Ég er reyndar ekki búin að lesa bókina, hún er á náttborðinu mínu, en hef einhvern vegin ekkert komist áfram með hana, sé til hvernig það þróast.

Mér finnst vera gert lítið úr landsbyggðafólki í þessari mynd og gerir grín að því þegar Húsvíkingar og Reyðfirðingar fagna samningum um komu álvers, eitthvað svona æji greyin þau vita bara ekki betur....

En boðskapur myndarinnar er sá að erlend stórfyrirtæki séu með áætlanir um yfirtöku auðlinda þeirra vesalings þjóða sem þeir setja verksmiðjur sínar í. Já, einn punktur var soldið fyndinn en það var þegar fyrrverandi bæjarstjóri þeirra Reyðfirðinga var tekinn tali og hann sagðist vinna nú sem verkefnastjóri hjá ALCOA. En stuttu áður var búið að ræða þá samsæriskenningu að þessi fyrirtæki borguðu stjórnmalamönnum og þeim sem einhverju réðu undir borðið og jafnvel setti þá á launaskrá. Fyrrverandi bæjarstjórinn átti semsagt að sanna þessa kenningu hehehe...

Þeirri skoðun öfgafullra náttúrverndarsinna hefur verið haldið mjög á lofti, að ekki megi reisa verksmiðjur heldur eigum við að gera "eitthvað annað". Jú en hvað? Þá er fátt um svör... jú ferðamennska... en hún mengar líka, þessir ferðamenn þurfa að komast á milli staða og nota til þess koltvísýringspúandi farartæki sem fara illa með andrúmsloftið.

Margt landsbyggðafólkið vill hafa meiri fjölbreytileika í sínum atvinnumöguleikum og vill eitthvað annað en sjávarútveg og búskap. Fólkið t.d. á Reyðarfirði gat ekki ákveðið að vinna bara við eitthvað annað, það verður einhver að vilja borga brúsann, auðvitað leysir álver ekki allt en störf og atvinnustarfsemi sprettur ekki bara af sjálfu sér, óháð markaðslögmálum.

Jæja, en ég allavega sá þessa mynd og jú hún vekur mann soldið til umhugsunar en er kannski einum of öfgafull og fullyrðingar í henni, margar hverjar, standast engan veginn.

Menn sem hata konur

Já þetta voru góðir Páskar. Hefði viljað fara eitthvað á skíði, en er með bilað hné í augnablikinu og sleppti því í þetta sinn, borgar sig ekki að ögra sér um of sko...
En í staðin náði ég að slappa ótrúlega vel af og hreinlega datt í eina bók, sem heitir "Menn sem hata konur", keypti hana fyrir 2ur árum á Kastrup flugvelli á dönsku, vissi ekki að ég væri að kaupa eina mest umtöluðu sakamálasögu á Norðurlöndum síðustu árin.
Höfundurinn var Stieg Larsson og var sænskur, fæddur árið 1954 og lést árið 2004 úr hjartaáfalli. Kaldhæðni örlaganna olli því að fyrsta bókin í seríunni kom ekki út fyrr en árið 2005 svo hann náði aldrei að upplifa gríðarlegar vinsældir bókanna, sem urðu alls 3.
Allavega er þó nokkuð síðan ég byrjaði á bókinni, og gekk þetta nú frekar hægt svona framan af, en svo bara kom það, ég gat ekki lagt hana frá mér, stóð yfir pottunum á Páskadag að hræra í sósunni með pískinn í annarri hendinni og bókina í hinni. Þetta er ein besta sakamálasaga sem ég hef lesið og ótrúleg persónusköpun sem á sér stað í bókinni og flækjurnar mjög snilldarlega útfærðar. Ég gat ekki hætt fyrr en ég kláraði bókina en um leið og hún kláraðist var ég líka soldið svekkt yfir því að henni væri lokið hehehe... ætla sem allra fyrst að útvega mér bók númer 2 og 3.
Ég semsagt mæli með þessari bók við hvern sem er og bið ykkur um að láta ekki hugfallast þó bókin sé hátt í 600 blaðsíður.

Konur og menntunarsaga þeirra.

