Flóttafólk.

Það er spurning um hvað ég vil blogga hérna, stundum kem ég með eitthvað svona persónulegt stundum eitthvað sem brennur á þjóðinni.

Nú kem ég með mál sem brennur á mér þessa dagana, það er koma flóttamanna til Íslands. Við erum ein ríkasta þjóð heims en samt höfum við ekki tekið á móti mörgum flóttamönnum. Nú er allt að verða vitlaust yfir 30 konum og börnum sem eru landlaus búa í flóttamannbúðum á einskis manns landi milli Írak og Sýrlands, en eru upprunalega frá Palestínu. Þetta eru flestar ekkjur og hafa lifað við stöðugan ótta um velferð sína og barna sinna, ég sem móðir get ekki sett mig í spor þeirra, ég er svo heppin að hafa unnið í lottóinu og fæðst á Íslandi. Ætlum við að segja að við getum ekki tekið á móti þessu fólki af því að verðbólgan sé mikil hérna, gengi krónunnar sé eitthvað slappt, biðlistar eftir félagslegu húsnæði séu langir (þær búa í tjöldum í nístandi kulda á næturnar og steikjandi hita á daginn) og grunnskólar Akraness séu sprungnir.

Svo koma sumir með þau rök að þetta skipti ekki máli þetta séu bara 30 af fleiri tugum ef ekki hundruðum þúsunda. Jú, en sem betur fer búum við í þjóðfélagi þar sem hvert mannslíf skiptir máli þannig að 30 eru þó allavega 30.

Come on.

Mamma Guðs?

Já, þegar maður er með nýlega 5 ára gamlan speking á heimilinu falla oft mörg gullkornin. Einnig geta spurningarnar verið flóknar. Skottið er alveg í essinu sínu þessa dagana, hún spurði mig um daginn hver væri mamma Guðs?

Svona spurningar setja mann soldið útaf laginu, ég horfði á hana og sagðist bara ekki vita það, ég hélt að hann ætti enga mömmu. Þá kom svarið frá henni að pabbi vissi þetta örugglega. Ok, spurðu hann sagði ég þá og þar með var það útrætt.

Í morgun kom önnur, og hún var hvort Jesú væri inní okkur? Já, að vissu leyti Guð er allavega alls staðar og þar með inní okkur líka var svarið sem ég kom með. Já, þess vegna erum við góð var þá niðurstaða hennar. En svo kom smá hik, sko ég held að Jesú sé ekki inní Tómasi, Arnari Þór og Aroni (þetta eru félagar hennar í leikskólanum). Nú svaraði ég af hverju ekki, sko þeir eru alltaf að kýla og lemja!!

Semsagt smá heimspeki í gangi hér hehehe.....

Ástin er diskó en lífið er pönk!!

Ég fór á þessa sýningu á föstudaginn og fannst hún alveg frábær. Reyndar er ég svo heppin að hafa verið á mínu blómaskeiði á þessum árum þ.e. ég er 15 ára árið 1980. Ég fór svo að hugsa aftur í tímann og held ég hafi eiginlega tilheyrt hvorugum hópnum neitt sérstaklega. Ég fór bæði í Hollý og á Borgina, ég fór líka á tónleika hjá Utangarðsmönnum hmmm.... Ég var ekki í Versló sem var sko diskó skólinn né í MH sem var sko pönk skólinn, ég var bara í MR í minni lopapeysu og rifnu gallabuxum, ég held ég hafi bara verið skáti! hmmm..... Lærði ekki að mála mig fyrr en ég var komin yfir tvítugt, keypti fyrsta maskarann þegar ég var fertug, hlustaði á Led Zeppelin, Doors og Pink Floyd.......

Ég hef verið hrikalega out!!

Efnahagsástandið!

Nú eru sjálfstæðismenn farnir af stað með einhverja fundarröð um evrópumálin, spurning hvað kemur úr því. Svo finnst manni fokið í flest skjól þegar hagfræðingar Seðlabankans hafa ekki trú á krónunni lengur og þetta eru sko "fagmennirnir" í Seðlabankanum! hmmm....... Verðbólgan er víst komin í 13% skv. Kaupþingi. Fasteignir farnar að lækka og hafa lækkað um 10% á "no time", þannig að 30% spá Seðlabankans um lækkun fasteigna er kannski ekkert svo fjarri lagi, þetta hlýtur nú að laga verðbólguna þar sem fasteignaverð kemur þar inn, það má kannski redda henni þannig? Glitnir segir upp fólki í bunkum og er víst ekki eini bankinn sem gerir það, hinir fara bara penna með það. Rauður dagur í Kauphöllinni hmmm... Er allt að sigla í strand? Maður verður nú bara þunglyndur við svona féttir. Ofan á allt þá gaf sig þurrkarinn minn í gær, það sprakk dekk á bílnum hjá mér í vikunni og ég endaði í fyrrinótt með dóttur mína á Barnaspítala Hringsins með heilahristing eftir að hafa dottið sofandi fram úr rúminu okkar þ.e. mínu og hennar hmmm.... Allt er þá þrennt er, vonandi eru óhöppum vikunnar lokið.

Eina sem ég fann skondið í blöðunum var soldið fyndið viðtal við leikkonuna Jóhönnu Friðriku í Fréttablaðinu í fyrradag þegar hún sagðist hafa fegrað heimilið með páskaliljum sem hún fann niður við Tjörn hehehehe.... Hún fattaði það ekki að borgarstarfsmenn eru búnir að vinna baki brotnu að því að fegra umhverfið með því að gróðursetja páskaliljur um alla borg, og ekki er ætlast til þess að fólk tíni þetta til að hafa í vasa heima hjá sér hmmm.....

over and out

Náttúrhamfarir!

Já nú, dynja náttúruhamfarirnar yfir. Fyrst fór fellibylur yfir Búrma eða Myanmar eins og það er líka kallað, veit ekki hvort er rétt að nota. En svo eru jarðskjálftar í Kína.

Það er eitt vandamál með þessi lönd að þau eru mjög lokuð og erfitt að gera sér grein fyrir raunverulegum hörmungum því ríkisstjórnirnar draga svo úr fjölda slasaðra og látinna.

Einnig er kerfið þarna eitthvað svo spillt, þetta eru kommúnistastjórnir hvoru tveggja en sjálfsbjargarviðleitni embættismanna á sér engin takmörk og þar er kapítalisminn í hámarki, þ.e. ég las það að embættismenn hefðu stolið stórum hluta hjálpargangna sem sameinuðu þjóðirnar sendu til Búrma og selt þau á mörkuðum!! Er ekki allt í lagi!! Í þessum löndum er mannslífið metið svo lítið að maður verður alveg miður sín. Svo sendir forsetinn okkar samúðarkveðjur til Kína, en bíddu af hverju ekki til Búrma, þar sem ég held að neyðin sé miklu meiri?

Æji á svona stundum óskar maður þess að maður gæti verið Guð í einn dag eða svo.

Frétt vikunnar!

Sá á Eyjunni sem er nú einn af mínum uppáhalds fréttavefjum eftirfarandi frétt.

Ecuador: Vill setja í lög að konum sé fullnægt af eiginmönnum sínum

Auðvitað má gera grín að þessu og segja hvernig er sönnunarbyrðin í þessu máli, er þetta ekki bara orð á móti orði osfrv. En málið snýst auðvitað ekki um það og það átta sig, allir hugsandi menn, á. Í þessum löndum hefur í gegnum tíðina verið litið á konuna þannig að hún eigi bara að vera til taks þegar kallinn er í stuði og ekkert verið að spá í hvað hún vill. Þannig að þetta snýst um það að konur eigi rétt til að lifa hamingjusömu lífi kynferðislega séð.

Mér finnst hún bara nokkuð góð þessi þingkona.

Bankarnir hmmm....

Já skil ekki alveg þetta system, ég er kannski svo einföld. Nú virðist sem Geir sé á kafi í því að auka gjaldeyrisforða til að bjarga bönkunum, eins og ég skil það, en bíddu aðeins. Bankarnir voru að skila af sér ársfjórðungsuppgjörum og skila flestir fleiri tugum milljarða í hagnað og greiða út arð.

Er ekki eitthvað skrítið hérna í gangi? Jú það má kannski segja að lausafjársstaða bankana sé slæm en þeir skila samt hagnaði og arði!

Ég í einfeldni minni hringdi í bankann minn um daginn og var að forvitnast um smálán sem ég þarf sennilega á að halda til fjárfestinga og vextirnir sem mér voru boðnir voru semsagt 10% vextir + verðtrygging eða 19% óverðtryggt, en þetta var háð því að ég væri með veð í íbúð!!

Jæja á einhver nokkrar millur þarna úti og er tilbúinn að treysta mér fyrir þeim?

Próflestur

Já, nú er Unglingurinn í prófum, sínum fyrstu vorprófum í menntaskóla.

Lesa, hvað er það?

