Bíó

Ég fór í bíó í gærkveldi og sá myndina "Líf annarra" eða "Das leben der anderen" sem vann óskarinn fyrir að vera besta erlenda kvikmyndin. Þetta er rosalega góð mynd og eftir að myndin var búin og textinn fór að rúlla sátu allir ennþá, venjulega í bíó er myndinni varla lokið þegar allir standa upp og rjúka út og ekki síst á mynd sem er 135 mínútur á lengd og ekkert hlé! Ekki skemmdi það fyrir að aðalleikarinn er líka sætur.



Við að horfa á þessa mynd fór maður að hugsa um allt fólkið sem þurfti að búa við þettta ástand sem ríkti í Austur-Þýskalandi og þá tugi ef ekki hundruði þúsunda manna sem unnu við það að fylgjast með lífi annarra og skila skýrslum um það til STASI. Hvað ef þetta fólk hefði nú verið að gera eitthvað uppbyggilegt, þá hefði Austur-Þýskaland kannski ekki dregist svona langt aftur úr Vestur-Þýskalandi!!

Eins gott að járntjaldið féll!

Samræmd próf og framhaldsskólar

Jæja þá eru komnar einkunnir úr samræmdum prófum. Sonurinn var að fá sínar, þær eru nú bara allt í lagi, en hann er soldið hræddur um að þær dugi ekki inn í Versló, en það er sko eini skólinn sem hann sér þessa dagana. Ég vona nú innilega að þetta dugi til, það eiga eftir að koma skólaeinkunnir og þær koma líka inn í þegar valið er inn í skólana, en annars verður hann bara að sætta sig við það næstbesta að hans mati þ.e. MS. Eina sem ég ráðlagði honum var að sækja um í bekkjarskóla.

Það sem er kannski mest svekkjandi fyrir mig sem foreldri er að ég veit að hann getur miklu betur og hefði auðveldlega geta fengið mun hærri einkunnir allavega í sumum fögunum, hann er bara latur. Þó ég sé bara nokkuð sátt við íslenskuna og stærðfræðina þá hefði náttúrufræðin mátt vera hærri, ekki get ég kvartað yfir málunum þau liggja bara ekkert voða vel fyrir honum og einkunnir í þeim bara í samræmi við getu tel ég.

Í fyrra þurfti yfir 8 í meðaleinkunn úr 4 hæstu samræmdu prófunum þ.e. bæði samræmd einkunn og skólaeinkunn til að komast inn í Versló, hann er með 7,75 núna og skólaeinkunnin er ekki komin. Sjáum nú bara til og málum ekki skrattann á vegginn.

Annars var versló nú ekkert voða spennandi þegar ég var í skóla, þar voru bara glamúrgellur og pabbastrákar og það var eiginlega alveg glatað ef maður átti kærasta sem var í Versló þ.e. ef maður var MR-ingur eins og ég.

Áfram MR

Hvað er ég að kvarta?

Já, þvílíkt svartsýnisblogg var þetta hjá mér í gær. Dagurinn í dag er miklu betri enda svaf ég vel í nótt. Á mbl.is sé ég að hún er dáin hún Ásta Lovísa, sem var ung kona og með 3 ung börn, ekki nóg með það heldur dóu bæði mamma hennar og systir úr arfgengri heilablæðingu. Ég þekkti hana ekki neitt eða neitt til hennar en man að það var talað við hana í Kastljósinu einhvern tíman í vetur og það birtist örugglega viðtal við hana í einhverju blaðinu, en allavega yfir hverju er ég að kvarta.

Maður ætti nú að skammast sín að vera svona sjálfhverfur þegar fullt af fólki er þarna úti að berjast við ýmislegt, bæði sjúkdóma og fleira.

Ætti maður ekki að taka síðustu "bloggorð" Ástu Lovísu og gera þau að mottói:

"Knús á ykkur og prufið að byrja daginn á því að brosa, þakka fyrir daginn í dag og opna fyrir hjartað... Er það DÍLL ???"

Það er ekkert að mér, ég á bara frábært líf, með frábæra fjölskyldu og börn og framtíðin blasir við mér. Maður þarf bara að læra að meta það sem maður hefur.

Takk fyrir mig!

Sumir dagar!!!

Úff

Hvað sumir dagar geta verið erfiðir, ég er alveg að kikna undir sjálfri mér þessa dagana, sef lítið, vakna oft á nóttunni og þá með þvílíkan hjartslátt eftir að hafa dreymt einhverja helv. vitleysu.

Það er eitthvað stress í gangi, finnst lífið hafa verið allt of lengi stopp og í biðstöðu, vil halda áfram. Vil fá að vita hvað fyrrverandi er að hugsa! Ég spyr hann, en fæ engin svör.:-( Svo er maður alltaf að fá góð ráð, en hvað á maður að gera við góð ráð sem n.b. væru nákvæmlega sömu ráð og ég myndi gefa vinkonu minni í sömu stöðu. Málið er að það getur enginn sett sig í mín spor og svo erum við öll svo misjöfn.

Vonandi næ ég að sofa eitthvað næstu nætur og um helgina, maður verður svo orkulítill og allt verður svo erfitt þegar maður sefur illa. Svo er maður einnig "extra" viðkvæmur og finnst lífið eitthvað svo erfitt.

Púff

Hundaskóli

Já nú er ég að fara með hundinn í hundaskóla. Bráðfyndið, maður er búinn að ala upp 3 börn, jæja eða er að því og aldrei hefur maður farið í uppeldisskóla fyrir börn, en þetta er alveg bráðnauðsynlegt þegar maður er kominn með hund, ekki satt??

Annars finnst mér Íslendingar hafa afskaplega lítinn "tolerance" fyrir hundum, það þarf sérstakt leyfi til að hafa þá osfrv. Nágranninn gæti átt kolvitlausan krakka sem gargaði alla daga og það er ekkert hægt að gera í því en þú getur auðvitað klagað ef hundur í húsinu geltir alla daga!!

jæja við segjum
VOFF

Þorgrímur Þráinsson

Svona í framhaldi af fyrri bloggfærslu fékk ég sent boð á aðalfund foreldrafélags skólans sem börnin mín eru í. Þetta er bráðskemmtilegt fundarboð og greinilegt að illa hefur verið mætt á aðalfundi hingað til og pabbana greinilega verið sárt saknað. Allavega verða á dagskrá venjuleg aðalfundarstörf og svo erindi Þorgríms Þráinssonar þar sem hann kynnir bók sína:

"Hvernig gerirðu konuna þína hamingjusama: skemmtilegra kynlíf, fallegri samskipti, meira sjálfsöryggi".

Jess nú á að trekkja pabbana. En virkar þetta ekki ákkúrat öfugt, mömmurnar mæta og svo tuða þær í kallinum að Toggi hafi sagt hitt eða þetta!!

Ha, ha, ha.

undirgefin - yfirgefin

Ég var að hlusta á FM957 í morgun á leiðinni í vinnuna. Þar er nú oft mikið um karlhormóna og í þeim þætti virðast karlmenn ekki kunna á börn, uppvask, þvott, ryksugu, klósettbursta og svo mætti lengi telja. Þeir eiga bara að vera skaffarar og finnst eiginlega sjálfsagt að konan sjái bara um að reka heimilið alveg óháð því hvort þær vinna úti eða ekki!! Allavega var eitt sem vakti athygli mína í morgun og er kannski eitthvað sem maður þarf að taka til sín.

Það hringdi inn maður og hann sagði:

"Annað hvort ertu undirgefin eða yfirgefin."

Það er kannski málið ég hef ekki verið nógu undirgefin......

See ya!

Hvað varð um sumarið?

Ég var á leiðinni í vinnuna áðan, á hitamælinum í bílnum stóð 2°C ég er ekki að ýkja og það er 25. maí. Svo svifu nokkur snjókorn niður til að auka enn áhrifin. Ég sem hélt að sumarið væri nú að koma. Skíðasvæðin eru opin fyrir norðan og það mætti halda að það væri að koma páskahelgi en ekki hvítasunnuhelgi.

Annars erum við stelpurnar á heimilinu, að hundinum meðtöldum, á leiðinni í veiði á Snæfellsnesi um helgina. Ég veit ekki hvað verður mikil veiði, vonandi einhver, litla skottið er ákveðin í að veiða fisk! Svo verður auðvitað fjör þar sem bróðir minn kemur með sína fjölskyldu og pabbi ætlar að skella sér með líka. Mamma afrekaði það að detta út á götu og merja sig soldið þannig að hún veit ekki alveg hvort hún treystir sér, kannski kíkir hún á morgun svona fram og tilbaka.

Jæja en sumarið kemur nú vonandi eftir helgi, hann Siggi stormur var eitthvað að tala um það í veðurfréttum í gær að sumarið kæmi á þriðjudag.

kv.

Stjórnarsáttmálinn

Vorum að skoða stjórnarsáttmálann inn á kaffistofu. Þó ég sé nú frekar hlynnt þessari stjórn þá get ég ekki orða bundist. Það er ekkert í þessum stjórnasáttmála, þetta er eins og að fara til spákonu, engar tímasetningar, engar upphæðir eða aðgerðir staðfestar, bara lýst yfir áhuga á að gera "ditten og datten". Og allt svakalega loðið.

Hljómar allt voða vel en hvað svo?

Stjórnin!!

Já hvað sagði ég, við hérna á kaffistofunni vorum með þetta bara nokkuð rétt.
Allavega rétta fólkið ef skipt er um Ágúst Ólaf og Kristján Möller.

Þorgerður hélt áfram með menntamálin. Guðlaugur tók við heilbrigðismálunum, enda vanur maður þekkir vel inná heilbrigðiskerfið þar sem hann brenndist um jólin, varla hægt að finna hæfari mann og hvað þá konu sem kæmi nálægt því að hafa sömu reynslu!
Einar K. Guðfinns fékk landbúnaðar- og sjávarútvegsráðuneytið í bónus.
Björgvin fékk viðskiptaráðuneytið. Össur fékk iðnaðarráðuneytið. Þórunn fékk umhverfisráðuneytið (frábært). Kristján Möller fékk samgönguráðuneytið og Jóhanna tók aftur við félagsmálaráðuneytið nei, vitlaust það heitir velferðarráðuneyti.

Þetta er örugglega fín stjórn. Mér finnst samt að hægt hefði verið að finna fleiri hæfar konur í embættin. Það eru margar mjög hæfar konur til í sjálfstæðisflokknum og það hefði alveg verið hægt að finna allavega eina enn í ráðherraembætti þar.

Það er alltaf hægt að finna konu í manns stað. Ef viljinn er fyrir hendi!

Ný ríkisstjórn?

Já, það bendir allt til þess að ný ríkisstjórn líti dagsins ljós næstu dagana. Við hérna á kaffistofunni erum auðvitað búin að raða í ráðherraembætti að því gefnu að ráðuneytin verði óbreytt.

Það gæti nú gerst að "Solla stirða" og "Geiri níski" myndu breyta þessu þannig að þau myndu sameina landbúnaðar og sjávarútvegs ráðuneytin og hugsanlega bæta iðnaðarráðuneytinu inn í pakkann.

En allavega við veðjum á eftirtalinn lista
sjálfstæðismegin:

Geir, forsætisráðherra
Árni Matt., fjármála
Þorgerður Katrín, heilbrigðis
Einar K. Guðfinns., landbúnaðar
Björn Bjarnason, dómsmála
Guðlaugur Þór, iðnaðar
Sturla, forseti alþingis.


Samfylkingarmegin
Ingibjörg, utanríkis
Össur, sjávarútvegs
Jóhanna/Steinunn, félagsmála
Ágúst Ólafur, umhverfis
Þórunn, menntamála
Björgvin G , samgöngu

svo er spurning hvað við erum sannspá.

Skyldi einhver lesa þetta blogg?

Skiptir það nokkru máli? Ég skrifa þetta svona fyrir sjálfan mig og mínar pælingar. Setti samt að gamni mínu upp teljara, veit ekkert hvort það virkar en það má allavega prófa. Kannski er ég sú eina sem les þetta? Allavega kvitta engir sem er kannski bara allt í lagi, því þá fengi ég svokallaðan "frammistöðukvíða" og þyrfti að fara að vanda mig. Þetta er svona skrifað til að fá útrás, ég veit eiginlega ekki fyrir hvað en svona pælingar. Auðvitað er maður í misjöfnu skapi og allt það þannig að það skín kannski í gegn í blogginu.

Annars hefur mér fundist að rithöfundar og bloggarar skrifi best þegar þeir eru í einhverri tilvistarkreppu. Þannig að það er kannski best fyrir listamanninn í manni að manni líði bara illa.

bless í bili

Fordómar!!

Var að kíkja á blogg um daginn, svona einhver sem ég þekki ekki neitt, bara svona datt inn á síðuna. Þetta er greinilega frekar ungur bloggari en þar stóð nokkrun vegin (er búin að laga málfarsvillur og stafsetningavillur):

"..... hefur skilið einu sinni en það er allt í lagi, hann er samt skemmtilegur og stundum rosalega fyndinn!"