Komst yfir mjög skemmtilega bók í gær... hún fjallar um menntamál kvenna og þróun þeirra á fyrri hluta síðustu aldar.

Hún heitir Íslenska menntakonan verður til og er eftir Valborgu Sigurðardóttur.

Þegar maður spáir í þetta þá var ekki sett í lög að konur "mættu" taka stúdentspróf fyrr en 1897.

Konur máttu kjósa til bæjar og sveitarstjórnar ef þær voru ekkjur eða einar frá árinu 1888.

Það var ekki fyrr en árið 1911 sem konur máttu gegna embættum öðrum en kennarastöðum eins og prestsembættum, eða læknisembættum.

Fyrsta konan sem útskrifast frá Háskóla Íslands gerði það árið 1917 úr læknisfræði.

Ef maður kafar svo ofan í bókin betur má sjá mjög svo skemmtilegar umræður og ýmis rök fyrir því að konur ættu ekki að gegna embættum.

T.d. orðrétt þegar fjallað var um að aðalhlutverk kvenna að ala og ala upp börn:

"Þetta stórvirki hefur á konum hvílt alt til þessa og þetta afrek hafa þær af hendi leyst. Ef konan færi nú að vasast í mörgu öðru, er hætt við, að barnauppeldi sæti á hakanum hjá henni. Og óhollar afleiðingar af því eru hverjum manni auðsæjar.

spurning hvort hægt sé að rekja bankahrunið til þessa ehemm...

Ég velti því bara fyrir mér, hvað óskaplega er stutt síðan, ekki 100 ár, og hvað rosalega mikið hefur breyst á þessari síðustu öld, sérstaklega í kvennréttindamálum.

Einnig held ég að allar ungar konur hafi gott af því að kíkja í þessa bók, því mér finnst eins og þær átti sig ekki á því hvað mikið hefur áunnist og hve mikilvægt það er að halda baráttunni á lofti.

Fréttamennska og ræða Davíðs!

Ég tók mig til og hlustaði á skemmtiræðu Davíðs Oddssonar frá Landsfundi sjálfstæðismanna. Hún er ekkert svo löng og er tiltæk á netinu. (Reyndar má finna allar þær ræður sem fluttar voru á þessu þingi á slóðinni xd.is). Ástæða þess er að ég hef heyrt brot og brot úr þessari ræðu í fjölmiðlum og fékk alveg grænar bólur. Jú þetta var svona ræða sem frekar hefði átt heima sem skemmtiræða eða sem ræða á þorrablóti, en þegar maður hlustar á hana í heild sinni kemur hún alls ekki jafnilla út og það sem sýnt hefur verið úr henni í fjölmiðlum. Þau brot sem hafa verið sýnd eða spiluð, eru öll tekin í samhengi og þess vegna lítur þetta mun verr út þannig en í heild sinni.

Þið skuluð alls ekki misskilja mig, ég hef haft þá skoðun að Davið hefði nú bara átt að setjast í helgan stein og skrifa æviminnigar sínar þegar hann lét af störfum sem forsætisráðherra og hann hefði aldrei átt að fara í Seðlabankann, ekki endilega af því að hann hafi eitthvað staðið sig svo rosalega illa, ég ætla ekki að dæma um það, en þetta var mjög svo pólitísk ráðning og ég er svona bara yfirhöfuð soldið á móti slíkum. Ég er líka á því að hann hefði ekkert átt að vera að halda þessa ræðu þarna á landsþinginu og dissa allt og alla eins og krakki í fýlu. En það má samt með sanni segja að það hefur verið mun meira gert úr þessu sem hann sagði þarna en tilefni voru til, og það sem mér þótti reyndar merkilegast í þessu öllu var að eftir þennan fræga landsfund að þá var það ræða Davíðs sem var aðalumræðuefnið, sem er nú bara brandari útaf fyrir sig sko... Ég held að fjölmiðlamenn mættu nú aðeins fara að líta í eigin barm og hætta þessum poppúlisma í fréttamennsku og snúa sér að því að skilja hismið frá kjarnanum.

Tala um að berja hausnum við steininn hehehe...

"Worrying is the same thing as banging your head
against the wall. It only feels good when you stop."