Hann sefur fram á miðja daga, vakir fram á miðjar nætur og þegar hann er að "lesa" þá er hann við tölvuna með minnst 10 MSN glugga uppi. Hvernig er þetta hægt? Ég á í vandræðum með að fylgjast með samræðum á einum glugga ef ég er að gera eitthvað annað líka, hvað þá fleiri en 10!!!

Sem betur fer er hann sæmilega klár og þarf ekki að hafa mikið fyrir þessu, annars væri hann með allt niðrum sig. Það kemur að skuldadögum og þá kemur í ljós hvort "lesturinn" hefur verið nægur.

smá púst

Bullblogg

Fór á mjög svo skemmtilegan fyrirlestur í morgun, þar fjallaði Guðmundur Oddur Magnússon prófessor við Listaháskóla Íslands um ímynd verkfræðinga.

Hann tók þetta soldið almennt, skipti hlutunum upp í lög. Í neðsta laginu var svona verkfærin, efnið, ofl. ofl. sem nauðsynlegt er að hafa tök á, síðan fór hann í næsta lag fyrir ofan þar koma hugtökin og slíkt. Þá var komið að speglinum, bakvið spegilinn kom svo sköpunin, ímyndunaraflið og slíkt, eru verkfræðingar með eitthvað slíkt? Í efsta laginu var svo órarnir, og "borderline" geðveiki. Hann vildi meina að við værum öll þarna í neðstu lögunum, sumir kæmust upp í efri lögin, en það er bara miklu auðveldar að gera það undir áhrifum, áfengis eða fíkniefna hehehe....

Ég túlkaði þetta þannig að við værum afskaplega heppin því við komumst í öll lögin, það er erfiðara fyrir þá sem eru aðallega í efri lögunum að komast í þau neðri.

Jæja nú er ég búin að týna ykkur öllum semsagt bara bullblogg.

Sitt lítið að hverju.

Sko, ég skil nú ekki þennan klikkaða kall þarna í Austurríki. Vá maður, raunveruleikinn kemur manni sífellt á óvart og í ljós kemur að hann er oft miklu verri heldur en nokkur skáldsaga eða sjónvarpsefni Púff....

Nú er allt vitlaust í Bolungarvík, gaman að svona fjöri í pólitíkinni. Sjálfstæðismenn mjög svo ánægðir með nýja meirihlutann þó að A-listinn sé upphaflega klofningsframboð úr Sjálfstæðisflokknum og manni skilst að "hnífasettin" hafi fengið að fjúka þarna á milli. Svo fengu þeir smá bakþanka, því nú þurfa þeir að segja Grími Atlasyni upp starfinu sem bæjarstjóra og eru þá kannski að hrekja hann í landsmálin en hann er svo flottur fulltrúi Samfylkingarinnar þarna á Vestfjörðum og með mjög mikinn "kjörþokka". En Sjálfstæðismenn vantar einhvern flotttan til að leiða sinn flokk þarna. Allavega verður þetta fróðlegt allt saman og gaman að fylgjast með framhaldinu.

Tækniframfarir

Fór á mjög svo skemmtilegan fyrirlestur á síðasta vetrardag, þar hélt Ólafur Andri Ragnarsson aðjúnkt við HR erindi um internetið og tækniframfarir. Meginatriðið var semsagt það að við erum rétt að byrja í tækniþróunarbrautinni og framfarirnar eiga eftir að verða gífurlegar í framtíðinni. Hann sýndi skemmtileg myndbönd um ýmsa hluti og benti okkur á síðu sem heitir TED.com þar sem hægt er að nálgast ýmsa fyrirlestra um framtíðina í tæknimálum. Allavega fór maður út og hugsaði með sér að það ætti þvílíkt eftir að gerast í þessum heimi á næstunni að tækning í bíómyndum eins og Matrix, Minority Report, Starwars og Star Trek urðu allt í einu ekkert svo fjarstæðukenndar.

Háspennumöstur

Fór á mjög svo skemmtilega móttöku hjá Landsneti á síðasta vetrardegi.

Þeir efndu til samkeppni um nýtt útlit á háspennumöstrum meðal almennings og arkitekta. Menn vissu nú kannski ekki hvað þeir væru að fara útí en fengu um 100 tillögur alls staðar að úr heiminum. Hugmyndirnar voru margar mjög góðar, skemmtilegar og athyglisverðar. Sumar virka reyndar ekki í raunveruleikanum en það er kannski ekki aðalatriði, sumt af þessu væri hugsanlega framkvæmanlegt eftir nokkur ár með nýrri tækni og slíku.

Mér fannst þetta mjög klókt hjá þeim í Landsneti að gera "óvininn meðsekan" þar sem megnið af arkitektum og slíku eru umhverfissinnar og viðurkenndi nú einn gamall samstúdent fyrir mér að margir arkitektarnir væru það og hann sjálfur væri nú meðlimur í "Framtíðarlandinu".

Klókir hmm.....

Gleðilegt sumar!

Jæja, þá segir dagatalið okkur að sumarið sé komið. Hef reyndar fulla trú á að það sé á næsta leyti, það liggur í loftinu.

Var hugsað til sonar míns þegar ég sá að 17 ára gamall piltur hefði verið tekinn á alltof miklum hraða á Suðurlandinu, minn er nefnilega með "hraðakstursgenið". Hvorki ég né pabbi hans getum keyrt á löglegum hraða, þurfum alltaf að vera aðeins yfir. Pabbi hans hefur reyndar lent nokkrum sinnum í því að vera sektaður fyrir vikið en ég hef sloppið hingað til. Var reyndar stoppuð í fyrra en þeir höfðu ekki náð mér á filmu þannig að ég slapp sem betur fer, ók soldið hratt hmmmm.....

heyrumst

Evróvisionmyndbandið

Nú er allt að verða vitlaust yfir nýja myndbandinu með Eurobandinu. Ég verð nú að viðurkenna það að ég hló og hló þegar ég sá það fyrst en það er kannski bara ég, ég er með svo skrítin húmor hehehe...

Auðvitað er það hommalegt, og það er auðvitað ákveðin áhætta í þvi að hafa hlutina hommalega því það eru svo margir með "hommafóbíu". En ég meina það, hvar er húmorinn? Lagið er ágætt en ég geri mér svo sem engar vonir um einhvern frábæran árangur í þetta sinn frekar en áður, enda skiptir það ekki máli, bara hafa gaman að þessu. Mér hefur reyndar alltaf fundist Regína frábær söngkona, en það er spurning hvort hún fær almennilega að njóta sín í þessu lagi og verði ekki kaffærð af hommunum. hehehe....

Helgin í stórum dráttum

Menntskælingurinn og Gelgjan fóru með Pabba sínum til London um helgina. Þessi ferð var ákveðin fyrir löngu en krakkarnir fengu hana í jólagjöf. Þarna var farið á fótboltaleik og allt. Mér skilst að þetta hafi allt verið mjög gaman og mjög svo velheppnuð ferð í alla staði.

Ég aftur á móti fór vestur til Ólafsvíkur á "vetrargleði" eins og það er kallað. Þetta var mjög fínt, matur og allt auk heimagerðrar skemmtunar sem samanstóð af ABBA lögum og búningum. Skemmtunin hefði mátt vera aðeins styttri og frekar að leyfa fólki að dilla sér við ABBA tónlistina. Þetta var mjög gaman, ekki skemmdi fyrir að ég þekki þó nokkra þarna og stafar það af því að fyrrverandi er frá Ólafsvík þannig að þarna var maður auðvitað undir ströngu eftirliti hehehe....

Ég gæti nú ekki hugsað mér að búa þarna en Snæfellsnesið er nú samt alveg dásamlegt á vorin, sumrin og haustin.

Börn og skyldur!

Það gerist nokkuð oft núna að Skottið er að leika sér í skotinu sínu með dúkkur, þær eru háttaðar á hverju kvöldi ofan í rúm með snuddur. Hún situr með þær í fanginu og talar við þær ósköp ljúfmælt. Segist ekki nenna að gefa þeim brjóst svo þær verði bara að fá pela osfrv. Við hin eldri sem heyrum þessar samræður eigum oft soldið bágt með okkur og um daginn var hún hjá afa sínum og leit hún á hann þegar hann gat ekki haldið niður í sér hlátrinum lengur og spurði sposk af hverju hann væri að hlæja, hann var nú fljótur til og sagði að það hefði verið eitthvað svo fyndið í sjónvarpinu, hún keypti það og hann slapp í það skiptið. Það sem nefnilega gerist ef hún uppgötvar það að það er einhver að hlusta á hana er að hún fer öll í kerfi og hættir leiknum.

Fyrir mig, mömmuna, getur þetta stundum verið soldið óþægilegt, sérstaklega þegar hún er að siða dúkkurnar eða skamma þær þá eru sko notaðar nákvæmlega orðrétt sömu skammarræðurnar og hún fær eða systkini hennar þegar þau haga sér ekki nákvæmlega eins og mamma vill.