Er þetta ekki málið, það eru svo miklir fordómar gagnvart fólki sem hefur skilið. Það er örugglega eitthvað ekki í lagi hjá þeim eða hvað? Eru þau ekki bara eitthvað skrítin, leiðinleg eða hvað?? Kannski blunda þessir fordómar í mér sjálfri og maður þarf endalaust að sannfæra sjálfan sig um það að maður sé nú bara allt í lagi!

Lífið er skemmtilegt!

Er ekki um að gera að vera með svona jákvæðar blogfærslur?

En allavega ég fór á tónleika í gærkveldi á NASA, sá Tómas R. Einarsson og hljómsveit spila frábæra svona "latino" tónlist, maður var bara kominn á næturklúbb í Kúbu í anda. Svo kom þessi frábæra söngdíva frá Malí. Hún var líka æðisleg, og skemmtilegur takturinn í þessari Afrísku tónlist. Ég komst reyndar að því að "latino" takturinn á betur við mig, ég bara fer að iða og ég finn taktinn bara í maganum á mér, Það stafar sennilega af þessum Frakka sem eignaðist barn með langa langa .... langömmu minni og kallast Erlendur í ættfræðibókum og skildi eftir sig þessi dökkbrúnu augu sem einkenna móðurafa ættina mína. Mamma og ég erum líka með þau auk þess sem litla skottið mitt hefur þau líka. En bræður mínir og hin börnin mín hafa þau ekki.




En þessi afríski taktur er eitthvað erfiðari fyrir mig, hann er allavega ekki í blóðinu, enda engir afrískir sjómenn í aættartölunni hehehe.

Að vera eða vera ekki...

í sambandi.

Mér var kurteislega bent á það að ég og "fyrrverandi" værum í sambandi þó við værum eiginlega ekki í sambandi.

Hvað á hún eiginlega við, jú henni finnst, eins og ég veit svo sem alltof vel, að við séum í miklu meira sambandi heldur en er okkur hollt. Við erum nú einu sinni skilin eða þannig.

Við finnum okkur milljón ástæður bæði tvö til að hringa í hvort annað með því yfirskini að við séum að ræða börnin og svo kemur eitthvað allt annað, svona bara til að heyra hvort í öðru.

Reyndar er þetta ekkert sniðugt og við vitum það, um leið og það þarf að ræða eitthvað viðkvæmt þolum við ekki neitt og húmorinn fýkur út um gluggann og við verðum pirruð á hvort öðru.

Ég skil þetta bara ekki. Við getum ekki slitið okkur frá hvort öðru, hvernig á maður eiginlega að geta haldið lífinu áfram og hugsanlega geta stofnað til nýs sambands þegar þetta gamla er svona mikið í gangi enn. Við erum hvorugt tilbúin að byrja saman aftur held ég. Ég held að ég sé tilbúin þar sem mér hefur aldrei fundist þessu vera lokið en hann er ekki tilbúinn og það þýðir þá að hann elskar mig bara ekki nógu mikið, ég verð þá bara að kyngja því, en þá er svo vont að tala svona mikið saman.

Æji mér líður eitthvað svo skringilega þessa dagana. Ég er eitthvað svo þreytt og stressuð. Þetta er búið að taka svo mikið á og taka svo langan tíma, ég hlýt að kikna undan þessu einn daginn.

"Júróvision"

Eru ekki allir að blogga um "júróvision" í dag. Ég horfði á keppnina og lækkaði reglulega í græjunum því að sum lögin voru frekar erfið áhlustunar. En þetta var bara gaman, fékk mat frá Ávaxtabílnum (heimilisbílnum) skemmtilegt framtak það. Kíkið á avaxtabillinn.is. Svo var horft og Eiki var bara flottur og atriðið hreinlega var að springa úr "karlmennsku", engir hommar þar á ferð. En auðvitað fór þetta svo eins og mann grunaði, þetta er auðvitað bara klíka. Mér fannst til dæmis hollenska atriðið og söngurinn flottur og hefði verið sátt við að það lag færi áfram þó að Eiki rauði hefði orðið eftir heima en þannig fór um sjóferð þá. Ég hugsa samt að maður kíki á þetta á laugardaginn, verst að ég verð sennilega ein og barnlaus það kvöldið að horfa á "júróvision" nema einhver bjóði mér í mat. Svo er kosningarnar í framhaldinu, þær eru eiginlega miklu meira spennandi og ég fer pottþétt á kosningavöku hér í bænum.

Jæja allir svo kjósa rétt á morgun.

Stjórnmál

Já, það eru að koma kosningar. Ég er mikill stuðningsmaður ákveðins flokks og trúi því að hann sé það besta fyrir þjóðfélagið og budduna mína. En þannig er það bara maður fær alls konar athugasemdir og skot á sig og þarf sífellt að verja sinn málstað.

En það er svo sem í lagi. Ég er pínu hrædd við það að ef vinstri menn komist í stjórn aö þá hækki skattarnir aftur, hátekjuskattur verði settur á og eignaskattur. Þetta er kannski ekki svo hræðilegt ef tekju- og eignarmörkin sem miðað var við þegar þetta var við lýði væru ekki svona fáránlega lág!!

Svo kemur alltaf upp hjá manni að það sé kannski best fyrir þjóðfélagið að fá vinstri stjórnir annað slagið svona til að spreða soldið og koma hlutunum í gang þó þeir reikni málið sjaldan til enda og geti sjaldnast ráðið við að fjármagna allt dótið nema með lánum en þá er kominn tími til að skipta og fá hægri menn til að redda peningamálunum.

jæja svona er víst lífið

Opið samband!

Ég var á mjög skemmtilegu grímuballi í gær, þvílíkt fjör. Ég er rétt komin inn þegar þessi líka myndarlegi Mexícani gefur sig á tal við mig.

Við spjöllum aðeins og döðrum soldið, það sem var soldið fyndið var að hann var í svuntu undir Mexícana ponsjónum sem var með mynd af Davíð hans Michelangelo, þið kannist örugglega við þessa mynd en Davíð er með rosalega lítið og krúttlegt tippi og olli þetta mikilli kátínu, en jæja svo var dansað og haldið áfram að daðra. Allt í einu kemur í honum. "Þú gerir þér grein fyrir því að ég er giftur og konan mín er hérna." Ég varð svolítið hvumsa því það er örugglega það síðasta sem ég ætla mér að gera að reyna við giftan mann svona eftir það sem á undan er gengið. En jæja svo kom hjá honum svona í léttum tóni já við erum svona í opnu sambandi!!




Já það virðist loða soldið við menn á þessum aldri þ.e. rúmlega fertugir, þessi draumur um opið samband. Ég heyrði minn mann gantast soldið með þetta hér áður fyrr. Ég held að þessir menn vilji hafa sambandið svona opið í annan endann ekki hinn. þ.e. þeir vilja geta daðrað en ég er ekki viss um að þeir yrðu svo kátir ef konurnar þeirra færu að daðra við aðra kalla. En jæja svona fór um sjóferð þá. Ég þarf allavega ekki að hugsa um það að þessi maður hringi í mig!!

Tík

Eins og fram hefur komið hefur heimilisfólkinu fjölgað hér um einn, þ.e. um tíkina. Ekki veit ég af hverju þetta orð tík hefur fengið svona niðrandi merkingu, það stafar örugglega af áhrifum úr ensku þ.e. (bitch), en ljúfari dýr er varla hægt að finna. Mér finnst þetta eiginlega vera leiðinlegt orð og nota það aldrei eða allavega mjög sjaldan, enda er ég nú kannski þannig manneskja að ég tala yfirleitt ekki mjög illa um fólk.
Málið er að tíkur eru mjög heimakærar og yfirleitt mjög ljúfar við börn og þá sem þær greina sem minni máttar. Svo héðan í frá mun ég ekki leggja mér orðið tík í munn í niðrandi merkingu.

Nýtt fósturbarn!

Ég hef oft hugsað það hvort ég sé yfirhöfuð með geðheilsuna í lagi. Núna með hækkandi sól fæ ég svona ógnarkraft, mér finnst lífið svo yndislegt.

Nú var ég að kíkja á netið bara svona smá, skoða mbl.is og þar er alltaf vísað í einhver blogg stundum les ég svona eitt og eitt. Í einu bloggi var vísað á heimasíðu hunds. Ég hef svo sem alltaf verið mjög hrifin af hundum en hef undanfarin 20 ár hlustað á fortölur kallsins um að þetta sé svo mikil binding og mikil vinna. Jæja en þessi heimasíða er á heimasvæði sem heitir hvuttar.net og ég kíki að gamni á forsíðuna þar. Nýjasta smáauglýsingin hét "Bjargið mér!" ég kíki á hana bara svona í rælni. Þar er þessi yndislega mynd af tík sem heitir Tinna og eigendurnir voru á leið með hana að láta svæfa hana. Ég hugsaði um þetta fram eftir degi en seinnipartinn hringi ég og hún er enn ekki farin og enginn hringt og spurt um hana. Jæja ég hringi og fæ uppgefið heimilisfang og auðvitað er það gefið að ef maður sér hundinn þá er ekkert aftur snúið svo nú er kominn nýr fjölskyldumeðlimur.



Jæja, maður er orðin einstæð með 4 börn!!

Karíus og Baktus

Við fórum mæðgurnar á leikritið Karíus og Baktus í gær. Mikið svakalega er þetta skemmtilegt leikrit hjá þeim í Leikfélagi Akureyrar. Það var svo sem aðeins og stutt fyrir minn smekk hefði sko alveg verið til í að sitja svolítið lengur og hlægja að þessum yndislegu karakterum. En já litla skottið hristist af hlátri. Hún var búin að fá diskinn í sumargjöf og það er sko búið að hlusta á hann í ræmur.
En já mæli með þessu leikriti fyrir börn á öllum aldri!!

Gleðilegt sumar!

Þá er hann runninn upp sumardagurinn fyrsti. Þetta var ávallt mikill hátíðisdagur hjá okkur skátunum í Garðabæ. Talandi um það þá átti gamla skátafélagið mitt Vífill 40 ára afmæli í gær. Til hamingju.

Jæja, en í gær var líka mikill hátíðisdagur í bæjarfélaginu sem ég bý í núna, haldið var uppá opnun nýrrar íþróttamiðstöðvar og sundlaugar auk þess sem skátarnir seldu kaffi, lúðrasveitin spilaði, sunddeildin sýndi boðsund ofl. Það sem er kannski skemmtilegast í þessu öllu saman er að ég átti börn í öllu saman þar sem dóttirin er bæði í lúðrasveitinni og í skátunum og strákurinn er í sundinu.

En þessi dagur tókst mjög vel og ekki skemmdi veðrið fyrir þar sem það var alveg dásamlegt þó að kalt væri.

Fermingin

Það sem hefur verið efst í huga mínum síðustu vikur er auðvitað fermingin. Hún var í gær, allt gekk eins og í sögu, þvílíkt góður dagur og fallegur. Held að fermingabarnið hafi sofnað með bros á vör í gærkveldi, (soldið erfitt að sjá það því hún er með þvílíkt beisli í tönnunum á nóttunni þessar vikurnar), en ég er eiginlega alveg sannfærð um það að dagurinn hafi verið ánægjulegur hjá henni.

Amma hennar fékk hana meira að segja til að troða upp í veislunni og spila þvílíkt ljúfa tóna við undirleik Stradivarius fiðlu, það verður ekki betra.

Það er svolítið spennufall í dag og erfitt að einbeita sér.

Myndarlegur?

Ég fór að hugsa um daginn, já hljómar svona eins og ég hugsi ekki mikið. Held að það sé vandinn, ég hugsa of mikið!!

Jæja, einn vinnufélagi minn var að segja frá því að hann hefði kíkt til kunningja síns í kaffi, svo fylgdi því góð saga eins og ávallt. En hann endar á því að segja hann er fráskilinn .... myndarlegur maður! OK. Ég sagði ekkert bara brosti. En svo fór ég að hugsa. Hvað er það sem skiptir máli. Auðvitað hefur útlit eitthvað með fyrstu kynni að gera en hvað svo. Ég fór að stilla upp mínum óskum.

Hann þarf að vera skemmtilegur (algjört frumskiliyrði)
Hann þarf að vera fjárhagslega sjálfstæður þ.e. hann standi undir sjálfum sér!
Hann þarf að vera sæmilega menntaður, þannig að hægt sé að tala við hann um ýmis málefni.
Hann þarf að hafa húmor fyrir sjálfum sér.
Hann þarf að vera við ágætis heilsu og í sæmilegu formi, allavega þannig að hægt sé að draga hann með sér á skíði og í gönguferðir ofl.
Hann þarf að vera tilbúin að lifa fjölskyldulífi þar sem ég á börn.
Hann má ekki hafa mjög tímafrekt áhugamál sem ég hef ekki áhuga á, eða get ekki verið með honum í. (Sýni veiði skilning en ekki golfi hehe)
Hann má ekki vinna allan sólarhringinn, sem er svo sem hluti af þessu með fjölskyldulífið.
Sko ef hann er líka myndarlegur þá er það bara bónus en það er ekkert frumskilyrði.

Þetta eru kannski soldið miklar kröfur en hey það er ágætt að setja markmiðið hátt, maður lækkar þá bara standardinn ef þetta gengur ekki, upp ekki satt?