— John Powers: Author and motivational speaker -

Að berja hausnum við steininn, berja járnið á meðan það er heitt eða eitthvað þannig...

Fór á mjög góðan fyrirlestur um daginn. Hún hélt fyrirlesturinn hún Kolbrún B. Ragnarsdóttir, fjölskylduráðgjafi og hét hann "Það býr sigurvegari í þér". Ég ákvað bara að taka hana bókstaflega og skrá mig bara á næsu ólympíuleika... veit ekki aaalveg í hvaða grein... æji, það eru alveg 3 ár þangað til, hlýt að finna eitthvað....

Nei grínlaust, en svo eins og alltaf í svona fyrirlestrum kemur hjá manni, já en þetta er bara svona almennt "common sense". Auðvitað, þetta er allt svoleiðis, en maður virðist samt þurfa að heyra það 100 sinnum til að fatta það sko....


Ég er reyndar ekki að segja að ég hafi eitthvað fengið uppljómun þarna en...

Spurningarnar voru:

Hvað viltu? Draumar þínir, settu þér markmið
Hvað geturðu? Trúðu á sjálfa þig
Hvað þorirðu? Dansaður við óttann
Hvaða ábyrgð ertu tilbúin að taka? Taktu fulla ábyrgð
Hvaða úthald hefurðu? Það sem þarf
Hvers virði er það sem þú ætlar að gera? Lífsnauðsyn - Ástríða

Svo talaði hún um að jákvætt fólk lifði uþb. 7-12 árum lengur en neikvætt.

Niðurstaðan er, þú getur allt sem þú vilt og aðeins meira ef það er það sem þarf.

Brostu.

Landsþing sjálfstæðismanna

Æji, nú ætla sjálfstæðismenn enn og aftur að klúðra þessu öllu... þeir verða að átta sig á því að þeir komast ekkert áfram á gamalli frægð.

Jú, ESB er umdeilanlegt, það er alveg rétt, en þeir eru bara búnir að afskrifa það... það er ekki í lagi með þá... auðvitað þurfum við að fara í aðildaviðræður og sjá hvað kemur útúr því....

Ég er reyndar að vona að Bjarni vinni formannsslaginn, held að hann sé meiri diplómat og geti frekar náð til þjóðarinnar en hann Kristján....

Púff... ég gæti alveg trúað mér til að kjósa eitthvað annað en minn gamla flokk í vor... þeir eru bara ekki að ná þessu sko.

Stjórnmálin þessa dagana

Það er nú soldið svoleiðis í dag að margir eru með hugmyndir um lausnir, en einhvern veginn er ekki búið að sannfæra mig enn um það hvað er réttast að gera.


1. Skuldir heimilanna

Á að fella niður 20% skulda allra heimila, eða bara hluta þeirra og hvaða skuldir á þá að taka inn, bara íbúðaskuldir eða eiga bíllán, yfirdráttarlán og önnur neyslulán að koma inn í reikninginn hmmm.... Á að fella niður skuldir á öll heimili, sumum þykir það réttast, en þá kemur á móti að við værum að eyða peningum ríkissjóðs ja eða peningum sem ríkissjóður á ekki einu sinni, í fullt af fjölskyldum sem þurfa ekkert á þessu að halda, en á móti kemur að ef við gerum þetta bara fyrir suma, þá hverja? Svo koma þau rök, að ef þetta er gert jafnt á alla, þá hafa þau heimili sem þó standa ágætlega meira á milli handanna og geta veitt þeim peningum aftur útí þjóðfélagið í formi neyslu eða sparnaðar.

Svo ræða sumir um að færa bara vísitöluna aftur um einhver stig, miða jafnvel við einhverja dagssetningu hmmm... já kannski, en hvað þá með lífeyrisþegana sem þegar hafa mátt blæða um þau 25% sem lífeyrissjóðirnir hafa rýrnað um, eiga þeir svo líka að tapa þessum 20% í viðbót sem vísitalan hefur hækkað um, ég veit það ekki.


2. ESB

Já ég er reyndar komin með sterka skoðun í því máli, ég vil að fari verði í viðræður og svo verði niðurstaðan lögð fyrir þjóðina. Við vitum ekkert hvað við fáum fyrr en við byrjum að semja. Það þýðir hvorki að ákveða það að fara í ESB "no matter what" eða hitt að slá það bara strax útaf borðinu og gefa sér að við fengjum ekki þetta og ekki hitt.