Gærdagurinn var soldið svoleiðis, ég er hálftuskulega þessa dagana, með hálsbólgu og höfuðverk og pottþétt með einhverjar kommur í hita en hef ekki gefið mér tíma til að mæla mig og er alls ekki nógu veik til að liggja bara heima undir sæng. En það sem gerist er að þráðurinn verður afskaplega stuttur og maður getur æst sig yfir hlutum sem maður annars tæki nokkuð létt. Skottið fékk að fara með vinkonu sinni heim úr leikskólanum og svo kom ég að sækja hana um hálfsjöleytið, búin að útbúa matinn og hann beið bara eftir okkur, kartöflurnar og grænmetið soðið og fiskibollurnar tilbúnar í ofninum. En þá gerðist það að þær vinkonurnar stungu af á meðan ég spjallaði við foreldrana og fóru á róluvöllinn og það kostaði alveg hálftíma að koma Skottinu heim þaðan.

Unglingurinn hringdi í mig rúmlega hádegi og sagðist vera kominn heim og spurði hvenær ég kæmi heim, ég sagðist ekkert koma fyrr en rúmlega 5 og þá dæsti hann. Hann nennti nefnilega ekki að taka strætó á æfingu svo hann bara sleppti henni. Ég sagði honum nú að fara og viðra hundinn í góða veðrinu en minn maður var steinsofandi þegar ég kom heim og var ekki búinn að fara með hundinn og ekki búinn að taka úr uppþvottavélinni sem þó er eina skylduverk þeirra systkinana.

Auðvitað röflar maður í svona tilfellum, hann fór ekki með hundinn fyrr en að ganga tíu. Gelgjan var að vinna eitthvað verkefni fyrir skólann og byrjaði auðvitað ekki á því fyrr en um tíuleytið í gærkveldi, á sama tíma og ég var að reyna að sannfæra Skottið um að nú væri sko löngu komin nótt og hún þyrfti að fara að sofa til að vakna í leikskólann. En á meðan ég var að þessu var Gelgjan sífellt að spyrja mig hvað hitt og þetta þýddi á ensku en hún var að nota einhverja enska vefsíðu sem heimild. Ég bara fékk nóg, ég á alltaf að vera tilbúin að aðstoða, fæ skammir ef ekki er búið að þvo þær buxur eða bol sem á að nota á þeirri stundu og ef ég hef ekki keypt "rétt" inn þ.e. vantar eitthvað sem þeim þykir gott, ég fékk líka að heyra það að ég gleymdi tónleikum sem Gelgjan var að spila á, ég held að það séu fyrstu tónleikarnir sem hún spilar á sem ég mæti ekki á síðan hún hóf tónlistarnám sitt níu ára gömul! En þær litlu skyldur sem lagðar eru á þeirra herðar eru vanræktar út í eitt og svo er bara rifið kjaft. Ég á stundum ekki til orð og hugleiði það mjög þessa dagana að segja upp starfinu sem mamma!!

Olíuhreinsunarstöð?

Mér líst eitthvað voðalega illa á olíuhreinsunarstöð á Vestfjörðum. Olía er eitthvað svo óumhverfisvæn og mér finnst bara hættan á slysi vera of mikil. Þarna yrðu hundruð skipa árlega að flytja olíu til og frá landinu í gegnum einhver gjöfulustu fiskimið okkar Íslendinga. Ef eitthvað kemur fyrir eru helstu fuglabjörg Evrópu í hættu auk fiskveiðanna.

Ekki skánaði tilhugsunin þegar ég horfði á Kompás í gærkveldi, þarna er eignahaldið sennilega í höndum á rússneskum viðskiptajöfrum sem kalla nú ekki allt ömmu sína í þeim efnum og hafa allt annað siðgæði í viðskiptum en þau sem við þekkjum.

Ef við viljum halda byggð þarna á Vestfjörðum verður auðvitað eitthvað að koma í staðinn. En það er líka spurning um að gera Vestfirði bara að þjóðgarði, friða bara svæðið eins og það leggur sig. Umhverfissinnarnir yrðu nú ánægðir með þá tillögu ekki satt??

Nýfædd

Verð að segja ykkur frá því að ég eignaðist litla frænku í gærkveldi. Hún er soddan prímadonna að hún lét bíða eftir sér í 10 daga en svo kom hún bara einn, tveir og þrír þegar hún var loksins tilbúin hehehe....

Hún er rosa heppin, á tvær frábærar stóru systur sem eru 12 og 15 ára og yndislegan stóra bróðir sem er 14 ára og fermdist í vor, aðalmálið var hvort prímadonnan myndi láta sjá sig áður, en það gerðist ekki, sem betur fer. Svo á hún yndislegan hund og mjög svo sérvitra kisu..... Svo ekki sé talað um æðislega foreldra.

Innilega til hamingju elskurnar mínar.

Berlusconi!

"Uppáhalds" stjórnmálamaðurinn minn er hinn ítalski Berlusconi, hann er alveg stórkostlegur, það sem honum dettur í hug að láta út úr sér.

Hann er náttúrulega karlremba dauðans og sagði um daginn að: "Eigir þú í fjárhagsvandræðum skaltu giftast milljónamæringi"
Svo sagði hann að hægrisinnaðar konur væru fallegri en þær vinstri sinnuðu.
Hann líkti þýskum evrópuþingsmanni við nazistaforingja.
Fullyrðir að ítalskur matur sé betri en finnskur.
Svo á hann fótboltalið auðvitað ekki hvaða fótboltalið sem er, heldur AC Milan.
Hann hefur fullyrt að ítalskir dómarar séu allir geðveikir og "mannfræðilega" öðruvísi.
Hann hefur verið kærður fyrir mútur og fjársvik, kallaður mafíósi osfrv.
Hann er ríkasti maður Ítalíu og á flesta fjölmiðla þar í landi sem hann stýrir og ritskoðar.

En samt já samt sýnist mér Ítalir vera búnir að kjósa hann og hans flokk aftur til að stjórna Ítalíu.

Það er nú ekki í lagi með þetta lið.

Vor í lofti!

Já, nú er ég nokkuð viss á því að vorið sé rétt handan við hornið, samt sjóaði í nótt og allt hvítt í morgun en ilmurinn af vorinu liggur í loftinu. Þegar vorið kemur þá lifna ég líka, hmmm hef kannski verið blóm í fyrra lífi....

Allavega er með sól í hjarta og söng á vörum núna þegar birtir. Fékk frábæran póst frá frábærri frænku minni og verð bara að setja hann hérna.


Vissir þú.....

.... að ef gínur í búðum væru raunverulegar konur væru þær of grannar til þess að fá blæðingar?

.... að af 3 milljörðum kvenna í heiminum eru aðeins u.þ.b. 10 súpermódel?

.... að Marlyn Monroe notaði stærð 14 (ameríska, sem er sama og 44 í evrópu) og hafði alla karlmenn í vasanum án þess að nokkur kvartaði yfir kílóunum á henni?

....að ef Barbie væri alvöru kona væri hún svo vansköpuð að hún yrði að ganga á fjórum fótum?

.... að konur eru að meðaltali 65 kíló (ekki hávaxnar) og nota stærðir 12 til 14 (amerískar = 42-44 í evrópu)?

.... að ein af hverjum 4 konum á háskólaaldri þjáist af einhverskonar átröskun?

.... að fyrirsæturnar í glanstímaritum og sjónvarpi eru lagaðar til í tölvu eða fiffaðar með lýsingu og ljósmyndatrikkum?

.... að rannsóknir hafa sýnt að fimm mínútna lestur glanstímarita veldur þungu skapi, skömm og sektarkennd hjá um 70%kvenna

.... að fyrirsætur fyrir 20 árum voru 8% léttari en konur almennt?

.... að fyrirsætur í dag eru 23% léttari en konur almennt?


Fegurð konunnar er ekki hægt að smækka niður í mælieiningar heldur felst hún í þeirri útgeislun sem ástin á sjálfri sér veitir hverri og einni.

-Fegurð felst í þroska og góðri sjálfsímynd og fer einungis batnandi með árunum.

-Spurningin er ekki um fatastærðir, kílóafjölda, hæð eða háralit, heldur er hún spurning um að læra að elska sjálfa sig frá toppi til táar.

-Hjálpumst að við að ýta undir góða sjálfsímynd hvorrar annarar. Við erum allar æði...........og ekki gleyma því!

Jæja elskið nú hvort annað og þið konur, elskið spegilmynd ykkar.

Smá pirringur!

Mér finnst það hálfgerð móðgun við okkur hin þegar Geir skammast í vörubílstjórum og kallar þá ofbeldismenn þegar þeir loka bílinn hans inni. Við hin höfum þurft að þola það og gert það með jafnaðargeði að bíða bara þar til mótmælunum linnir, en forsætisráðherra landsins æsir sig uppúr öllu valdi.

Svo þetta einkaþotumál, ég meina er það ekki bara í góðu lagi að nýta sér þá þjónustu sem býðst, ef það sparar manni tíma og þá um leið pening. Ég held að þetta sé bara öfund þegar fólk er að bölsótast útí þetta. Skil það bara ekki.

Svo eru það allir þessir læknar í mikilvægum stöðum. Bæði núverandi og fyrrverandi borgarstjóri eru læknar, við erum með dýralækni sem fjármálaráðherra til að passa (sauð)fé ríkisins.