Mér finnst reyndar þessi listi minna óneitanlega soldið á fyrrverandi nema hann er líka myndarlegur.

Nóg í bili.

Pabbahelgar

Hver kannast ekki við þær, sumir þekkja þetta bara af afspurn en aðrir hafa reynt þetta á eigin skinni. Þetta er svolítið skrítin tilfinning þegar maður er svona aleinn heima og getur gert það sem maður vill.

Ég er eiginlega ekki búin að læra þetta, enda hafa unglingarnir svo sem ekki verið að fara heilu helgarnar til pabba síns, en það kemur fyrir að þau séu tvo daga hjá honum í röð.

Ég veit það ekki ég kann þetta ekki, mér finnst fyrsta kvöldið oft alveg ágætt, bara að setjast upp í sófa, þurfa ekki að hugsa um mat eða neitt horfa á það sem ég vil eða lesa eitthvað skemmtilegt. Svo fer ég að sofa, það gengur svona la, la. Fyrsta daginn er þetta oft allt í lagi líka, maður drífur sig í göngutúr í rigningunni, kíkir í búðir eða reynir að koma heimilinu í horf, vinnur kannski upp einhvern þvott og skiptir á rúminu. Svo kemur kvöld númer tvö, þá leiðist mér yfirleitt þ.e. við hjónin áttum það til að elda góðan mat á laugardagskvöldum, opna eina til tvær rauðvín og sitja og spjalla um daginn og veginn. Nú veit ég ekkert hvað ég á að gera, rölti oft yfir til bróður míns og hans konu með rauðvínsflösku ef þau eru heima en ef ekki þá er þetta eiginlega bara hundfúlt. Svo kemur dagur nr. tvö OMG hvað á maður að gera þá. Ég hef meira að segja staðið sjálfa mig að því að fara í vinnuna.

Þetta er nú bara fyndið, maður kvartar alla vikuna yfir því að maður hafi engan tíma fyrir sjálfan sig og geri aldrei neitt fyrir sig svo koma svona heilu dagarnir þá veit maður ekkert í hvorn fótinn maður á að stíga. Málið er auðvitað að maður er svo mikil fjölskyldumaður og félagsvera að maður saknar þess að hafa ekki húsið fullt af fólki.

Þetta venst kannski með tímanum.

Núna um páskana voru sko sorglegustu páskar ever. Ég var með krakkana fram á laugardagskvöld, þá kom pabbi þeirra og sótti þau. Páskadagur rann upp og það rigndi svo ég vissi eiginlega ekkert hvað ég átti að gera en endaði uppí vinnu og vann rúmlega hálfan vinnudag og fór svo á Nings á leiðinni heim. Getur þetta verið verra?? :-( Jæja kvöldið bjargaðist þegar mágkona mín hringdi og bauð mér að koma yfir fór yfir með rauðvín, breezer og bjór og við fengum okkur bara vel í glas og enduðum á djamminu niður í bæ!! Já á páskanótt! Jæja ætluðum á Torvaldssen en hann var lokaður svo við enduðum á staðnum við hliðina á, Deco held ég að hann heiti og þar var Einar Ágúst að spila "læf" svo við dönsuðum bara og skemmtum okkur vel.

Jæja þetta gæti alveg verið verra.

Ferming

Jæja
Það er komið að því að ferma barn nr. 2. Reyndar er þetta afskaplega eitthvað afslappað núna, mér fannst þetta miklu meira mál þegar ég fermdi frumburðinn fyrir 2 árum síðan. Munurinn er sá að það var auðvitað í fyrsta skipti sem maður fermir og í öðru lagi héldum við ferminguna heima sem olli auðvitað smá raski heimafyrir í nokkra daga áður og á eftir. Núna bjóða húsakynnin ekki uppá það að halda stórar veislur svo við erum með þetta í sal.

Núna er ég að ferma stúlku, auðvitað er soldið meira mál að finna föt, greiðslu ofl. og auðvitað hafa stúlkur á þessum aldri mjög ákveðnar skoðanir um það hvernig þetta á allt að vera. En allavega ég er afskaplega afslöppuð yfir þessu, förum á morgun og skreytum salinn og röðum upp borðum og slíku. Svo er bara veislan á sunnudaginn og athöfnin auðvitað. Þurfum að mæta kl. 7:00 í greiðslu, en þetta er bara gaman.

Um kvöldið er hún búin að bjóða öllum 8 stelpunum í bekknum í partý þannig að ég verð nú ósköp fegin á mánudaginn þegar þessu verður öllu lokið.

En ég ætla að njóta þess.

Sumarið

Jæja,

Það er auðvitað leikskólinn sem fær mann til að fara að plana sumarfríið. Við fengum bréf um daginn sem benti okkur á það að við þurfum helst að vera búin að ákveða hvenær barnið fer í frí fyrir miðja næstu viku. OK, skoðum málið það þarf að vera í fríi í a.m.k. 4 vikur samfellt. Auðvitað má taka meira frí og einhverjar vikur auka en allavega þessar 4 vikur. Jæja skoðum nú málið.

Það nýjasta í stöðunni er að dóttirinn er að fara á skátamót í Svíþjóð í 2 vikur í Júlí, Oh mig langar svo með og nú eru fararstjórarnir alveg vitlausir og vilja endilega fá mig með. Á maður ekki bara að skella sér? Chilla bara ein með stóru stelpunni og leika mér í 2 vikur. Why not!!

Er ekki tækifærið núna þegar maður þarf ekki lengur að taka tillit til óska kallsins og getur bara gert það sem maður vill. Mig hefur alltaf langað til útlanda á skátamót alveg síðan ég var krakki svo nú held ég bara að ég stökkvi á það.

Einu sinni skáti ávallt skáti!!

Sweet sixteen

Jæja, stóra barnið mitt er 16 ára í dag. Vá hvað lífið er fljótt að líða. Ég man það eins og það hafi gerst í gær þegar ég sá hann í fyrsta sinni. Hann var með heilmikið kolsvart hár og hrikalegann sveip í hárinu. Þ.e. framan á enninu, hann var svona eins og hvirfilbylur. En ofboðslega var hann fallegur og er enn :-) Þær eiga eftir að gráta yfir honum nokkrar stúlkukindurnar.

Pabbinn fékk alveg sjokk yfir sveipnum og fór til klipparans síns og spurði hvort það væri eitthvað hægt að gera til að losna við svona sveipi, raka hárið af eða eitthvað. Nei, nei það er ekkert hægt að gera nema lifa með þessu og það hefur minn gert síðan. En oft pirrast hann útí þennan sveip. Flestir klipparar fá svona vægt áfall þegar þeir sjá sveipinn og það er búið að reyna ýmislegt, klippa hann alveg niður, hafa hann síðan og allt þar á milli. Mér finnst hann nú bara flottur.

En elsku drengurinn minn er að fara að keppa á sundmóti í dag svo það verður lítið um partýhald í bili. Vonandi gengur honum vel svona í tilefni dagsins.

Er ég karlmaður?

Já svolítið skrítin fyrirsögn, en ég tók að gamni mínu þátt í könnun á netinu sem átti að sýna hvort kynið maður er. Eða þannig. Ég svaraði fullt af spurningum og að lokum kom svarið, ég svaraði eins og meðalkarlmaður!!

OK, ég starfa í karlastétt en come on, ég er líka fyrir karlmenn þ.e. gagnkynhneigð eins og 90% allra kvenna, ég á börn og elda ágætis mat. Ég tel mig líka vera frekar svona næma þ.e. hafa svolitla tilfinningu fyrir því hvernig öðrum líður en samt, fæ ég svörun eins og karlmaður. Ef svörin eru skoðuð frekar þá er ég svolítið næm fyrir tilfinningum annarra en ég er líka svolítil system kona, þ.e. set hlutina í samhengi og það þarf að vera einhver regla á hlutunum. Það gerir mig að meiri karlmanni.

Jæja, það er ekkert að marka svona kannanir á netinu er það nokkuð?

Spákonur

Ég var víst búin að lofa ykkur að láta vita þegar ég væri búin að hitta spákonu. En núna er það ekki bara ein heldur tvær. Já, já, ég fékk nafn hjá einni og hringdi, fékk bara tíma daginn eftir ekki málið. Það var gaman að koma til hennar og hún sagði ýmislegt sem ég ætla nú ekki að fara nánar útí hér. En 2 vikum seinna hringdi þessi sem ég sagði ykkur frá, þessi með bréfið OK ég sló til.

Þær voru nú ekki alveg sammála um allt en ótrúlega margt. Þær lýstu mér og mínu lífi afskaplega rétt og lýstu börnunum mínum líka.

En allavega mér var sagt að árið 2007 yrði svo mörgum sinnum betra en árið 2006 svo nú er bara að trúa því.

....ég sé blátt hjól.....

Vigtin maður!!

Jæja

Fór í vigtun. "Dísus mar". Maður er næstum búin að bæta á sig þessum kílóum sem fuku af fyrstu mánuðina í fyrra. Ég sem var svo agalega stolt í byrjun des. Ég hafði ekki bætt á mig nema 500g þessa mánuði síðan ég hætti í átakinu. Jæja, nú skal sko taka á því, þau voru orðin 3 áðan þegar ég fór í vigtunina.

Nú skal bara skrifuð matardagbók og allt gert rétt!! Ég er reyndar strax búin að svindla í dag svo ekki fær þessi dagur stjörnu í kladdann. En á morgun segir sá lati!! Þetta þýðir ekkert lengur bara drífa sig koma svo!!

Áfram Ísland en í dag spila þeir mikinn tímamótaleik gegn Dönum. Við skulum sko sýna Dönunum í tvo heimana og hverjir eru flottastir!! Við mölum þá bæði á vellinum og í fjármálaheiminum ;-)

Jess

Lagt á hilluna

Jæja

Þetta hafa svo sem ekki verið viðburðalitlar vikur þessar upphafsvikur ársins en svona er víst lífið. Ég hef ekki skrifað mikið enda mikið í gangi þessa dagana. Ég er búin að vera rosa reið en er nú að jafna mig.

Ég er líka búin að taka ákvörðun. Gamli kallinn minn verður lagður á hilluna. Það er ótrúlegt hvað manni líður miklu betur þegar maður er búinn að taka svona ákvörðun. Ég þekki ekki þennan mann lengur og vil eiginlega ekki þekkja hann eins og hann er núna þannig að hann er bara farinn, hann fær að vera í hillunni þangað til það fellur á hann ryk en þá nenni ég ekki að þurrka af honum heldur set hann inn í geymslu þar til ég tek til þar og fer með allt draslið í Sorpu.

Ég er líka búin að sjá að með þessu er missirinn allur hans. Hann situr uppi með einhverja konu sem hann veit ekki hvort hann vill eða ekki, allavega er hann búinn að missa af mér sem er af flestum talin mun betri kvenkostur á allan hátt. En ég, ég er bara laus! Hann er líka að missa af unglingunum, unglingar eru þannig að maður hittir þá í mýflugumynd rétt á meðan þeir fá sér eitthvað að borða eða koma heim til að fara að sofa og ef maður býr ekki með þeim og hittir þá þessar mínútur þá hittir maður þá bara ekki neitt!! Það er ekkert sem heitir virkar "pabbahelgar" með unglingum.

Ég skil eiginlega ekki afhverju hann reynir ekki að nálgast þau meira, hann hringir í þau annað slagið og búið. Þau gista hjá honum einstaka nótt en annars ekkert. Hann gæti gert milljón hluti með þeim, tekið þau á virkum dögum bara til að spjalla svona þegar þau eru ekki upptekin í öðru, hann gæti platað þau í bíó ofl. ofl. En það gerist bara ekkert hann er svo upptekinn í því að finna sjálfan sig að hann gleymir því að einu sinni bar hann ábyrgð á heimili og börnum!!

Ég held að hann sé bara á "gelgjunni". Samkvæmt tengdó þá fór hann aldrei á gelgjuna svo það er nú ekki seinna vænna svona á fimmtugsaldrinum. Ég get líka fengið létt í taugarnar þegar hann hringir og er svo þreyttur eftir vinnudaginn og að hugsa um sjálfan sig að hann ætlaði bara í sundlaugarnar og pottinn að slappa af. Ég leit á klukkuna hún var rúmlega níu að kveldi til og ég leit svona létt yfir eldhúsið þar sem maturinn var enn á eldhúsborðinu því elsti unglingurinn var ekki kominn heim af æfingu, það var heill bali af þvotti sem átti eftir að brjóta saman, það átti eftir að setja í a.m.k. eina þvottavél, taka úr vélinni, setja í þurrkarann og hengja upp. Ekki nóg með þetta heldur var litla skottið ekki enn komið í náttföt og sat á gólfinu og fullyrti að hún væri bara ekkert "freitt".

Svo hann er bara á hillunni, það er strax farið að falla á hann ryk, á ég ekki bara að fara með hann beint í Sorpu??

Fimleikar

Já, þið lásuð rétt. Fimleikar. Ég æfði fimleika í nokkur ár sem barn og unglingur og þótti gaman að, en svo gerðist það sem gerist svo oft, sérstaklega með stúlkur, að ég fór í smá uppreisn. Ég æfði fimleika á þessum tíma 5 sinnum í viku og svo var ég líka í skátunum og þetta tók auðvitað mikinn tíma svo mikinn að ég hafði ekki tíma til að vera unglingur, þannig að ég hætti öllu!!