Ég veit ekki hvort það er farsælast fyrir mína þjóð að standa utan ESB eða ekki, fyrr en ég sé samninginn.


3. Gjaldmiðillinn

Hmm... er krónan ónýt? Ég veit það ekki, það hefur sína kosti að vera með eigin mynt og geta þá soldið sveiflað hlutunum eftir því sem hentar hverju sinni, á móti kemur að það er dýrt og svo er það óstöðugleikinn sem fylgir, þessar stöðugu sveiflur.

Þá kemur hitt, ef krónan er ónýt, eigum við þá að taka upp dollar? Já eða ganga í ESB og taka upp evruna?


Svo eru að koma kosningar og ég hef ekki hugmnynd hvað ég á að kjósa eða hvort einhver listi er með hugmyndir sem falla að mínum, sem eru nú reyndar eins og þið sjáið svona frekar takamarkaðar hmmm...

Æji, hvað ég er fegin að vera ekki hagfræðingur þessa dagana..........

Fúlar á móti!

Jæja, ég fór á leikrit í gærkveldi sem heitir "Fúlar á móti", þetta er leikrit sem fjallar um breytingaskeið kvenna og miðaldra konur svona yfirleitt. Leikkonurnar Björk Jakobsdóttir, Edda Björgvinsdóttir og hún Helga Braga fara á kostum, þarna gera þær óspart grín að sjálfum sér og konum á svipuðum aldir.

Við fórum 12 saman að sjá leikritið, semsagt vorum þarna 3 konur á fimmtugsaldrinum, ein aðeins yngri, tveir menn á fimmtugsaldrinum og svo það sem skemmtilegast er að við vorum með fullt af unglingum, einn 21 árs, annan að verða 20, tvö sem verða 18 á þessu ári og tvö sem verða 16 á þessu ári. Þarna hlógum við og hlógum og ég hló svo mikið að tárin runni niður kinnarnar hehehe... fyndnast var að krakkarnir hlógu svo mikið líka og svo kom á eftir, mamma ég kannaðist sko við þetta og þetta og þetta.... hehehe...

Ég kannaðist svo sem við ýmislegt líka, þó ég eigi kannski erfitt með að viðurkenna það, en þarna var líka fullt sem ég kannast sko ekkert við og dró því þá ályktun að það sé langt í það að ég verði miðaldra....

Í nýrri vinnu, ja eða þannig...

Nú er búið að loka vinnustaðnum mínum, ég er nú hjá sama fyrirtæki en sit við annað borð og í öðru húsi.

Hér er opið rými og sitjum við í 4ra manna stjörnubásum. Þó að ég vinni hjá sama fyrirtæki þá fylgja ekki allir með okkur hingað af gamla staðnum heldur var okkar litla vinnustað skipt á tvo staði, við vorum 8 send hingað en 6 fara á annan stað.

Þetta er nú svolítið átak, svona þegar maður er búinn að vera á sama stað í 13 ár, auk þess sem það tekur mig uþb. tvöfalt lengri tíma að komast í vinnuna heldur en áður og þá er ekki tekið tillit til umferðar, en gamli vinnustaðurinn var uppi á Höfða og yfirleitt var umferðarteppan ekki byrjuð þegar ég beygði útaf Vesturlandsveginum í vinnuna.

Það eru svo sem ákveðnir kostir í þessu líka, hér er mötuneyti (ef kost skyldi kalla, bætast örugglega einhver kíló við hmm...), og svo er hér mun fleira fólk og meiri svona dynamik. Auk þess benti einhver mér á að það væri mun styttra í Kringluna héðan en af gamla staðnum hehehe.... ég sem forðast það eins og pestina að fara þangað, fæ yfileitt hausverk af öllu saman hehehe.... Jú og hér eru líka mun fleiri strákar ;).

Reyndar sakna ég nú smá svona gamla staðarins, spjallsins, hádegishlésins, og ekki síst fólksins sem ekki kom með okkur hingað.

En lífið heldur áfram...