Nenni ekki að æsa mig meira.

Kreppa?

Er að koma kreppa? Veit það ekki, en mér finnst fólk samt soldið farið að hugsa um hvað það gerir við peningana sína.

Ein samstarfskona mín tilkynnti það í hádeginu að hún hefði tekið sig til í gærkveldi og sagt upp öllum áskriftum af öllum blöðum og tímaritum á sínu heimili. Gott hjá henni, ég er einnig með áskrift af einhverjum blöðum og tímaritum maður ætti kannski að skoða þetta, reyndar er ég með svo stóra krakka að þau eru með skoðanir á öllu þannig að það er ekki víst að ég fengi að segja öllu upp. En OK, það má skoða þetta.

Hér er ekki mötuneyti þannig að hver kemur með sitt nesti til að snæða í hádeginu og þar má glöggt sjá samdráttinn, fólk er greinilega búið að skipta út Búlluborgaranum, Nings núðlunum og Sómasamlokunum fyrir ódýrar súpunúðlur úr Bónus og bollasúpur frá Knorr snætt með þurru brauði.

Já það er svona með okkur almenninginn sem ekki getum tekið okkur til og selt jeppana eða hætt að snæða á Holtinu í hádeginu. Hmm.... ein pæling ef ég ætti jeppa sem ég vildi selja í sparnaðarskyni, vill eða getur einhver keypt jeppa í dag?

Sinfóníutónleikar á laugardegi.

Fór á mjög skemmtilega sinfóníutónleika í gær með Skottinu, sáum og hlustuðum á tónleika sem voru sérstaklega fyrir börn og heita "Maxímús músíkrús". Stórkostlega gaman. Skottið skellihló og skemmti sér mjög vel.

Frábært framtak hjá Sinfóníunni.

Miðborgin á sunnudegi!

Ég átti leið niður í Ráðhús í dag, þar er bæði mjög skemmtileg ljósmyndasýning á vegum Fókus og mjög falleg málverkasýning með málverkum eftir Ólöfu Pétursdóttir.

Ég hringsólaði í a.m.k. 20 mínútur um miðbæinn að leita að bílastæði! Þarna keyrði ég fram hjá nokkrum svæðum með tómum stæðum sem eru greinilega í einkaeigu því þau voru lokuð með stórum slám. Bílastæðahúsið í Ráðhúsinu var lokað og bílastæðahúsið við Vesturgötu var eitthvað bilað og opnaðist ekki. Loksins fékk ég stæði á bílastæðinu við Bæjarins bestu pylsur. Þarna voru tugir ef ekki hundruðir bíla að leita að stæði á sama rólinu og ég og annað eins lagt ólöglega upp á gangstéttum.

Svo eru menn hissa á því að "buisness" í miðbænum gangi illa, það er bara ekkert skrítið að eini reksturinn í miðbænum sem gengur vel séu öldurhús bæjarins þar sem allir sem koma þangað koma og fara í leigubíl og þurfa ekki að hafa áhyggjur af bílastæðum.

Svo kemur þetta hefðbundna, afhverju tekur fólk ekki bara strætó. Strætó?? Hann gengur aðeins einu sinni á klukkutíma allavega í mínu hverfi á sunnudögum og það þýðir að ferðin í bæinn eða heim getur tekið óratíma ef maður þarf að skipta um strætó á leiðinni og allir vagnarnir ganga á klukkustunda fresti, come on.

Ég átti nú líka erindi í miðbæinn um miðjan virkan dag um daginn og það var alveg sama sagan, engin stæði. Það þýðir nú bara að einu viðskiptavinirnir sem nýta sér þjónustu í miðbænum séu þeir sem búa eða vinna í mibænum!

Bjargið miðbænum áður en það er of seint!

Hætti vorið við?

Ég var komin í voðalegan vorfíling um daginn, loftið var eitthvað svo milt og vorlegt, maður fann alveg lyktina af vorinu. En æji það hætti við, eða hvað? Kannski soldið bjartsýnt að halda að það sé að koma, ekki nema endaður mars en samt, tíminn flýgur áfram. Kannski maður ætti að hætta að bíða eftir vorinu og skella sér bara á skíði um helgina?

Ekki spurning eða hvað?

Líf á öðrum hnöttum?

Hverjum hugsandi manni dettur í hug að það sé ekki líf á öðrum hnöttum?
Út í geimnum erum milljarðar stjörnubrauta sem innihalda milljarða stjarna! Dettur einhverjum í hug að við séum svo einstök hér á þessum hnetti að hér hafi skapast svo einstakar aðstæður til að skapa líf að það þekkist ekki neins staðar annars staðar? Come on...

Rakst á mjög svo áhugaverða grein í Mogganum í morgun sem hét Líf á öðrum stjörnum?. Þarna er talað um að fundist hafi merki um efnið metan á stjörnu sem ber heitið HD 189733b og er í sólkerfinu Vulpecula og er aðeins í 63 ljósára fjarlægð! Alheimurinn er sko margar milljónir eða milljarðar ljósára frá einum enda til annars eða óendanlega stór og við erum strax búin að finna merki um líf á stjörnu sem er aðeins í 63 ljósára fjarlæð, ég meina 63 er tala sem allir skilja!

En þarna eru menn líka að tala um líf eins og við þekkjum það með sömu efnasamböndum og hér þekkjast. Hver segir að ekki geti verið til líf sem samanstendur af allt öðruvísi efnasamböndum og þrífst við allt annað hitastig en við þekkjum þ.e. miklu heitara eða miklu kaldara.

Ég ætla að vitna í einn mesta speking á þessu sviði hann Carl Sagan en hann sagði:
"The universe is a pretty big space. It's bigger than anything anyone has ever dreamed of before. So, if it's just us, seems like an awful waste of space, right?"

Einnig sagði hann:
"Absence of evidence is not evidence of absence."

Algjör snilli ekki spurning!

Hátíðir og hefðir.

Við mannfólkið erum uppfull af hefðum, endurtekningum og reglum. Einhvern vegin kemur þetta eðli okkar best í ljós þegar stórhátíðir eru í gangi. Hvort sem það eru Jól eða Páskar þá eru t.d. börnin vön einhverju ákveðnu og það má alls ekki breyta útaf. Hér áður fyrr fórum við stórfjölskyldan nokkur ár í röð í sumarbústað yfir Páskana, stóru krakkarnir mínir muna mjög vel eftir þessu og þetta varð ómissandi hluti af Páskunum. Þegar svo aðstæður breyttust og fjölskyldan stækkaði var þessi möguleiki ekki lengur fyrir hendi, en í staðin hittumst við öll einn dag í sumarbústaðnum hjá foreldrum mínum borðum kalkún sem pabbi eldar af einskærri snilld og felum páskaeggin. Þetta er orðin órjúfanleg hefð á Páskum núna og Skottið talar um þetta hálft árið.

Svona er þetta bara, við erum ekkert skárri fullorðna fólkið, við viljum hafa hlutina svona en ekki hinsegin, sérstaklega þegar kemur að svona hátíðum. Lítið bara í eigin barm.

Eigum við ekki bara að jarðsetja Krónuna?

Það er nú að bera í bakkafullan lækinn að fara að ræða ástand efnahagsmála hér á þessu blessaða landi okkar þessa dagana.

En ég get nú ekki staðist mátið, sumir segja að bankarnir stjórni þessu alfarið, þeir vilji sjá krónuna svona lága þannig að uppgjör þeirra komi vel út á næsta ársfjórðungi, því þeir eiga svo mikinn gjaldeyri, hmmm.... við hin blæðum bara á meðan. Það er líka spurning hvort Þeir séu að knýja fram myntbreytingu hér heima.

Við ákváðum eiginlega að jarðsetja Krónuna hér í hádeginu áðan, ég held að við séum nú ekki ein um þá skoðun, það er spurning af því að það eru páskar hvort hún nær að rísa upp á 3ja degi hehehehehe....

Afmæli

Það var enn ein afmælisveislan hér um helgina, nú voru það krakkarnir úr leikskólanum sem komu í heimsókn. Þau komu hérna 7 stykki 5 ára gömul ofsalega prúð og góð og virkilega gaman að hafa þau. Skynsamir krakkar.
Greinilega er mikið vor í krökkunum og ástin blómstrar, kortin frá strákunum sýndu merki þess full af blómum og hjörtum. Soldið fyndið þegar 5 ára dóttirinn fullyrðir að hún eigi kærasta þ.e. einn af þessum prúðu drengjum er semsagt kærastinn hennar. OK, sagði ég hvað þýðir það? Jú við kyssumst og svona. Jahá það er greinilega mikið fjör að vera 5 ára í dag ;)

Aumingja Atli Gísla!

Heyrði í morgun viðtalið við Atla Gísla í Íslandi í býtið. Mér finnst þetta vera léleg blaðamennska að slá því svo upp að hann vilji fyrr sjá lögreglumann skotinn en sjá lögregluna vopnaða skotvopnum. Málið er bara að ofbeldi er svarað með ofbeldi, bófarnir sitja hugsanlega á sér að skjóta á lögregluna ef þeir vita að hún er óvopnuð, þannig að ég er sammála honum um það að það eigi að draga það sem lengst að vopna lögregluna.