Þetta var veturinn eftir fermingu, mjög erfiður aldur, ég var reyndar búin að sjá það að ég yrði aldrei neinn meistari í fimleikunum en ég var vel "slarkfær" svo ég hætti. Ég hætti bara alveg, fullt af stelpum hætti á þessum aldri en nýtti sér þann vöðvamassa og þá þjálfun sem þær höfðu fengið og fóru í frjálsar eða skíði, en ég hætti.

Ég var reyndar í stuttu fríi í skátunum bara svona einn vetur eða svo og ég tel mig enn vera skáta! Einu sinni skáti ávallt skáti.

En hugmyndin að þessum pistli voru nú fimleikar, ég er nefnilega byrjuð aftur í fimleikunum!! Já, já mætti í Gerplu í svona fullorðinstíma með fullt af konum og köllum á öllum aldri, ég er nú kannski í eldri kantinum. En eftir fyrsta tímann var ég farin að fara í heljarstökk af trampolíni og í flikk flakk með aðstoð!! Geri aðrir betur.

Ég var svo ánægð með mig þegar ég gekk titrandi út úr tímanum sem stóð í 2 klst. fyrst var klukkustunda upphitun og þrek svo var farið á trampolínið og leikið sér aðeins en svo var aftur þrek og teygjur í 20 mínútur. Ég lá bara í gólfinu á eftir en gekk út með bros á vör. Ég vildi að svona eitthvað hefði verið þegar ég var rúmlega tvítug, ég væri örugglega enn í fimleikunum. Þetta er pínu erfitt svona 20 kílóum og 27 árum seinna!!

Jess!!

Spámiðlar oþh.

Jæja

Ég er farin að halda að ég sé ekki alveg í lagi.

Málið er að þrátt fyrir raunvísindamenntun mína og þá staðreynd að lífstala mín er 9 og ég er steingeit finnst mér samt gaman af því að spá í svona "spiritual" hluti.

Ég hef reyndar farið að ég held aðeins 4 sinnum til spákonu á æfinni semsagt svona ca á 5 ára fresti síðan ég varð fullorðin. Núna þegar allar þessar sviptingar hafa orðið á mínu lífi hef ég ætlað mér að fara til spákonu eða karls allt síðasta ár. Ég tók mig til og hringdi í sálarrannsóknarfélag hér í bæ og ætlaði að panta tíma hjá einhverjum góðum. Talaði þar við aðila sem mælti með ákveðinni konu sem byggi útá landi en kæmi reglulega í bæinn og tæki þá fólk í tíma. Mér leist vel á það og mér var lofað að ég yrði látin vita næst þegar hún kæmi í bæinn, tekið var niður nafn og símanúmer og ég beið og ég beið. Eftir nokkra mánuði hringdi ég aftur og enn svaraði sami aðili og sagði að jú hún hefði nú komið en það hefði sennilega gleymst að hringja í mig og enn var tekið niður nafn og símanúmer. Ég beið, reyndar ekki jafnlengi í þetta sinn en hringdi þá aftur og þá var mér sagt að hringja seinna og svo aftur seinna. Ég gafst eiginlega upp þegar 8 mánuðir voru liðnir!

Jæja í síðustu viku var mér svo bent á mjög góða konu en málið með hana væri að maður yrði að setja nafn og símanúmer á blað og stinga inn um lúguna hjá konunni og hún myndi svo hafa samband. OK ég gerði það í síðustu viku og konan hefur ekki enn haft samband! Aðilinn sem lét mig hafa heimilsfang og nafn þessarar konu segir að hún viti ekki um neinn sem hún hefði ekki hringt í!!

OK. Ég er örugglega í svo miklu messi að þetta lið þarna sem er komið yfir móðuna miklu er búið að gefast uppá mér og nennir ekki að tala við mig.

Jæja læt vita þegar einhver vill tala við mig!!

Nýtt ár

Fann þetta ljóð á einhverri bloggsíðu fyrir löngu síðan ákvað að setja þetta inn hérna, ég held að þetta lýsi því nokkuð vel hvernig ég hef það hérna á nýju ári.


If you see me walking with someone else, it's not because I want to,
it's because you weren’t brave enough to walk beside me.
If you see me smile, it's not because I forgot you,
it's because I got tired of crying over you.
If you see me living again, it's not because I've moved on,
it's because I hate the fact that you can live without me.
So if I fall in love with someone else, it's not because I wanted to,
it's because you weren’t there to catch me.


Gleðilegt ár.

The Sonnet Deliberate Gentle Love Dreamer (DGLDf) Romantic, hopeful, and composed. You are the Sonnet. Get it? Composed? Sonnets want Love and have high ideals about it. They're conscientious people, caring & careful. You yourself have deep convictions, and you devote a lot of thought to romance and what it should be. This will frighten away most potential mates, but that's okay, because you're very choosy with your affections anyway. You'd absolutely refuse to date someone dumber than you, for instance. Your exact opposite: Genghis Khunt Random Brutal Sex Master Lovers who share your idealized perspective, or who are at least willing to totally throw themselves into a relationship, will be very, very happy with you. And you with them. You're already selfless and compassionate, and with the right partner, there's no doubt you can be sensual, even adventurously so. You probably have lots of female friends, and they have a special soft spot for you. Babies do, too, at the tippy-top of their baby skulls. ALWAYS AVOID: The 5-Night Stand, The False Messiah, The Hornivore, The Last Man on Earth CONSIDER: The Loverboy .

Flugeldar

Ég er mikil flugeldamanneskja, ég er aðalskjótarinn í minni fjölskyldu, kallinn hefur í gegn um tíðina ekkert verið spenntur fyrir þessu en krakkarnir eru að vakna sérstaklega drengurinn enda orðinn 15 ára.

Ég hef í gegn um tíðina haft svona prinsipp en það er að ef maður þarf að kaupa svona óþarfa eins og flugelda eigi maður að kaupa það hjá einhverjum sem notar ágóðann í einhverja góða hluti. Það þýðir að ég kaupi jólatré hjá "Landakoti" til styrktar krabbameinssjúkum börnum, og flugelda hjá Hjálparsveitinni, ég kaupi jóladagatalið hjá Lions osrfv. En svona er ég bara.

Jólin

Jæja þá eru jólin yfirstaðin.

Þetta var kannski ekki eins slæmt og ég var búin að ímynda mér. Fórum í mat til bróður míns á Aðfangadagskvöld, þvílík veisla og allir mættir. M+P, yngri bróðir minn með sína konu en þau voru barnlaus þessi jólin (það er svona með þessar flóknu fjölskyldur) og svo ég með krakkana. Okkur taldist svo að við hefðum ekki verið saman á Aðfangadagskvöld öll systkinin síðan 1990, það gera heil 16 ár. Þegar búið var að borða í rólegheitum, var farið í pakkaopnun og auðvitað með svona margt fólk þá tók þetta tvo og hálfan tíma allt saman en rosa gaman. Svo var eftirrétturinn snæddur og kökur og þá dreif ég mig með mitt lið til tengdó svo þau gætu séð framan í pabba sinn og heilsað uppá ömmu og afa. Þar tók við önnur pakkaopnun að vísu mun færri pakkar en ekki síður gaman. Svo staulaðist ég með liðið heim klukkan að ganga þrjú!

Jóladagurinn var ekki síður skemmtilegur, kallinn kom og sótti krakkana um tvöleytið og ég rölti yfir til litla bróður í aspassúpu og pakkaopnun hjá prinsinum þeirra. Svo þegar ég kom heim hringdi kallinn í mig og bauð mér að koma og snæða með þeim hangikjöt sem ég og gerði þannig að fjölskyldan var eiginlega saman bæði í Aðfangadag og Jóladag.

Annar í jólum var frekar rólegur, ég var ein heima, lá í sófanum og horfði á sjónvarpið m.a. á Harry Potter fór svo í langan og hressandi göngutúr, fattaði auðvitað í miðjum göngutúr að ég hafði gleymt Ipodinum og nýju göngustöfunum sem börnin gáfu mér í jólagjöf. Ég skaut því reyndar að kallinum hvort hann væri að gefa mér göngustafi svo ég gæti farið að stunda ferðir með Útivist og Ferðafélaginu en mér skilst að þar séu miklar líkur á að hitta miðaldra einhleypa karlmenn í konuleit og auðvitað konur í karlaleit!! Honum fannst þetta ekkert fyndið.

Jæja næst eru það áramótin.

"Heiðarlegi flokkurinn og breiðu bökin

Maður á nú bara ekki til orð yfir þessari "tík" sem kölluð er pólitík. Það virðist einhvern veginn vera þannig að um leið og einhver flokkur kemst til valda þá eru vinum og vandamönnum raðað í feitar stöður og verkefni sem tilheyra viðkomandi.

Ég ætla ekki að rekja neitt hér, en menn geta litið á Reykjavík bæði undir stjórn R-listans og núna hjá Framsókn- og sjálfstæðismönnum. Skipulagsbreytingar í Mosó í tíð Sjálfstæðisflokksins og núna í tíð Sjálfstæðisflokksins og vinstri grænna, þetta var svo sem ekkert skárra þegar vinstri menn réðu þar. Kópavogurinn og æðstu menn þar osfrv. osfrv.

Hvað er eiginlega til ráða?? Það er alveg sama hver á í hlut það eru allir flokkar jafnspilltir. Ég er mikið að spá í að stofna nýjan flokk sem bæri heitið Heiðarlegi flokkurinn sem myndi ávallt hafa almenningshagsmuni í huga og framkvæma í samræmi við það.

Ég er líka búin að komast að því að ég er ein af þessum með breiðu bökin. Það er alveg sama hvað er gert sem á að koma almenningi til góða það bitnar alltaf á fólki eins og mér. Fólki sem er í vinnu hjá öðrum, á ágætis launum en engum súperlaunum og við þurfuma alltaf að borga, allt. Það er felldur niður hátekjuskatturinn OK, ég náði því ekki að borga hátekjuskatt nema einhvern 5000 kall á síðasta ári. Eignarskattur er felldur niður það er lika þannig ég hef ekki eignast nógu mikið til að borga eignarskatt, því ég skulda svo mikið. Svo er ég með of háar tekjur til að fá barnabætur og fæ mjög skertar vaxtabætur.

Ég borga mikið í skatta og þegar ég verð gömul verða svo fáir sem vinna að lífeyristekjurnar verða örugglega mjög mikið skertar. Ég var í skóla þegar skattlausa árið var, ég er ekki nógu gömul til að hafa "grætt" á verðbólgunni, ég þarf að borga námslánin í botn þau falla ekki niður eftir 20 ár eins og hjá fólki sem er eldra en ég og ég þarf meira að segja að borga vexti af námslánunum.

En svona er þetta einvher þarf að halda þjóðfélaginu gangandi. Mér finnst það eiginlega alltaf vera ég ;-)

Þetta er nú meira vælið!

"Þittrúmið"

Svolítið skrýtinn titill á bloggi en þetta er það sem skottið kallar rúmið sitt. Málið er að í svefnherberginu er rimlarúm sem skottið á. Það er ekki mikið notað nema þegar mamma "nennir" að færa skottið á milli eftir að það er sofnað í stóra rúminu hennar mömmu.

Svo er auðvitað sagt, "settu þetta í þitt rúm!", "Farðu nú í þitt rúm", osfrv. Svo tók ég eftir því að skottið sagði við mig, "Mamma bangsarnir ætla að sofa í "þittrúminu"". "Ég set þetta bara í "þittrúmið"" osfrv. Þannig að opinbert heiti rúmsins er semsagt "Þittrúmið"

kv.

Hlutir til að blogga um

Þar sem ég fékk smá "breik" frá börnum um helgina fékk ég tíma til að hugsa. Ég komst að því að það er fullt af hlutum sem mig langar til að blogga um en ég hef eiginelga ekki tíma núna en ætla að birta listann þannig að næst þegar ég hef tíma þá hafi ég eitthvað að segja.

Kósíkvöld með krökkunum
Föndur fyrir jólin
Pabbahelgar
Kosti þess að búa ein (með 3 börn)
Ókosti þess að búa ein (með 3 börn)
Samgöngumál á Íslandi
Pólitík

þetta er allvega það sem kemur upp í hugann svona einn tveir og þrír.

Verð að gefa mér meiri tíma næst.

Kalkúnasagan

Jæja, ég var víst búin að lofa kalkúnasögunni hérna.

Þannig er mál með vexti að ég er alin upp í kaupstað á Höfuðborgarsvæðinu og í þá daga var eiginlega bara ein aðalmatvöruverslun í bænum sem var á þeim tíma rekin af mjög röggsömum og duglegum kaupmanni. Annað sem kannski þarf að koma fram er að þetta var fyrir svona ca 25 árum síðan og þá var vöruúrval ekki það sama og í dag.