áfram Atli.

Vor í lofti!

Mér finnst vera komið soldið vor í loftið, það er að hlýna og snjóinn farið að taka upp allavega á götunum í mínu bæjarfélagi. Vona reyndar að hann haldi í fjöllunum yfir páskana.

Skottið á afmæli í næstu viku og einhver snillinn (þ.e. ég) sagði við hana einhvern tímann að hún ætti afmæli þegar vorið væri komið. Mér fannst reyndar í síðustu viku að þetta væri ansi bjartsýnt hjá mér, sérstaklega af því hún var sífellt að minna mig á það að hún ætti bráðum afmæli og þá væri komið vor, en úti var frost og snjór. Í dag aftur á móti stend ég í þeirri trú að ég hafi ekki verið að ljúga að barninu þegar ég sagði að hún ætti afmæli á vorin!

Bráðum kemur blessað vorið......

Bílpróf!

Jæja, stóri strákurinn minn fékk bílprófið í gær! Hann er búinn að bíða eftir þessum degi lengi. Til hamingju með það elsku kallinn minn!

Ég sé reyndar fram á mikla sæludaga, nú þarf hann aldeilis að dekra við mömmu sína til að fá bílinn lánaðann. Hann má ekki lengur setja upp svip þegar ég bið hann að viðra hundinn eða gera eitthvað annað viðvik hérna heima. Hehehehe....

Við erum nú buin að vera í æfingaakstri vikum og mánuðum saman og ég held að hann sé ágætisbílstjóri, varð vör við það í gær þegar ég sat í bílnum hjá honum að um leið og æfingaaksturs skiltið fer aftan af bílnum þá hætta hinir bílarnir að taka tillit til hans, þannig að í raun ætti að vera annað skilti sem þau gætu notað fyrstu vikurnar eða mánuðina sem segði "Nýr ökumaður". Er búin að koma þessu að hjá forvarnarfulltrúa tryggingafélags og hann var innilega sammála mér, vonandi gerist eitthvað í þessum málum í framhaldinu! ;-).

Frændi hans fékk bílpróf um daginn og var 8 daga slysalaus, stóri bróðir hans var alveg 4 daga slysalaus! Það er spurning hvað minn nær að halda þessu lengi!

Eini gallinn við þetta er að hér á heimilinu er bara einn bíll, og mér finnst ofboðslega óþægilegt að hafa engann bíl svona heimavið þannig að þetta verður sennilega soldið púsluspil þegar allt verður á botninn hvolft. Verð að vera komin með aukabíl þegar dóttirin fær bílprófið eftir 2,5 ár það er alveg á tæru.

Takið nú tillit til hvors annars í umferðinni!

Húrra Stefanía!

Eins og ég hef sagt frá hér áður þá virkar þetta heimili mitt stundum eins og félagsmiðstöð, vinir sonarins eiga hér athvarf og er oft fjölmennt hér. Einn af þessum vinum sonar míns er yndið hún Stefanía. Hún er reyndar kærasta eins vinarins, en er og sérstaklega var mjög oft hér inni bara að chilla með syninum eða þeim félögunum.

Hún er bara yndisleg, sá hana fyrst syngja fyrir tveimur árum og söng hún þá m.a. "My name is Tallullah" í uppsetningu Lágafellsskóla á "Bugsy Malone" sem gekk hér vikum saman í bæjarfélaginu. Hún var bara frábær þar! Svo er hún í hljómsveit sem heitir "Bob Gillan og strandverðirnir" og hafa þau verið að gera það ágætt á böllum í bænum og á útihátíðum. Í sumar sá ég hana á hátíðinni "Í túninu heima" ásamt einum hljómsveitarmeðlima og voru þau svona eins og götusöngvarar, hún heillaði alla þar.

Um helgina vann hún Samfés! Ég sá hana áðan í sjónvarpinu þar sem hún söng lagið "Fever" og ég fékk gæsahúð. Hún er bara frábær! Vonandi nær hún eins langt og hún hefur áhuga á, í þessum bransa.

Gangi henni vel!

Helgin og rör

Helgin var nokkuð strembin, þær verða það stundum þegar maður ákveður á halda svona fjölskylduafmæli. Málið er að tvö af börnunum mínum eru í stjörnumerkinu "fiskar" sem þýðir að þau eiga afmæli þessa dagana, ég hef verið vön að bjóða fjölskyldunni til þeirra svona í sameiginlegt afmæli. Þannig að í stað þess að fara á skíði í Skálafelli í blíðunni eins og ég gerði í síðustu viku, fór laugardagurinn í að undirbúa afmælið og á sunnudeginum var svo afmælið haldið og fór næstum allur dagurinn í það.

Í dag vorum við Skottið svo heima, hún fékk nefnilega rör í eyrun í morgun. Ég vona að eyrnaverkurinn verði nú ekki eins slæmur og helst ekki til staðar næst þegar eyrnabólgudraugurinn lætur sjá sig.

Ég man vel þegar elsta barnið mitt var svæft í fyrsta sinn, ég fór bara fram á gang og grét, mér fannst eins og hann myndi aldrei vakna aftur, þetta var frekar óhugnanlega lífsreynsla. Nú er maður orðinn svo sjóaður í þessu að ein svæfing til eða frá skiptir ekki máli.

Skottið vaknaði brosandi, hvernig er hægt að vakna brosandi af svæfingu?? Veit það ekki! Hún er bara svo lífsglöð, hún leit á mig, brosti og sagði, "ég hélt ég væri heima", svo bætti hún við: "læknirinn sagði að það kæmi lakkríslykt, þetta var ekki"lakkríslykt heldur tyggjólykt", bara yndisleg.

Mömmugildra!

Já það hafa verið miklar umræður í bloggheimum og víðar um þetta nýja útspil borgarstjórnarinnar í Reykjavík að greiða foreldrum sem eru að bíða eftir plássi hjá dagmömmu eða leikskóla bætur fyrir. Svona einhvers konar heimgreiðslur.

Væri ekki nær að nota þessa peninga í það að byggja fleiri leikskóla? Ég bara spyr. Reynslan frá nágrannalöndunum sýnir það að það eru yfirleitt mæðurnar sem eru þá heima með börnin en mennirnir fara á vinnumarkaðinn.

Yrði þetta ekki stórt skref afturábak í jafnréttisbaráttunni? Það segir sig sjálft að þegar foreldrar standa frammi fyrir þeirri ákvörðun að annað þeirra þurfi að vera heima til að passa börnin af því ekki fæst dagvistunarúrræði fyrir þau, að þá yrði það tekjulægri einstaklingurinn sem tæki það að sér. Hér á þessu landi eru launakjörin því miður þannig að í langflestum tilfellum væri það móðirin sem yrði heima.

Þannig að þetta er svona "mömmugildra".

Kvennaslóðir

Til er vefur sem....., OK, vitna bara í hvernig þetta er orðað á heimasíðunni þeirra:

Kvennaslóðir

Um Kvennaslóðir

Kvennagagnabankinn kvennaslóðir inniheldur upplýsingar um kvensérfræðinga á ýmsum sviðum. Markmið kvennaslóða er að gera þekkingu og hæfni kvenna sýnilega og aðgengilega.

Kvennaslóðir er vettvangur fjölmiðla, fyrirtækja og stjórnvalda til þess að finna hæfar konur til margvíslegra starfa með skjótvirkum hætti.

En þessi síða getur alveg verið stórsniðug held ég. Ég er ásamt mörgum allavega búin að vera á lista þarna í mörg ár, en það vantar kannski markaðssetninguna á þetta. Ég hef aldrei séð neitt á þennan vef minnst neins staðar, ég veit bara af honum því við vorum svona tilraunadýr í þessu. En allavega þið sem lesið þetta rugl mitt, veit eiginlega ekki hverjir það eru, en allavega einhverjir því teljarinn mjakast nú uppávið, látið vita af þessu, held að þetta geti verið soldið sniðugt.

Stelpur koma nú skrá sig inn.

Dear penis

OK, fullyrti í gær að ég ætlaði að tileinka þessa vikuna konum, en ég get bara ekki staðist mátið.





hehehe.....

Einstæðar mæður

Sá í Mogganum í gær að talað var um að einstæð móðir hefði unnið lottóvinninginn! En gott, hugsa flestir þetta kom þá á góðan stað. Ég efast ekkert um það og óska þessari heppnu konu innilega til hamingju, það er bara hitt. Þessi stimpill sem einstæðar mæður hafa á sér, þær eiga varla til hnífs og skeiðar og búa í félagslegu húsnæði, geta hvorki leyft sér né börnunum sínum neitt. Þvílíkt kjaftæði.

Auðvitað eru þær margar í þessari stöðu og alls ekki öfundsverðar af því, en það eru margar sem hafa það bara alveg ágætt, eru með góða menntun í góðri vinnu og lifa bara fínu lífi.