Við sitjum þarna við matarborðið í byrjun desember ég, bræður mínir tveir, mamma og pabbi. Pabbi segir svona í fréttum að það sé kominn kalkúnn í búðina. Mamma segir svona með aðdáunartóni já hann er alltaf svo flinkur hann .... og kemur með svona nýjungar í verslunina. Þá kemur svona upp úr öðrum bróður mínum já og þeir eru lifandi! Mamma varð svolítið hissa, en trúði öllu enn, svo fóru þeir að spinna bræður mínir og pabbi, það var hægt að kaupa kalkúninn lifandi og svo yrði hann geymdur fram á aðfangadag, já það var líka hægt að heilsa uppá kalkúninn því hann væri merktur með hálsól þar sem stæði nafn eigandans og maður gæti farið og gefið honum að éta osfrv. osfrv. við vorum farin að grenja úr hlátri en mamma var alltaf jafntrúgjörn, það var ekki fyrr en þeir sögðu að maður gæti fengi að vera viðstaddur slátrunina að mamma fattaði loksins í hvers konar vitleysu við værum komin!!

En þessi saga er alltaf sögð þegar við borðum kalkún og það verður örugglega ekki breyting á því á laugardaginn.

Hafið það gott.

Jólaundirbúningur

Jæja nú fer að líða að jólum. Er eitthvað voða lítið í jólaskapi, ég vildi bara að það væri einhver annar árstími. Mér finnst líf mitt ennþá vera í svo miklum ólgusjó og stundum næ ég landi og stundum ekki! Þið skiljið mig kannski ekki það er svo sem ekki von ekki geri ég það :-\ Þetta eru víst ekki svo óalgengar pælingar þegar fólk er svona nýfráskilið og ekki skilið eða illa misskilið æji ég veit það ekki alveg.

En spurningin er hið alræmda Aðfangadagskvöld!! Hvernig eigum við að hafa þetta? Eigum við að vera saman barnanna vegna (og eiginlega okkar vegna, ég held að við vildum það bæði þó það sé asnalegt eins og staðan er), eigum við að vera í sundur stórfjölskyldunnar vegna eða hvað?? Jæja að öðrum pælingum.

En hinum árlega piparkökubakstri er lokið og það var auðvitað svaka gaman eins og venjulega. Svo er hin árlega kalkúnaveisla "a la pabbi" á laugardaginn og hlakka ég mikið til. En það hófst þannig að foreldrar mínir gerðu það til skamms tíma að árlegum viðburði að bjóða okkur börnum og tengdabörnum (bara fullorðnir) í kalkúnajólahlaðborð í Argentínu. Það var mjög gott en svo fengum við einhvern tímann borð kl. 18:00 og þurftum eiginlega að fara út um 9 leytið því borðið var tvíbókað og þá fórum við heim til mömmu og pabba í koníak og líkjör og það var svo gaman hjá okkur að það var ákveðið að hafa þetta bara heima næst!! Þá væri hægt að drekka eins mikið rauðvín og maður gat í sig látið án þess að hafa áhyggjur af reikningum (eins og það hafi verið eitthvað "issue")og sitja eins lengi og maður vildi án þess að fá stressaða þjóna yfir sér. En síðan hefur þetta verið heima hjá mömmu og pabba, og enginn hefur minnst á Argentínu síðan, enda er kalkúnninn hans pabba eiginlega bara miklu betri heldur en hjá snillingunum á Argentínu!

Ég verð eiginlega að segja ykkur eina stórkostlega sögu af okkur fjölskyldunni tengt kalkúnum! Geri það næst.

Köben

Jæja

Þá er maður loksins búin að fara "heim" til Köben. Það er ótrúlegt hvað maður er enn sleipur í dönskunni þrátt fyrir 10 ára hlé. Við mættum þarna og fórum inn á þetta fína farfuglaheimili. Get sko alveg mælt með því kostar skít og kanil. Danhostel og er staðsett á H.C. Andersen boulevard bara í miðbænum.

www.danhostel.dk

Við vorum saman í 6 manna herbergi, herbergin stór hrein og ágætis bað sem fylgdi með. Pottþétt að maður fer aftur þarna ef maður þarf á gistingu að halda í Köben.

Jæja, íbúðin sem tengdó fékk svo á föstudeginum var alveg frábær, í Christianshavn, í göngufæri við strikið og miðbæinn. Ég leigði svo bíl á föstudeginum til að rúnta svolítið um gamlar slóðir og það var rúntað upp í Herlev, Kagså, Lyngby og DTU, allt okkar heimaslóðir. Við heimsóttum leikskólann og þar var enn að vinna einn starfsmaður síðan sonurinn var þarna fyrir 10 árum. Þetta var æðislegt og svo á að fara að sýna Pyrus "Alletiders nisse" sem jóladagatalið í ár en það var einnig sýnt fyrir uþb. 10 árum síðan, við eigum diskinn með tónlistinni og allt!!

Tíminn stendur í stað!! Stundum, auðvitað hefur sumt breyst en samt, maður fílaði sig soldið eins og kominn heim.

Loksins.

Börn

Jæja, alltaf bloggar maður um það sem stendur manni næst en það eru börnin. Sú stutta var alsæl með bíómyndina sem mamma keypti í "útlandinu". Reyndar var hún ekki keypt í "útlandinu" bara hjá honum Leifi Eiríkssyni en það er nú aukaatriði. Svo tilkynnti hún mér það að það væru allir soldið lasnir og veikir í leikskólanum þau væru með "kubbuhest". Forvitnilegur hestur það!! En hún væri nú bara svolítið
"hóstalasin".

Svo er það morgundagurinn, loksins rennur hann upp, en þá er ég að fara með "fyrrverandi" tengdó til Köben og tek unglingana með. Ég held að þetta verði frábær ferð, en þetta verður svona soldil pílagrímaferð fyrir mig. Ég bjó nefnilega í Köben fyrir allmörgum árum eða nánar sagt næstum 11 árum og bjó ég þá í 3,5 ár þar. Þótt ég sé búin að fara víða síðan hef ég ekki komið til Köben síðan 1996!! Váá. Ég er líka búin að leigja mér bíl á föstudaginn og nú skal sko rúntað á gamlar slóðir, kíkja á kollegíið, Lyngby storsenter ef það er enn til staðar og kíkja á skólann. Ég hlakka svo til. Svo á auðvitað að rölta strikið og kíkja í Tívolí. Ég segi ykkur frá Köbenferðinni þegar ég kem aftur.

blogg kveðjur

Róm-Rome-Roma

Vá, ég var í þessari stórkostlegu borg, Róm rokkar eins og unglingarnir segja. Ég hef reyndar komið þarna einu sinni áður en þá náði maður einhvern veginn ekki utan um þetta allt saman. Þetta er allt svo stórt og mikið og yfirskreytt að listaverkin týnast í fjöldanum. En þvílík borg. Við vorum líka hrikalega heppin með veður á meðan allt fraus hér heima sátum við í 20°C stiga hita og sötruðum rauðvín og bjór, bara frábært.

Ég fór einnig til Pompei þar sem dóu einhver þúsund manna fyrir tæplega 2000 árum þegar Vesúvíus gaus sínu fræga sprengjugosi og eitraðar gufur drápu allt sem fyrir varð. Það er svolítið skrítið hvað minni manna er stutt, ef það yrði svona gos í dag þá búa rúmlega 3 milljónir manna á hættusvæði. Svo var annað sem mér fannst svolítið athyglisvert, það var það að í Róm til forna voru embættismenn kosnir með árs millibili þannig að menn urðu að standa og falla með því hvort þeir hefðu nú staðið við öll kosningaloforin. Hér heima er kosið á 4ra ára fresti og er það örugglega gert að ásettu ráði því á fjórum árum gleymir almenningur hverju var lofað og hverju ekki!! Come on! er þetta ekki allt eitthvað "norskt" samsæri.

Jæja ég á örugglega eftir að blogga um kosningar þega nær dregur því ég er mikil áhugamanneskja um það sem gerist í samfélaginu þó ekki sé ég á leiðinni í stjórnmálin, allavega ekki enn.

Jæja nóg úr rauðvínsmarenaða hausnum mínum í bili!!

"Nýja húsið!!"

Jæja, þá er maður fluttur með allt gengið.
Svona er þetta bara, sú stutta var nú ekki alveg sátt í síðustu viku og sagði að nýja húsið væri ljótt og hún vildi bara fara í húsið sitt í Mosó. Við reyndum að útskýra fyrir henni að nýja húsið væri líka í Mosó en það var hún nú ekki alveg að kaupa. Svo gisti hún hjá ömmu og afa á meðan flutningarnir stóðu sem hæst og fékk svo að skoða "gamla húsið" alveg tómt. Svo sá hún að allt dótið sitt, og þá segi ég sko "allt" dótið; var komið í "nýja húsið" og þá var þetta bara allt í lagi. Það fyndna var svo þegar hún spurði hvort hún færi svo í leikskólann. Æji maður fattar ekki alveg allt sem fer fram í höfðinu á þessum krílum, mín var þá þjökuð af áhyggjum yfir því að nú fengi hún ekki að fara oftar í leikskólann sinn. Ég sem hélt að ég væri að láta þennan skilnað hafa sem minnst áhrif á börnin mín og þau halda öll sínu gamla umhverfi þó að ég myndi persónulega vilja flytja sem lengst í burtu frá þessu öllu saman!

Lífið heldur áfram.

Flutningar

Jæja, nú er allt á fullu að flytja "familiuna" þ.e. mig og börnin, kallinn fer annað. Reyndar er tengdapabbi aðal kallinn í flutningunum, hann stjórnar þessu harðri hendi og hann getur eiginlega bara unnið með kallinum mínum fyrrverandi svo þetta þýðir það að þeir sjá eiginlega um þetta. Bræðrum mínum og föður finnst þetta svolítið asnalegt að þeir séu þarna með tögl og haldir en svona er þetta bara og mér líður svo sem ekkert illa með þetta, finnst þetta bara fínt. Það er spurning hvað maður gerir næst þegar maður flytur, kannski hringir maður bara í fyrrverandi!!

París

Jæja, þá er ég búin að vera í Frakklandi,

Frétti það að síðasta helgi hefði verið kaldasta ágústhelgi í París síðan mælingar hófust. Heppin!!

En jæja veðrið hefði kannski mátt vera betra en frekar vil ég 15°C og rigningu en yfir 30°C. Maður gerir ekkert í svoleiðis hita. Ég komst loksins í hinn fræga Disneygarð og uppí Eiffel turninn. Þetta er í 4 skipti sem ég kem til Parísar og ég hafði aldrei komist upp í turninn við komumst reyndar ekki nema á 2 hæðina sem er í rúmlega 100 m hæð þar sem sú þriðja var lokuð vegna rigningar. Ég hef heldur ekki farið inn á Louvre safnið ;) svo það er greinilega hægt að gera ýmislegt í París annað.

En ég er strax farin að hlakka til að fara aftur til Parísar hvenær sem það nú verður, mér finnst þetta æðisleg borg.

Pælingar

Kannski maður reyni að blogga soldið oftar hér, þá eru allavega meiri líkur á að fólk nenni að lesa hjá manni þessar pælingar sem settar eru á blað eða ekki þ.e. á tölvuskjá.

Ég reyndi að taka ákvörðun í gær, ég ætla ekki að hugsa um það að kallinn vilji kannski koma heim.

Þið megið ekki miskilja mig, ég vil auðvitað fá hann heim, allavega ennþá, en hann er bara svo ruglaður þessa dagana. Svo gengur heldur ekki að byggja okkar samband upp núna, við erum bæði í tilfinningalegri rúst og verðum bæði að taka okkur saman í andlitinu. Einnig þurfum við að standa bæði á eigin fótum áður en hugsanlega væri hægt að gera eitthvað í því að reisa sambandi við.

Það eru ýmsir hlutir sem hann þarf að gera áður en hægt er að hugsa um það og hvað þá tala um það að hann sé á leiðinni heim og hann virðist bara ekki hafa sig í þá. Ég veit ekki alveg hvað er að honum, það virðist vanta bein í nefið á honum, hann þorir ekki. Ég trúi því bara ekki að hann sé svona mikill aumingi og gunga!!

En allavega ef ég næ mér ekki upp úr þessari lægð og það með hraði er ég komin á sama stað og ég var í ágúst í fyrra sem er ekki æskilegur staður. En þá væri ég aftur bara farin að bíða eftir því að hann geri eitthvað og taki einhverjar ákvarðanir, sem hann virðist vera algjörlega óhæfur til að gera. Hvað varð eiginlega um manninn minn??

jæja nóg í bili.

Sumarfrí

Sumarfríið. Ég er búin að selja húsið, góð sala, sem er mjög gott þar sem sumar fasteignir eru búnar að vera á sölu mánuðum saman, allavega í mínu bæjarfélagi.

Jæja ég keypti mér líka íbúð, fékk eina rosa flotta sem er 4ra herbergja en teiknuð sem 5 herbergja, 105 fermetrar. Vonandi að maður nái að troða sér í hana, var mikið að spá í að loka 4ja svefnherberginu, en ætla aðeins að bíða með það íbúðin er mjög flott eins og hún er og stofan verður heldur lítil ef ég loka herberginu. Kemur í ljós hvað maður gerir!