Engann aumingjaskap hér!

Lukkunar pamfíll!

Ég held ég tileinki þessa síðu konum, þessa vikuna allavega.
Var að horfa á fréttir, þar var talað um lukkunar pamfíl. Ég held að ég sé svoleiðis!

Mér var ekki eytt sem fóstri af því ég var stelpa, ég fékk að upplifa æsku án þess að vera misnotuð, ég var ekki gefin eða seld, ég fékk að læra að lesa, ég fékk meira að segja að ganga í menntaskóla og síðar háskóla. Ég hef aldrei upplifað dag þar sem ég er svöng af því það var ekkert til að borða heima, ég hef ávallt haft óheftan aðgang að vatni, og ekki bara vatni heldur hreinu vatni. Ég hef ekki upplifað stríðsátök, ég hef alltaf átt skó á fæturna, hrein föt og heil. Mér hefur meira að segja verið gefin ný leikföng. Ég hef aldrei orðið fyrir ofbeldi, enginn sem ég þekki hefur verið myrtur í klíkuátökum, ég er heilbrigð, ég á heilbrigð börn og ég á foreldra á lífi.

Ég er lukkunar pamfíll, það er engin spurning!

Konur vantar!

Konur flytja í stórum stíl frá Landsbyggðinni á mölina hér á Höfuðborgarsvæðinu. Það er skortur á konum út á landi. Dofri Hermannsson var að tala um þetta í hádegisfréttunum og benti svo mönnum á að aðeins karlar sæktu fundi um skipulagsmál og á meðan þeir sætu hér á þessum fundi, sem var á Vestfjörðum, væru konur þeirra, dætur og systur að pakka niður í tösku til að flytja suður.

Það er mjög áhugavert að spá í þetta. Sá iðnaður sem allir eru að berjast við að fá í sína heimabyggð þ.e. álver og olíuhreinsistöð höfðar ekki til kvenna, allavega flestra kvenna sem vilja helst vera í þjónustustörfum allavega fullyrti hann það.

Blogg Dofra

Auðvitað eru fullt af konum sem eru tæknimenntaðar og gætu fengið vinnu við þennan iðnað en það er spurning hvort þær ná að draga eiginmenn og fjölskyldur út á land til að sækja vinnu. Það hefur þótt eðlilegasti hlutur, ef eiginmaðurinn fær gott starf út á landi þá fylgir auðvitað kona og fjölskylda með til að hann geti sinnt sínum metnaði og öðlast frama í starfi. Þá kemur spurningin er það jafn eðlilegt í huga fólks að konur geti dregið mann og fjölskyldu út á land til að sinna sínum frama?

Kynbundið ofbeldi

Þegar ég fletti Mogganum í morgun, tók ég eftir þessum fiðrildum. Þetta er greinilega herferð gegn kynbundnu ofbledi, sem er alveg frábært. Hugsið ykkur að sums staðar á stríðssvæðum er konum nauðgað þannig að þær eignist börn af röngum kynþætti og þarmeð verði þeim útskúfað úr sínu eigin samfélagi. Þetta þekktist í fyrrum Júgóslavíu þegar Serbar nauðguðu Bosnískum stúlkum og konum og þetta er að gerast víða í Afríku þar sem mismunandi þjóðflokkar stríða.

Tenging á síðu UNIFEM

Púff þetta er bara rosalegt. Vildi bara vekja ykkur til umhugsunar.

Eyrnabólga!

Við erum svo einstaklega óheppin í þessari fjölskyldu hvað varðar eyrnabólgur. Þetta er greinilega ættgengt. Þegar ég var lítil var ég víst alltaf að fá eyrnabólgur og sitja eftir á hljóðhimnum mínum ör sem valda því að ég er ekki alveg með fullkomna heyrn þó ekki sé hún neitt slæm þannig. Þegar ég fer til læknis útaf ýmsum kvillum og skoðað er í eyrun á mér er ég iðulega spurð hvort ég hafi verið "eyrnabarn".

Ég hef sagt það og stend við það að um leið og börn fæðast og fá K-vítamín sprautuna eigi að skella rörum í eyrun á þeim. Allavega mín börn. Sonurinn var rétt rúmlega eins árs þegar nefkirtlarnir voru teknir og sett rör í hann, síðan var ekki meira vesen með það fyrr en fjarlægja þurfti rörin en þá var hann kominn á fimmta ár. Gelgjan var rosaleg, hún fékk fyrst í eyrun nokkra mánaða og bjuggum við þá í Danmörku og fórum á "eyrnalæknavaktina" þar sem stungið var á og barninu gefin sýklalyf. Þar vorum við fastagestir ca á 2ja vikna fresti í 3 mánuði því alltaf þegar skammturinn af sýklalyfinu kláraðist grasseraði eyrnabólgan upp aftur. Sérfræðingurinn úti gafst svo loks uppá barninu og setti rör í hana, það er víst regla að gera það ekki fyrr en þau eru orðin eins árs því annars er þetta meiri aðgerð, sem gera þarf á sjúkrahúsi en það varð lendingin og hún var komin með rör rúmlega 7 mánaða gömul. Reyndar fékk hún nokkrum sinnum rör og þau fóru reglulega í verstu eyrnabólgunum en það var ekki fyrr en við fluttum heim til Íslands með barnið 3ja ára gamalt að eyrnalæknirinn okkar hér heima lét taka úr henni nefkirtlana og setti enn á ný rör að eyrnabólgurnar minnkuðu.

Skottið hefur nú ekki verið svo slæm en hún er líka búin að fá rör, reyndar er hún enn með nefkirtlana. Hún var reyndar útskrifuð með glans frá eyrnalækninum síðasta sumar en núna í desember fékk hún í annað eyrað og fékk sýklalyf, svo passaði það, skammturinn kláraðist og aftur fékk hún í eyrað, nú var gefinn stærri skammtur og hann kláraðist um miðjan janúar og hún búin að vera fín síðan. Þ.e. þangað til í gærkveldi. Það er ótrúlegt að sjá glaða, káta, brosmilda barnið sitt umturnast svona og líða svona rosalega illa, þetta er alveg rosalega sárt, það er engin spurning. Jæja hún sofnaði loksins eftir 2 stíla og svo vaknaði hún sæmileg í morgun en hljóðhimnan hafði greinilega sprungið í nótt og sársaukinn því minni.

En svona er þetta, þetta legst á sumar fjölskyldur!

Lúxus!

Góð vinkona mín sem býr í Ameríku lét mig lofa því síðast þegar hún hringdi að ég myndi nú fá mér konu til að þrífa hjá mér. Mér fannst það soldið fáránleg hugmynd að borga konu til að koma og þrífa alla mína rúmlega 100 fermetra, og hugsaði málið. Ég er einstök móðir með 3 börn og hund, í fullri vinnu, starfa í félagsmálum og þarf auðvitað eitthvað félagaslíf líka. Ok, það er ekki oft sem maður fer í það að þrífa allt húsið í einu þ.e. maður grípur í það að þurrka af hillunum og sjónvarpinu. Þrífur klósettið þegar það er skítugt og tekur vaskinn á baðinu þegar hann er orðinn mjög svo slæmur. Sama með gólfin, maður ryksugar svona miðjuna tvisvar í viku og svo annað slagið ryksugar maður rest bak við húsgögn og slíkt og svo skúrar maður bara ef gólfið er klístrað.

Konan kom í gær og ég kom heim úr vinnunni, það voru allar hillur, baðið, gólfið og meira að segja borðið í eldhúsinu hreint. Váá, hún kemur aftur eftir 2 vikur, hvað ætli sé langt í að ég biðji hana að koma vikulega? ;-)

Frábært!

Stjórnmál og stjórnmálamenn!

Ég hef alla tíð haft mikinn áhuga á stjórnmálum og stjórnmálamönnum, maður hefur dáðst í fjarlægð að þessum mönnum og konum sem fórna sér svona fyrir heildina. Vinna mikið hugsjónastarf og allt meira og minna í sjálfboðasvinnu. Látið mig vita það, hef aðeins komið nálægt þessu, þetta er botnlaus vinna en engin laun nema stundum klapp á bakið.

En ég veit ekki lengur, þetta virðist ekki snúast lengur um að vinna fyrir heildina, finna góðar lausnir, koma með hugmyndir osfrv. heldur um völd og meiri völd. Allir vilja verða Borgarstjórar t.d. Málefnin skipta ekki lengur öllu máli heldur völdin. Ég er svo sem ósköp fegin að ég bý ekki í Reykjavík þessa dagana.

Þetta þref þjónar engum tilgangi, eina sem þetta afkastar er að fólk missir trúnna á stjórnmál og stjórnmálamenn og ungt fólk verður fráhverft stjórnmálum. En hver á þá að sjá um þessi mál fyrir okkur seinna meir.

Það er spurning um setja bara á "menntað einræði"!