Jæja en ég er búin að fara í 2ja vikna sólarlandaferð, ég og börnin auk stórfjölskyldunnar, var búin að hlakka mikið til og varð sko ekki fyrir vonbrigðum eina sem truflaði mig var að ég saknaði karlsins. Við erum auðvitað skilin en samt, það vantaði hann soldið þarna úti þegar maður er í svona miklum samvistum með fjölskyldunni.

Svo heldur maður enn í vonina að hann eigi nú kannski eftir að sjá að sér og koma til baka, allavega er ég ennþá tilbúin í að reyna það. En ég held að ég eigi eftir að sjá hlutina í öðru ljósi þegar ég verð komin í mína eigin íbúð, þar sem hann verður ekki með lykla eða föt í fataskápnum. En í dag er þetta allt svolítið asnalegt, hann er á hálfgerðum hrakhólum og allt dótið hans er enn heima hjá okkur þannig að hann kemur til okkar og setur í þvottavél, nær sér í ný föt, sængurföt og handklæði, einnig er hann meira og minna hjá okkur núna þegar hann er í fríi og skottið er líka í fríi í leikskólanum. Við erum líka byrjuð að pakka og taka til í bílskúrnum og einhverjum skápum. Auðvitað eitthvað sem var löngu orðið tímabært en hafði ekki verið komið í verk. Þannig að í dag er þetta eins og venjuleg fjölskylda, nema hann sefur ekki heima hjá okkur!! Við erum auðvitað klikkuð!!

Jæja svo er maður aftur á leiðinni til útlanda, nú ætla ég að vera fararstjóri með íþróttahóp og verðum við í viku ég og sonurinn. Hlakka heilmikið til, þetta eru svo frábærir krakkar og þjálfarar.



Svo tók maður smá test svona að gamni. Ég er eiginlega farin að hallast að því að ég sé bara soldið spes og það sé bara heilmikið varið í mig. Allavega miðað við öll þessi próf sem maður er að taka og þetta er allt á jákvæðu nótunum.

Jæja takk fyrir kommentin, það er alltaf gaman að vita af því að einhver les síðuna manns, þó hún hafi kannski í upphafi átt að vera leið fyrir mig til að vinna í mínum málum.

The Sweetie
Congratulations! You scored 80%!

You tend to be very sweet and kind. (atleast deep down inside) You know there is more to people than what's on the outside. You also like to have a little fun. Many of you could be consider "the perfect girl" to us nice guys. Good Job!

Börnin

Jæja eins og hjá flestum foreldrum sem eiga börn á grunnskólaaldri er oft búið að skipuleggja helgarnar fyrir mann. Þ.e. ef börnin eru í einhverjum íþróttum eða tómstundum. Þannig fór það um þessa helgi. Sonurinn var að keppa á Aldursmeistarmóti íslands í sundi (AMÍ) í Reykjanesbæ um helgina. Þetta eru skemmtilegustu sundmót ársins og fer allur veturinn í það að ná lágmörkum til að fá að keppa á mótinu. Allavega var ég þarna alla helgina að dást að mínum dreng og hinum börnunum og unglingunum sem sýndu þarna listir sínar.

Þetta er ótrúleg elja að synda og synda, minn æfir 6 sinnum í viku og tekur hver æfing ef maður tekur tímann sem fer í sturtu, heita pottinn og í það að koma sér á æfingu og heim aftur u.þ.b. 3 tíma!! það gera 18 tímar á viku sem er næstum hálf vinnuvika. Það er von að þessir krakkar eigi kannski ekki mikið líf eftir skóla og æfingar. Það eru syntir nokkrir kílómetrar á æfingu þannig að næg er brennslan. Allavega er ekki til gramm af fitu á syni mínum og oft er orkan alveg búin líka, það er svolítið erfitt að vera að stækka og þroskast fyrir utan orkuna sem fer í íþróttina.

En það er líka gaman þegar farið er á svona stórt sundmót og þau uppskera eftir allt erfiðið. Það er ef það verða bætingar. Þær voru nú ekki miklar hjá okkar liði og viðurkenndi þjálfarinn að hann hefði sennilega misreiknað sig eitthvað aðeins og þau yrðu örugglega frábær um næstu helgi þegar keppt verður á bikar.

Ég held nú að minn hafi samt verið bara nokkuð ánægður með helgina.

með klórkveðjum

Þungir þankar

Jæja

Þá er runninn upp "stóri dagurinn" við göngum frá skilnaði að borði og sæng í dag. Mér líður ekkert vel með þetta, það er loksins að settlast inn að ég sé að missa manninn minn! Ég verð auðvitað ekkert laus við hann við eigum þessi börn saman og við komum til með að vera í miklum samskiptum við hvort annað í framtíðinni. Er það ekki bara verra??

Maður spyr sig, þegar hann verður kominn með viðhaldið upp á arminn sem sína konu og fer að birtast með hana á opinberum vettvangi. Mér hryllir við tilhugsuninni, á maður ekki bara að flytja til útlanda til að losna við þetta lið. En nei, nei, ég kem örugglega til með að kaupa íbúð í sama hverfi og þau barnanna vegna. Rekast á þau í Bónus og sundlauginni!!

Æji, mér liður illa.

Ferlið

Jæja, næg verkefni svona í þessu ferli sem við erum í.

Fengum fasteignasala í heimsókn í fyrradag, ágætis kunningi okkar og hann sagði að skilnaðir héldu hjólum efnahagslífsins gangandi. OK. Það er nefnileg þannig ef hjón skilja kemur yfirleitt út úr því, ein sala hjá fasteingasalanum og tvö kaup, reyndar í þessum skilnaði eru það tvær sölur og fjögur kaup en það er nú önnur saga!! Jæja svo kostaði það uþb. 30% meira að reka 2 heimili heldur en eitt þannig að þetta skilaði sér sko út í þjóðfélagið.

Niðurstaðan er sú að ég er að skilja til að halda hjólum efnahagslífsins gangandi. Flott hjá mér.

Svo fórum við til prestsins í gær, presturinn er fínn. Það er örugglega próf í því í guðfræði hvað menn eru góðir í mannlegum samskiptum, þeir eru ótrúlegir þessir menn og ekki gleyma konur sem eru í þessu starfi. Enda deila þeir gleði- og sorgarstundum með fólki daglega.

Jæja en við fengum vottorðið sem þarf að sýna hjá sýslumanni í næstu viku þegar við förum þangað.

Life goes on!

20 ára stúdent og enn ung!

Já, það er víst,

Ég fór um daginn á svona 20 ára stúdent "reunion" alveg ótrúlega gaman. Nú var minn bekkur soldið spes við vorum mjög samhent en soldið mikið bara fyrir okkur vorum ekkert að mingla allt of mikið við restina af árgangnum, áttum bara nóg með okkur. En það var svo gaman að hitta bekkinn og ég segi ykkur það að það var 83% mæting í okkar bekk!! En það var líka svo gaman á endurfundunum, að það kjaftaði af manni hver tuska. Maturinn kom 2 tímum of seint og var kaldur en það skipti ekki máli við drukkum bara meira rauðvín í staðinn. Svo var dansað við gömlu diskólöginn, því eins og aldurinn segir til um þá vorum við í menntó á diskótímabilinu, dansinn dunaði svo fram á nótt ég held að klukkan hafi verið rúmlega fjögur þegar slökkt var á græjunum og ljósin kveikt. Það sem kom manni kannski mest á óvart var hvað stelpurnar eru enn miklar skvísur og strákarnir töffarar, liðið hafði breyst ótrúlega lítið. Strákarnir flottir ekki með bumbu og skalla, og þeir sem voru með það, báru það bara ótrúlega vel. Stelpurnar voru sko bara flottar!!

jæja, lífið heldur áfram

Frídagar og skilnaðir

Þessir dagar eru pínu erfiðir. Ég sé fram á að vera að skilja, ég sem var svo bjartsýn í síðustu viku, hélt að kallinn væri að sjá ljósið og "afruglast" en svo er víst ekki og nú er búið að panta tíma hjá Sýslumanni.

Ég er frábærlega sett og get alveg talað um þetta við alla, þ.e. vinnufélaga og fjölskyldu að því leyti er ég betur sett en margar og allir eru með góð ráð sem flest hljóða uppá það að ég sé svo frábær manneskja og hann sé búinn að fara svo illa með mig að ég eigi nú bara ekki að láta bjóða mér uppá þessa framkomu og halda áfram með lífið.

Þetta er nefnilega auðveldara að segja en gera, hvernig pakkar maður 19 árum já 19 árum ofan í kassa og segja bara þetta er búið haltu áfram?

Ég veit að ég verð ekki í vandræðum fjárhagslega er í ágætri vinnu og ekki með neina pakka á bakinu, ég veit líka að ég get örugglega náð mér í annan kall svona flott og frábær sem ég er! En samt, þessi tengsl eru ótrúlega sterk, fullt af hans fjölskyldu eru góðir vinir mínir, tengdaforeldrarnir eru frábærir og allt!

Ég er kannski að láta þetta vaxa mér um höfuð. En það þarf að selja draumahúsið, húsið sem við ætluðum að eiga þangað til börnin væru farin að heiman, það þarf að skipta upp eigunum, hvað er mitt og hvað er þitt? Við erum búin að vera saman það lengi að það eru engar einkaeigur, bankareikningarnir, visakortinn, það er allt sameiginlegt!

Samskiptin við börnin, hann tók litla skottið og leyfði henni að gista hjá sér aðfaranótt fimmtudags, ég fór með stóru börnin í bíó sáum "Da Vinci Code" ég saknaði litla skottsins framan af degi í gær.

Hún sagði við pabba sinn, "Hvar erum við þetta er ekki heima hjá okkur!" Svo þegar pabbi hennar var að pakka sænginni hennar í gærmorgun, fór hún að rúlla upp sænginni hans pabba til að taka með heim!!

Frídagarnir eru verstir, það er bara þannig að virkir dagar eru svo fullir af verkefnum að maður dettur ekki í neina þvælu maður fer bara í gegn um daginn en svo koma frídagarnir og þá er best að hafa fullt að gera.

Í gær fór ég eldsnemma að heiman vann í rúman klukkutíma, tók mig svo til og hjólaði inn í Grafarvog að Egilshöll, taldi allar flöskurnar í bílskúrnum og fór með í Sorpu, tók blaðabunkann og sorteraði fór líka með blöðin í Sorpu, þreif annað baðherbergið þurrkaði af í stofunni, fór í búð, las öll blöðin í ræmur, leysti 3* SUDOKU í Mogganum, bjó til Lasagna og horfði svo á eina mynd í DVD og þessu náði ég öllu fyrir kvöldmat!!

Jæja nóg í bili.

Munið svo að kjósa rétt á morgun!!

Kíló og markmið.

Jæja,

Loksins hafðist það, þ.e. þetta með kílóin og markmiðin.

Fór undir fyrsta þrepið.

Annars allt í smá mínus, maður er í þvílíkum rússíbana tilfinningalega þessa dagana. Svo líða dagar og vikur og maður siglir þetta áfram. Ég og kallinn fórum til ráðgjafa áðan, mér líst mjög vel á hana, gott að tala við hana. En við erum ekki í þessu með sama markmiði. Ég vil að þetta hjónaband lifi en hann ekki eða þannig. Hann er að senda svo misvísandi skilaboð að það hálfa væri nóg og alltaf fell ég fyrir því og held að hann sé nú að átta sig.

Ég hef engar áhyggjur af því að ég eigi ekki eftir að reddast fjárhagslega, ég hef heldur ekki áhyggjur af því að ég eigi ekki eftir að eignast annan kall, en mér finnst þetta bara óþarfi þegar ég elska minn kall og er alveg viss um það að ég yrði ekkert hamingjusamari með nýjan. Þar að auki þyrfti maður að díla þetta með stjúptengsl og pabbahelgar skipta jólum, páskum, sumarfríum. Mér finnst þetta bara ömurlegt!!

Ömurlegt!

Your Life Path Number is 9

Your purpose in life is to make the world better You are very socially conscious and a total idealist. You think there are many things wrong with the world, and you want to fix them. You have a big idea of how to world could be, and you'll sacrifice almost anything to work towards this dream. In love, you can easily see the beauty in someone else. And you never cling too tightly. You are capable of great love, but it's hard for you to focus your love on one person or relationship. You have a lot of outward focus, and you tend to blame the world for your failures. You are often disappointed by the realities of life - it's hard for you to accept the shortcomings of the world.

What Is Your Life Path Number?

Your Birthdate: January 5

You have many talents, and you are great at sharing those talents with others. Most people would be jealous of your clever intellect, but you're just too likeable to elicit jealousy. Progressive and original, you're usually thinking up cutting edge ideas. Quick witted and fast thinking, you have difficulty finding new challenges. Your strength: Your superhuman brainpower Your weakness: Your susceptibility to boredom Your power color: Tangerine Your power symbol: Ace Your power month: May

What Does Your Birth Date Mean?

You Are 60% Open Minded

You are a very open minded person, but you're also well grounded. Tolerant and flexible, you appreciate most lifestyles and viewpoints. But you also know where you stand firm, and you can draw that line. You're open to considering every possibility - but in the end, you stand true to yourself.

How Open Minded Are You?

You Belong in Dublin

Friendly and down to earth, you want to enjoy Europe without snobbery or pretensions. You're the perfect person to go wild on a pub crawl... or enjoy a quiet bike ride through the old part of town.

What European City Do You Belong In?

Vigtin og skilnaðir

Jæja, loksins þorir maður að koma hér inn með nýjar vigtunartölur, þetta er búið að vera ferlega lélegt hjá mér, en er að vona að ég sé að komast í gang aftur, ekki veitir af núna þegar maður er að verða "single". Já þið lásuð rétt, kallinn tók pokann sinn og fór síðastliðinn föstudag. Eftir situr maður lítill og sár.

Mér finnst reyndar að þetta sé skárra og skárra eftir því sem dagarnir líða, þetta verður kannski orðið bara allt í lagi svona árið 2010! Jaaá en bara kannski.

Ég ætlaði nú ekkert að fara að rekja söguna hér, enda kannski einhverjir sem lesa þetta hérna sem þekkja hana.

En eitt skal ég segja ykkur það er hrikalegt fyrir "egóið" að vera skilinn eftir fyrir aðra konu. Skora á ykkur strákar og stelpur að láta framhjáhald og daður alveg vera ef þið eruð í föstu sambandi!!

kv.
ein sár og svekkt.

Hvaða grænn ert þú?

You Are Olive Green

You are the most real of all the green shades. You're always true to yourself. For you, authenticity and honesty are very important... both in others and yourself. You are grounded and secure. It takes a lot to shake you. People see you as dependable, probably the most dependable person they know.

What Color Green Are You?

Smá hugleiðing um "átak" og blogg

Jæja, nú er maður búin að segja kallinum frá blogsíðunni, þá er nú eins gott að hafa eitthvað bitastætt á henni. Eitthvað svona skemmtilegt til að fólk nenni að kíkja á þetta hjá mér. Það eru skemmtilegu síðurnar sem fólk skoðar aftur og aftur en þær fúlu gleymast bara og maður nennir ekki að kíkja á þær aftur.

Ég er svona að reyna að koma sér í gírinn með matarræðið. Blessaða átakið gekk ekkert of vel þarna síðustu vikurnar fyrir páska svo kom París og svo páskar. Nú þarf að taka á því.

Ég geri það svona einstaka sinnum að skoða blogsíður hjá svona kerlingum eins og mér sem eru í átaki. Það veitir manni mjög mikinn innblástur og ég er svona að gera mér grein fyrir því að þetta er auðvitað ekkert átak heldur á þetta að vera lífstílsbreyting. Vonandi að það takist hjá mér. Það er engin vigtun í þessari viku og var heldur ekki í þeirri síðustu, það er svona að vera með vigtunardaga á fimmtudögum.

bloggumst

Páskar

Jæja, þá eru þeir afstaðnir, þvílíkt, hver fann þetta súkkulaðieggjaát upp eiginlega, sælgætisframleiðendur eða hvað??

Jæja, kílóin hlaðast upp í stað þess að tínast í burtu, en svona er þetta fyrst París með sínum góða mat og víni og svo páskar.

Ég hætti mér nú ekki í vigtun fyrr en í fyrsta lagi í næstu viku það er alveg á hreinu og nú er bara að halda sig á mottunni og við rétta fæðið.

Gangi mér vel.

1. apríl

Afi minn á afmæli 1. apríl, alltaf í gamla daga voru aprílgabb í hádegisfréttunum, Mogganum, Alþýðublaðinu og Tímanum aðalumræðuefni afmælisins og svo biðu allir spenntir eftir 8 fréttunum á RÚV til að sjá hvað þeim hafði dottið í hug. Í dag kafna aprílgöbbin í öllum þeim fjölmiðlum, netsíðum ofl. sem í boði eru.

Ég hef svo sem aldrei hlaupið apríl svo ég muni, kannski verið send á milli herbergja en aldrei neitt alvarlegra en það.

Vigtoría og vínsmökkun!!

Ég er ferlega svekkt útí sjálfa mig. Ég er svoleiðis komin af strikinu þessa dagana, fæ mér bara súkkulaði ef mig langar í, nenni ekki þessu grænmeti öllu saman og þetta kom svoleiðis niður á vigtinni í gær. Hafði þyngst um 600 g. mér sýndist reyndar á vigtinni heima að ég hefði lést um ca 300 g!! En ég verð þá bara að bíta í það súra epli, svo á morgun er nýr dagur og þá tek ég mig á.

Það voru tveir að koma frá útlöndum í vinnunni og hér hefur skapast hefð fyrir því að ef einhver fer til útlanda hvort sem það er skemmtiferð eða vinnuferð þá kemur hann með einn konfektpoka handa hinum sem ekki fóru neitt. Þetta þýðir semsagt að á kaffistofunni eru tveir yndislega freistandi súkkulaðipokar og maður er auðvitað dottin í þá!!

Jæja, á eftir er ég svo að fara í skoðunarferð upp á Grundartanga, svona vinnutengt og ég veit að það verður boðið uppá eitthvað girnilegt í ferðinni þannig að það er spurning um að fresta öllu þar til á morgun!!

Kannski passa sig soldið en ég veit að ég borða allavega ekki mikið grænmeti í ferðinni og svo er það nammibindindi á morgun. Jæja svo er maður að fara til Parísar á miðvikudaginn og ég veit að það verður farið gott útað borða og drukkið svolítið rauðvín með maður verður nú að leyfa sér eitthvað!!

Þegar ég heyri minnst á Frakkland og rauðvín dettur mér alltaf í hug þegar ég fór í vínsmökkunarferð til Frakklands, ólétt!! Já, já, maður var á ráðstefnu, vinnutengt, í París sem var alla vikuna svo var farið á föstudagseftirmiðdegi til Dijon, þið kannist við sinnepið, í Búrgúndi héraði og við tók 2ja daga sæla í mat og drykk. Frakkinn sem skipulagði fréttina er algjör "gourme" kall það var sko þríréttað a.m.k. bæði í hádeginu og á kvöldin og þegar ég tala um þríréttað þá var líka þrívínað, þ.e. svona sætt vín með forréttinum, svo hvítvín og rauðvín. Svo voru skoðaðir vínbúgarðar, munkaklaustur og fleira, borðað á þvílíkum veitingastöðum. Mín auðvitað ófrísk ekki komin nema 10 vikur á leið og með í för var yfirmaður minn í vinnunni. Ég var ekki búin að segja neinum að ég væri ófrísk og svo var ég þarna í ferðinni dreypandi á rauðu og hvítu víni, allt í þvílíku hófi kannski ekki nema 1 glas í hvert sinn ef það náði því, með þvílíkt samviskubit. Ég var svo kölluð K.... kók þegar ferðinni lauk og frakkinn hlær alltaf þegar hann sér mig og spyr hvort ég sé enn að drekka kók!! Ég er að fara hitta hann á föstudaginn í París, hann skipuleggur þennan hádegisverð sem ég er að fara í.

Sko það er svo skrítið með þetta sem má og ekki má þegar maður er ófrískur. Nú á ég 3 börn. Það elsta er orðið 15 ára og þá var talað um að áfengi væri ekki æskilegt en eitt og eitt glas gæti nú ekki skaðað. Núna 12 árum seinna þegar ég var ófrísk af 3 barninu mínu er talað um að allt áfengi alltaf sé á bannlista!! Hverju á maður að trúa. Ég var nú dauðadrukkinn þegar ég uppgötvaði að ég væri ófrísk af frumburðinum og var þá gengin 8 vikur en hætti auðvitað að drekka um leið en ég fékk mér nú einn og einn bjór eða eitt og eitt rauðvínsglas við tækifæri þó þau væru nú ekki mörg. Hann er bara allt í lagi!!

kv.

Paris here I come

Jæja, maður er bara að fara til Parísar. Þetta var svona soldið "surprise", ég fer eftir rúma viku.
Málið er að mamma er búin að vera í París síðan um miðjan feb. og pabbi með henni. Hann kom reyndar heim í 2 vikur en fer aftur á sunnudag. Ég er búin að vera að hugsa um að skella mér í heimsókn til mömmu, en svo bauðst mér óvænt að fara í næstu viku á vegum vinnunnar þannig að ég skellti mér bara verð hjá m+p og gisti þar í svefnsófa í stofunni.
Verður örugglega frábært, ég hef ekki komið til Parísar síðan 2002 en það árið fór ég 2svar til Frakklands, svo fór ég 1999 til Parísar með vinnunni.

Jæja, ég varð bara að segja ykkur þetta ég er svo spennt. Það er svosem ýmislegt í gangi heima þessa dagana en ég nenni ekki að blogga um það, þetta skýrist vonandi allt. Allavega sagði stjörnuspáin mín í Mogganum í dag að þolinmæði og þrautsegja væru dyggðir. Þannig maður verður að trúa því og vera þolinmóður.

Matarræðið allt í rúst, ég er í nammikasti þessa dagana, svo ég hálfkvíði fyrir vigtinni á fimmtudag. :-((

Svona er lífið.

Vigtoría ekki vinkona mín

Jæja, stóri dómur fallinn.

Ég þyngdist um 500 g. þessa vikuna, mér finnst samt eins og vigtin heima sé enn að síga. Kannski búin að standa í stað þessa vikuna.

Þetta er auðvitað bara mér að kenna, barnaafmæli og saumó allt í sömu vikunni. Þó ég hafi gætt hófs í áti, þá er þetta samt sykur og þess háttar. Jæja ekkert að gefast upp held bara áfram ótrauð, maður má ekki láta smá bakslag slá sig útaf laginu. En á morgun er djamm í vinnunni þannig að ekki lækkar vigtin í næstu viku, ég ætla nefnilega að fá mér aðeins í glas. Mér finnst ég alveg eiga það inni eftir þessar erfiðu vikur.

Þegar ég á við erfiðar vikur er ég ekki að meina matarræðið heldur aðrir hlutir sem koma kannski seinna hér þegar ég hef hugrekki til.

Annars er ég yfir mig montin mamma þessa dagana. Ég á svo frábæra krakka. Sonurinn 15 ára er kominn í unglingalandsliðið í sundi og er að fara í æfingabúðir um helgina. Svo á ég líka þessa frábæru dóttur í 7. bekk sem er að keppa í stóru upplestrarkeppninni, komin í úrslit úr sínum skóla og á að keppa í bæjarleikhúsinu í kvöld.

Upp fyrir þessum meiri háttar krökkum sem ég á!!

Hvernig árstíð ertu

You Are Winter!

Intelligent Serious Cozy Calm Shy

What Season Are You?

Já ég er vetur, það passar ágætlega við mig, ég er nefnilega líka vetur í litgreiningu.

Sukkvika

Úff!!

Þetta er nú ekki alveg í lagi. Nú missti ég 2 kg. í síðustu vigtun og varð ofsa ánægð með það. En hvað gerist svo. Litla skottið á heimilinu átti afmæli á föstudag og á var bökuð kaka, sem ég sem bakarinn þurfti auðvitað að smakka á og svo var fullt hús af gestum í gær og fleiri fleiri kökur á boðstólnum. Reyndar borðaði ég grænmetisskammtinn en eiginlega svo bara kökur (með sykri) í mat. Þannig að í dag er ég að springa úr sykurskorti, keypti mér súkkulaðistykki áðan!! Obbobbobb. Var enga stund að sporðrenna því og er svo að springa úr samviskubiti. Er maður ekki alveg í lagi? Haa.

Jæja en svo er saumaklúbbur í kvöld, ætla að fá mér smá en ég er svo sem ekki vön að missa mig í kræsingum í svona saumaklúbbum en á örugglega eftir að smakka á öllu!! það er bara ég.

Það voru allir að tala um það í gær hvað ég hefði grennst. Fólk er farið að sjá mun!! Svo ætla ég bara að éta þetta allt á mig aftur eða hvað?

Jæja þessar vikur eru ótrúlega erfiðar, það kemur kannski í ljós seinna hvað er í gangi en svona er stundum lífið bara töff.

Þarf að útbúa tómatsúpuna mína í kvöld til að eiga næstu daga.

bloggumst.