Tannlæknaferð

Fór með Skottið til tannlæknis í morgun, kveið þessu soldið, síðast þegar við fórum þá neitaði hún að opna munninn og við urðum að fara heim og koma nokkrum vikum seinna. Reyndar er afleysingatannlæknir að vinna fyrir okkar tannlækni þar sem hún er í fæðingarorlofi, en hann náði þvílíkt að heilla Skottið strax og ekki nóg með að hún opnaði munninn, hann fékk að taka myndir, skafa tannstein og setja bæði spegil og skröpu uppí hana! Alveg frábært, endar er hann alveg yndislegur.

Engin hola!

Óskarinn

Fylgdist nú ekki með Óskarsverðlaunahátíðinni í gær frekar en fyrri daginn. Ég nenni ekki svona verðalaunaafhendingum. En mér þykir rosa gaman í bíó og gæti sko alveg hugsað mér að fara í bíó a.m.k. einu sinni í viku. Það sem svona hátíðir gera reyndar er að benda manni á myndir sem gaman væri að sjá. Ég er alveg með lista núna yfir myndir sem mig langar að sjá:

"No Country for old men."
"Into the Wild"
"Atonement"
"Death at a funeral"
"There will be blood"
ofl. ofl. þetta eru bara þær sem eru í bíó ákkúrat núna.

Verða að fara að drífa mig í bíó!

Gull í grjótinu!

Ég fer nú ekki mikið "í bæinn" eða út á djammið eins og það er líka kallað. Fór um síðustu helgi og hafði þá bara ekki farið síðan í byrjun desember. Þessi ferð mín var nú reyndar ágæt og komst ég að því að MOJO-ið er alveg í lagi ennþá;-).

Þarna er öll flóran af fólki og mér hefur ekki þótt það vænlegt til árangurs að hitta einhverja menn í bænum og þótt það frekar svona óspennandi leið og þykir reyndar enn. Þetta er spurning um að hitta einhvern, vita ekki á honum nein deili, hægt er að komast að ýmsu ef maður gefur sér góðan tíma til að ræða málin, en það er líka auðvelt að ljúga til um bakgrunn sinn ef maður vill. Þarna er fullt af fólki sem fer helgi eftir helgi út á lífið og fullt af frekar óspennandi pappírum. Ég er nú svoddan verkfræðingur að ég þarf að hafa "background" tékkið í lagi áður en ég aðhefst nokkuð.

En ég er sannfærð um að þarna er hægt að finna þessa fínu gullmola innan um grjótið, t.d. ég sjálf, ef einhver nær nú í mig útá lífinu þá hefur hann náð í gullmola. ;-)) Það er bara spurning hvort hann áttar sig á því! hehehe...

Júróvision og afmæli!

Var hér í gærkveldi með rúmlega 20 sundkrakka í afmælisveislu, frumbruðurinn varð 17 ára! Til hamingju elsku kallinn minn!! Allavega afmælið gekk vel.

Á meðan á afmælinu stóð var júróvision undankeppnin í sjónvarpinu. Sat með Skottinu og Gelgjunni inn í herbergi og horfði á hluta þáttarins. Ég hafði nú ekki séð öll þessi lög fyrr en þetta gekk ágætlega þó mér þætti algjör óþarfi að vera eitthvað að lengja þáttinn með viðtölum við mæðurnar, hvenær byrjaði hann eða hún að syngja var alveg klassísk spurning, ég á tvær dætur og þær byrjuðu nú bara að syngja um leið og þær byrjuðu að tala en ég býst nú ekki við því að þær verði einhverjar júróvisionstjörnur!

Lagið með Júróbandinu "This is my life" var svoleiðis langbesta lagið þetta kvöldið. Ég er rosa fegin að lag eins og Mercedes club eða Dr. Spoock voru ekki send til Serbíu, við megum ekki við meiri fíflaskap í bili eftir að Silvía Nótt fór um árið. Mér fannst lagið hennar Fabúlu reyndar mjög gott en ekkert júrósvision lag, svo hef ég oft heyrt betri lög eftir Gumma Jóns heldur en þetta lag. Ég hefði viljað sjá þarna lagið hennar Svölu Björgvins "The little wi.... song", það var líka alvöru júrósvisionlag.

Ég ætla nú ekki að dæma um hverjir möguleikar okkar verða þarna í Serbíu, en ég trúi því að Regína Ósk og Friðrik Ómar verði landi og þjóð til mikils sóma.

Áfram Ísland!

Sérðu hafið???

Ég veit ekki hvernig þær virka þessar felumyndir og þrívíddarmyndir!! Í fyrsta lagi sé ég ekki í þrívídd (augun vinna ekki nógu vel saman) og þar af leiðandi ekki dýpt heldur. En vinkonan sem sendi mér þetta í pósti sagði mér að ef ég horfði nógu lengi á myndina myndi ég sjá hafið. Ég reyndi og reyndi en ég sé ekkert haf!!!

Bara smá föstudagsfílingur!! hehehe....

Flugdrekahlauparinn!

Bókin um flugdrekahlauparann er ein af þeim bókum sem ég á uppí hillu en hef ekki gefið mér tíma til að lesa, þarf að drífa í því. Ég fór á bíó í gærkveldi á forsýningu á Flugdrekahlauparanum. Mér fannst myndin svakalega góð, en oft finnst mér þegar gerðar eru bíómyndir eftir bókum að þær bæti litlu sem engu við bækurnar og oft ná þær ekki þeim hughrifum sem bækur geta gert.
Vinkona mín fór með mér og hún sagði að bókin hefði heltekið sig og lýsingarnar í henni hefðu verið mjög svo ógeðslegar og þar hefði líka betur verið gert grein fyrir því hvernig aðalpersónunni leið innra með sér í gegn um allt ferlið.
Myndin náði þessu svo sem ágætlega en samt ekki, maður gat ekki lesið í huga hans þar en það er hægt í bókum.

Þannig nú er að drífa sig að lesa bókin og fara svo í bíó eða öfugt!

Framhaldsskóli í Mosó!

Frábært! Ég hef gælt við þessa hugmynd og reynt að berjast fyrir henni síðan ég flutti í Mosó. Ég tel að þetta lyfti upp bæjarlífinu og skipti miklu máli fyrir bæjarfélagið.
Fréttin

Er ekki soldið til í þessu?

Það er sagt að það taki mann eina mínútu að hitta sérstaka manneskju, einn tíma að kunna að meta hana, einn dag að elska hana, en heila ævi að gleyma henni.

Ég er ekki frá því að þessi gamla speki eigi fullan rétt á sér.

Náttúruval.

Heyrði einhvern tíman um daginn að karlmenn með mikla karlhormóna eignuðust frekar stelpur, ef þetta væri ekki svona þá myndum við sennilega enda sem einhvers konar villimenn. Ég er nú ekki há í loftinu en það er svo skrýtið að ég sé bara hávaxna karlmenn, "allir" þeir sem ég hef verið með hafa verið frekar hávaxnir, fyrrverandi er 188cm. Ég geng inn á skemmtistaðina og ég sé bara hausana sem standa uppúr hópnum, ótrúlega skrítið. Mamma hefur sagt að þegar ég var lítil í dansskóla og það var dömufrí þá var ég sko langfyrst að hlaupa til og bjóða hæsta og myndarlegasta stráknum upp.

En auðvitað er skýring á þessu eins og öllu öðru, þetta er bara náttúruval, ómeðvitað, maður er alltaf að leita að einhverjum til undaneldis þó að maður sé hættur að eiga börn og þar sem ég er lágvaxin, leita ég hávaxinna karlmanna til að ungarnir mínir verði hávaxnari. Enda sýnir það sig, Unglingurinn er orðinn 186cm er að ná pabba sínum og Gelgjan er 172cm tæpir. Þannig að ef ég hefði ekki Skottið væri ég sú lægsta í fjölskyldunni.

Svona er náttúran skrítin.

Alltaf í boltanum!

Það virðist sem sumir menn þurfi bara ekkert að fylgja þeim reglum sem við hin þurfum að fylgja. Þarf ekki að auglýsa stöðu forstöðumanns Þjóðmenningarhúss? Ég bara spyr, ég hélt að það þyrfti að auglýsa svona stöður og svo væri hæfasti maður í djobbið ráðinn.
Reyndar í framhaldi af þeim gagnrýndu opinberu ráðningum sem hafa verið undanfarið er líklegt að þetta hafi kannski verið auglýst í Lögbritingablaðinu, með smáu letri, enda les engin Lögbirting lengur.

Sumir virðast bara geta hoppað úr einu feita djobbinu í annað án þess að þurfa sýna fram á neina hæfileika yfirhöfuð. Ég er ekki að segja að Markús Örn sé ekki hæfur í starfið, veit bara ekkert um það.

Greinilegt á síðustu bloggum mínum að maður þarf að vera miðaldra karlmaður og sjálfstæðismaður til að einhver nenni að blogga um mann!

Dabbi kóngur!