Mér finnst alltaf soldið gaman af svona

(x) Drukkið áfengi
(x ) klesst bíl vinar/vinkonu - Telst pabba bíll með?
(x) stolið bíl (foreldranna)
(x) verið ástfangin
(x) verið sagt upp af kærasta/kærustu
(x) faðmað einhvern ókunnugann
( ) verið rekin/n
(x) lent í slagsmálum
(x) læðst út meðan þú bjóst ennþá heima hjá foreldrunum
(x) haft tilfinningar til einhvers sem endurgalt þær ekki
( ) verið handtekin/n
( ) farið á blint stefnumót
(x) logið að vini/vinkonu
(x) skrópað í skólanum
( ) horft á einhvern deyja
( ) farið til Canada
( ) farið til Mexico
(x) ferðast í flugvél
( ) kveikt í þér viljandi
(x) borðað sushi - því miður, ekki gott
( ) farið á sjóskíði
(x) farið á skíði
(x) hitt einhvern sem þú kynntist á internetinu
(x) farið á tónleika
(x) tekið verkjalyf
(x) elskar einhvern eða saknar einhvers akkurat núna
(x) legið á bakinu úti og horft á skýin
(x) búið til snjóengil
(x) haldið kaffiboð
(x) flogið flugdreka
(x) byggt sandkastala
(x) hoppað í pollum
(x) farið í "tískuleik"
(x) hoppað í laufblaðahrúgu
(x) rennt þér á sleða
(x) grátið svo mikið að þér finnst þú aldrei ætla að hætta
(x) svindlað í leik
(x) verið einmana
(x) sofnað í vinnunni/skólanum
(x) notað falsað skilríki
(x) horft á sólarlagið
(x) fundið jarðskjálfta
(x) sofið undir berum himni
(x) verið kitluð/kitlaður
(x) verið rænd/rændur- það var brotist inn í geymsluna telst það með?
(x) verið misskilin/n
(x) klappað hreindýri/geit/kengúru
(x) farið yfir á rauðu ljósi/virt stöðvunaskyldu að vettugi
( ) verið rekin/n eða vísað úr skóla
( ) lent í bílslysi
(x) verið með spangir/góm
(x) liðið eins og þú passaðir ekki inn í/þriðja hjól undir vagni
(x) borðað líter af ís á einu kvöldi
(x) fengið deja vu
(x) dansað í tunglskininu
(x) fundist þú líta vel út
(x) verið vitni að glæp
(x) efast um að hjartað segði þér rétt til
( ) verið gagntekin/n af post-it miðum
(x) leikið þér berfætt/ur í drullunni
(x) verið týnd/ur
(x) synt í sjónum
( ) fundist þú vera að deyja
(x) grátið þig í svefn
(x) farið í löggu og bófa leik
(x) litað nýlega með vaxlitum
(x) sungið í karaókí
(x) borgað fyrir máltíð eingöngu með smápeningum
(x) gert eitthvað sem þú lofaðir sjálfri/sjálfum þér að gera ekki
(x) hringt símahrekk
(x) hlegið þannig að gosið frussaðist út um nefið á þér
(x) stungið út tungunni til að ná snjókorni
(x) dansað í rigningunni
(x) skrifað bréf til jólasveinsins
( ) verið kysst/ur undir mistilteini
(x) horft á sólarupprásina með einhverjum sem þér þykir vænt um
(x) blásið sápukúlur
(x) kveikt bál á ströndinni
( ) komið óboðin/n í partý..
( ) verið beðinn um að yfirgefa partýið
( ) farið á rúlluskauta/línuskauta
(x) hefur einhver óska þinna ræst
( ) farið í fallhlífastökk - nei en þetta er eitthvað sem ég ætla að gera
( ) hefur einhver haldið óvænt boð fyrir þig
(x) búið erlendis
(x) komið til Ástralíu - ég bætti þessu inn sjálf finnst Ástralía eiginlega meira spennandi en Canada
(x) kafað í sjónum

þessi 3 síðustu bætti ég við sjálf.

Ég hef gert alveg rosalega mikið finnst mér. Maður er nú líka kona með reynslu svona komin á fimmtugsaldurinn.

Álag og þyngd.

Jæja, þá er aftur kominn vigtoríu dagur. Fór áðan og var búin að missa 2 kíló! Svaka broskall fyrir mig, en samt ekki því ég veit alveg afhverju ég er búin að missa svona mikið.

Málið er að á föstudaginn krassaði svona trukkur inn í líf mitt! (Sbr. bíómyndina Blóðbönd.). Þetta þýddi auðvitað að ég hafði enga matarlyst og fór engan veginn eftir prógramminu, svindlaði á súkkulaði ofl. ofl. en 2 kíló fóru. Vonandi að það haldist.

Vigtoría í góðu skapi.

Ég fór í vigtun á fimmtudaginn eins og alla fimmtudaga síðan ég byrjaði þetta blessaða átak mitt og vigtoría hafði farið til baka þannig að ég hafði misst 500g. sem er það sama og ég hafði bætt á mig í vikunni fyrr. Jæja, það er þá allavega eitthvað að gerast. Vonandi fer nú vigtin eitthvað niður á fimmtudag.

Í aðhaldi

Ég lenti í svolitlu skrítnu um helgina. Það er einhvern veginn voða mikið álag í gangi, allt í einhverri steik, nánar um það kannski seinna. En það besta við þetta er að ég var svo stressuð að ég hafði enga lyst á mat!

Kommon, ég ekki lyst á mat, detta nú af mér allar dauðar lýs. Ég kom bara ekki nema pínu litlu niður alla helgina. Vigtin fór líka í loftköstum niður held ég hafi verið 1,5 kílóum léttari í morgun heldur en á föstudag. En það er auðvitað ekkert að marka, þetta er bara vatn og svo fór ég líka offari í nammi, sló bara öllu upp í kæruleysi kom ekki niður grænmeti en fékk mér "djúpur" í staðin. Veit einhver hvort það er grænmeti í lakkrís?? Ég veit að súkkulaði er bara grænmeti!!

Jæja það hefur gengið aðeins betur að borða í dag, fékk mér morgunkorn í morgun og djúsglas og kom niður hálfri gúrku og 2 tómötum í hádeginu auk 1 brauðsneiðar. Drakk líka 1 skyr.is drykk. Jæja ég á þá eftir 1 brauðsneið og fullt af öðru dóti í kvöld.

Vonandi fara stormarnir að lægja þarna heima svo matarræðið komist aftur í samt lag.

bloggumst.

YELLOW You are very perceptive and smart. You are clear and to the point and have a great sense of humor. You are always learning and searching for understanding. Find out your color at Quiz Me!

Úpps vigtoría

Jæja, eins og ég bjóst við, ég þyngdist!! Hver er í aðhaldi og þyngist á milli vikna??

Fáránlegt.

Konan brosti til mín og sagði, "þetta er saltkjötið" Oh mér fannst hún geðveikt sæt að segja þetta.

Já,já það myndast svo mikill bjúgur af saltkjötinu öllum 120 gr sem ég borðaði!! Jæja en það má svo sem alveg trúa því.

Svo kom ég upp í vinnu og þá voru stelpurnar á leiðinni út að fá sér súpu og brauð og ég með allann minn sjálfsaga sagði auðvitað "ég með"!! Halló, er ekki allt í lagi heima hjá þér!!

Hundfúl útí sjálfa mig, súkkulaðirúsínurnar og kakósúpuna sem ég borðaði í gærkveldi. Jæja, svindldagur í dag pizza í kvöldmatinn og svo byrja ég á fullu á morgun! Á morgun segir sá lati!!

bloggumst.

Freistingar

Þvílíkar freistingar alls staðar, ég er búin að komast að því að ég hef engann sjálfsaga! Ha, hvað er það?? Ég má ekki sjá neitt nammi eða slíkt og þá er ég fallin. Ég byrjaði voða dugleg í danska og ætlaði bara að drekka 1/2 l. af sykurlausi gosi á dag!! Ég er sko í 2 lítrum veit ekki af því fyrr en ég er búin að demba í mig 1/2 l. og svo fæ ég mér meira og meira!!
Jæja, ég held að vigtoría verði ekkert sérstaklega góð við mig á morgun en það verður að koma í ljós.

Markmið næstu viku verður að minnka gosið!!

Átak

Ég eins og meirihluti þjóðarinnar ákvað það um áramót að taka mig á í matarræðinu. Ég var komin með nóg af sjálfri mér.

Þegar ég og maðurinn minn byrjuðum saman voru 25 kg. á milli okkar en nú eru þau allt í einu orðin 10 og hann hefur bætt þó nokkrum á sig á síðustu árum þó ekki sé rétt að tala um að hann sé feitur mér finnst hann alveg mátulegur. Þá þ.e. fyrir 18,5 árum síðan var ekki hægt að klípa hann það var bara ekkert nema þunn húðin en núna er komið smá lag en ekkert sem hann þarf að hafa áhyggjur af 190 cm langur maðurinn hann er bara fínn.

Jæja en nóg um það ég ákvað að fara í átak og kynnti mér hinn margumtalaða "Danska kúr" sem er auðvitað ekki neinn kúr heldur svona lífstílsbreyting og markmiðið er að ná af sér svona 20 kílóum!

Mér finnst ganga ágætlega að fylgja prógramminu en mér finnst vigtin ekki falla nógu hratt. Ég svindla stundum pínu, t.d. í gær fékk ég mér bollu en það er bara ein bolla! Stundum fæ ég mér í eitt glas eða svo en það er líka bara eitt glas en vigtin er ekki að síga nógu hratt. Mér finnst ég suma daga standa í stað samt eru farin næstum 4 kíló á 1,5 mánuðum og meðaltalið er ekkert slæmt en come on. Maður er alltaf að lesa um konur sem eru að missa á annað kíló á viku!! Hjá mér eru þetta nokkur skitin grömm!!

Jæja en ég ætla nú ekki að gefast upp strax og kannski þarf maður að stofna svona átakssíðu og láta vita af henni til að þetta fari að ganga eitthvað?

jæja meira seinna

Gamlir vinir

Ég átti einu sinni vinkonu. Við vorum svona ekta vinkonur eins og þær gerast bestar, gerðum allt saman. Við gengum nú reyndar ekki svo langt að ganga í eins fötum en næstum því. Við áttum margt sameiginlegt, báðar vorum við frekar sjálfstæðar, ákveðnar ungar konur. Okkur gekk vel í skóla og vorum svona frekar vinsælar stúlkur. Ósköp eðlilegar stúlkur báðar vorum við frekar lágvaxnar í gaggó og svona í saklausari kantinum.

Við fórum nú samt í partý saman og sátum aftan á mótorhjólum vina okkar. Við drukkum nú ekki áfengi á þessum tíma né reyktum en vorum nú samt alltaf með. Við spiluðum bridds!

Hvað gerðist?

Önnur okkar eignaðist kærasta í lok 9 unda bekkjar (það var þegar grunnskólinn var upp í 9 unda bekk en ekki 10 eins og núna)og svo fórum við í sitt hvorn framhaldsskólann.

Við héldum nú áfram þó nokkru sambandi en ekkert eins og áður. Við fórum báðar út sem skiptinemar (reyndar í sitt hvort landið) og fitnuðum um 15+ kíló hvor í sínu landi. Við skrifuðumst á.

Við týndum hvor annarri!!

Meira seinna.

Gleðilegt afmælisár!

Jæja

Þá er enn eitt árið gengið í garð, svakalega líður tíminn hratt. Ég held að þetta verði árið með öllum fertugsafmælunum! Ég tók forskot á sæluna á síðasta ári en allar eða allavega allflestar vinkonur mínar ná þessum áfanga á þessu ári. Ég fékk meira að segja fyrsta boðskortið á nýjársdag!!

Heyr heyr Ragga, en afmælið verður um næstu helgi og ég hlakka sko mikið til.

Ella vinkona í Svíþjóð, bráðum Lúx, átti afmæli í gær, til hamingju Ella!, en hún náði hinum mikla áfanga á síðasta ári. Mér verður oft hugsað til þess er við héldum stóru þrítugs-afmælisveisluna í "sentrinu" á Kagså kollegiinu fyrir 11 árum síðan, þvílíkt fjör og fjöldi ég held að gestirnir hafi verið á annað hundraðið, enda ekki hægt að skilja neinn útundan í svona "Íslendinganýlendu"!!

Mér sýnist afmælið hjá Röggu ætla að vera mikið fjör ég held að þetta séu á þriðja tug kvenna á miðjum aldri sem ætla að sitja saman og njóta góðs matar og drykkjar í frábærum félagsskap.


Jæja nóg í bili

password

Þetta er nú alveg týpískt, maður þarf að muna 110 notendanöfn og lykilnúmer, er það bara ég eða eiga ekki fleiri í erfiðleikum með þetta? Kannski er þetta ellimerki eins og margt annað, það má ekki hreyfa sig þá þarf maður að hafa notendanafn og lykilnúmer. Það er auðvitað hægt að sameina þetta eitthvað, en fyrr má nú fyrrvera. Ég gat meira að segja ekki byrjað á þessu bloggi hérna nema hafa notendanafn og lykilorð sem ég var auðvitað búin að gleyma. En það var hægt að redda því eins og öllu öðru.

Jæja, þá er maður kominn í fullorðins manna tölu, komin á fimmtugsaldurinn og búin að ferma og allt. Reyndar bara fyrsta barnið, hin tvö eru eftir. Þetta gekk eins og í sögu, 70 manns allir í mat heima hjá okkur. Það er eins gott að maður er með stórt hús, en þetta gekk bara vel, fór vel um alla held ég.

Drengurinn var voða ánægður. Annars er hann að verða svolítill táningur, það koma svona góðir og slæmir dagar. Ég voða góð mamma bauðst til þess að keyra krakkana sem æfa með honum út að borða og svo í bíó, talaði við þjálfarann og fékk leyfi til að taka litlu systur með. Ég veit bara ekki hvert hann ætlaði, hann varð alveg svakalega móðgaður út í mig og fór í nokkurra daga fýlu. Svo var þetta ekkert svo hræðilegt held ég, ég skipti mér ekkert af þeim þegar þau voru með læti eða slíkt, lét þjálfarana alveg sjá um þetta og minn varð bara nokkuð kátur með þetta á endanum.

Erfiður aldur maður, ekki voru mín unglingsár neitt auðveld heldur segi kannski frá því seinna.

kv.