Hef pælt soldið í því, þegar Davíð var forsætisráðherra var alltaf verið að vitna í hann og hann lét óspart í sér heyra ef hann var óánægður með Seðlabankann eða aðra og gaf eiginlega bara skít í það sem hinir voru að gera til að reyna að halda verðbólgu og öðru slíku í horfinu. Þá biðu allir með öndina i hálsinum yfir því hvað hann myndi gera, en hann gerði nú yfirleitt bara það sem honum sýndist.
Nú er hann orðinn Seðlabankastjóri sjálfur og enn bíða allir með öndina í hálsinum yfir því hvað hann gerir, og nú virðist allt velta á því hvaða stýrivexti hann ákveður. Ég man ekki eftir að hinir Seðlabankastjórarnir hafi fengið þessa athygli þegar þeir voru að tilkynna stýrivexti í stjórnartíð Davíðs. Enda gerir Davíð bara enn það sem honum sýnist.

Skiptir ekki máli hvar hann er, hann virðist stjórna öllu samt!

Kvenmannsveski!

Ég, í viðleitni minni til að vera meiri dama, fékk mér svona konutuðru í sumar. Þetta er svört leðurtaska með fullt af hólfum og tvö svona stærri.

Svo er það þannig að það fer eitthvað ofan í hana og ég finn aldrei neitt þar. Ég skoðaði hana í gær og hvað haldiði að ég hafi fundið?

Eina hanska, eina vettlinga, úlnliðshlífar, Sódavatnsflösku (óátekin), aukalykil af húsinu mínu, trefil, Dagbókaráfyllingu í "skipuleggjarann" minn, gamlan bíómiða, reikning frá tannlækninum, dömubindi, varasalva, spreybrúsa til að hreinsa gleraugun, fjóra penna, sárakrem, gömul útprentun af tölvupósti, ipod, hlíf utan um ipod (auðvitað allt annars staðar í veskinu), kassi utan af rakakremi í andlit (ætlaði að biðja tengdó að kaupa eins), varalit, varalitablýant, síma, veski og húslykla.

Mér líður soldið eins og þetta sé tuðran hennar Hermione úr Harry Potter!!

Gæðaúttekt!

Fyrritækið mitt fékk svona gæðavottun í sumar, núna í vikunni var komið að endurúttekt, því það er víst ekki nóg að fá vottunina, maður verður víst að standa undir henni og það er tékkað á því 1-2 á ári.

Við vorum nú að grínast með það að það væri kannski best að við stelpurnar myndum nú mæta í stuttum pilsum og með varalit svona til að reyna að heilla úttektaraðilan.

Ég var tekin í gegn í gær, hefði betur verið í pilsinu!!

Valentínusardagurinn á morgun.

Ég hef svo sem aldrei verið neitt uppveðruð af Valentínusardeginum, hefur fundist Konudagurinn skemmtilegri en sá þetta á einhverjum vefnum, ágætis ráð fyrir okkur hin.

"1. Vorkenndu sjálfri þér, en bara mátulega. Notaðu hámark korter í sjálfsmeðaumkvun, og snúðu þér svo að einhverju skemmtilegu.
2. Horfðu á kvikmyndina ”Love Actually”. Hún fjallar nefnilega um allar tegundir af ást.
3. Farðu út úr bænum og í góðan göngutúr í náttúrunni. Þá skella minna á þér auglýsingar um ást, blóm, súkkulaði og skartgripi.
4. Ef þig langar í sálufélaga taktu þá fyrsta skrefið. Svaraðu gömlum tölvupóstum sem þú fékkst þegar þú skráðir þig á date-vefinn forðum.
5. Bjóddu einhverjum út. Það þýðir ekkert að hanga heima í fýlu. Fáðu góðan einhleypan vin/vinkonu með þér út að borða.
6. Gældu extra við gæludýrið. Ef þú átt ekki gæludýr geturðu keypt þér mjúkan bangsa til að kúra hjá undir teppi.
7. Borðaðu dökkt súkkulaði. Það er ekkert fitandi að ráði og kemur þér í gott skap.
8. Mundu að veröldin er EKKI full af hamingjusömum pörum. Hugsaðu um þá sem eru einhleypir og njóta lífsins í botn.
9. Vertu fegin að Valentínusar-vesenið stendur ekki nema einn dag, einu sinni á ári. Það gæti verið verra."

Hafið góðan dag!

Villi borgó!

Sko, þó og jafnvel af því að ég er sjálfstæðiskona þá finnst mér að Villi hefði bara átt að segja bless og takk fyrir mig.

Það heyrast alls konar sögur að flokkurinn sé tvískiptur og Geir og Gulli styðji Villa, en Hanna og Þorgerður vilji hann út. Skil þær vel, hann mætti allavega leggja kollunni!!

bæbæ

Konur.

Það var maður sem að skrifaði þetta og mér finnst hann hitta alveg í mark.

"Ég er að leita að konu sem ég heillast af, þannig að ég sé ekki aðrar, sem ég elska hvernig sem hún lætur, sem þykir vænt um mig eins og ég er, en ekki eins og ég á að vera."

Hún verður heppin þessi kona.

Ljósmyndasýning

Ég vil hérmeð auglýsa þessa ljósmyndasýningu, mamma mín á mynd þarna og á henni er mynd af mér og Skottinu ásamt fleirum, reyndar sést bara í bakið á okkur en prófílinn á Skottinu.



Endilega kíkið á sýninguna.

Skapofsi!

Við í þessari fjölskyldu eigum það til að vera svolítið skapmikil og vil ég kenna franska sjómanninum um sem skolaði upp á strendur landsins fyrir nokkuð mörgum árum og er nefndur Erlendur í ættartölum. Hann skildi eftir brún augu og skap.

Sonur minn sem er nú yfirleitt þessi rólyndismaður missti stjórn á sér í gærkveldi og kýldi vegginn í stofunni. Hann er handarbrotinn, svokallað boxarabrot, og þarf að vera í gipsi í 2 vikur, það fer lítið fyrir sundæfingum á meðan og bílprófið sem hann ætlaði að taka nú í lok mánaðarins verður að bíða líka. Mamman hló bara að honum, kvikindið.

Hann náði samt einhvern veginn að kenna okkur foreldrunum um þetta!! Algjör snilli.

Forsetakosningar í Bandaríkjunum

Mér finnst Hillary og Obama flott par, þau ættu að fara saman í framboð, þ.e. hún sem forseti, hann sem varaforseti, ja eða öfugt þó ég hallist nú frekar að hinu. Þau gætu breytt ímynd heimsins á Bandaríkjunum.

Þetta yrðu algjör tímamót, ég held að aldrei fyrr hafi verið kona eða blökkumaður forseti eða varaforseti í Bandaríkjunum.

Það versta er að ég held að Bandaríkjamenn séu ekki tilbúnir í svo róttækar breytingar, þeir eru nú þeir allra afturhaldssömu þannig að repúblikanar eiga örugglega eftir að vinna þetta þrátt fyrir Bush.

Þeir eru líka með föðurlegan eldri mann sem forsetaefni, sem hefur nú verið vænlegt til sigurs hingað til.

Brúðguminn

Fór á bíó í gær, sá "Brúðgumann". Mjög góð mynd, mæli með henni. Það var svolítið áhugaverð heimspeki í myndinni, sem byggir annars á leikritinu Ívanov eftir Chekhov. Þarna er eiginmaður með fársjúka eiginkonu heima við, sem hann er hættur að elska eða ekki, kemur ekki alveg í ljós. Hann heldur svo fram hjá henni með mjög ungri stúlku og til að réttlæta gjörninginn finnst honum að hann verði að giftast ungu konunni þegar hin er látin. Er það einhver réttlæting á rangri gjörð, er nokkurn tímann hægt að réttlæta framhjáhald? Ekki finnst mér það.

Unglingar

Ég hef aldrei verið mikið fyrir börn. Þið hlæjið kannski af mér þar sem ég á þrjú stykki, og fjalla iðulega um þau hérna á síðunni, en þetta er alveg satt. Ég er elst minna systkina og leit aðeins eftir yngsta bróður mínum, sem er 8 árum yngri en ég, en annars nennti ég aldrei að passa börn. Jú, jú ég var skátaforingi, en það er einhvern vegin á allt öðrum forsendum. Ég held mér hafi svo sem gengið ágætlega með uppeldið á þessum tveimur elstu hjá mér, það á eftir að koma í ljós með Skottið. Tengdamamma mín rifjar oft upp og hlær þegar ég tala um það að ég hafi blessunarlega verið laus við að gera þessi börn mín að einhverjum mömmubörnum. Enda aldrei mál að skilja þau eftir neins staðar.

Eitt hef ég samt lúmskt gaman að en það eru unglingar og þeirra pælingar. Ég hef nú verið fararstjóri í tveimur ferðum til útlanda með börnunum mínum, þ.e. í sumar fór ég sem farastjóri á skátamót í Svíþjóð og í fyrra fór ég með sundhópnum hans sonar míns í vikuferð til Frakklands. Ég held að mér hafi nú bara tekist ágætlega upp að ná sambandi við þessa krakka og börnin mín skammast sín ekki fyrir mig, allavega ekki enn.

Fyrst eftir að ég skildi og við fluttum hingað varð íbúðin mín að nokkurs konar félagsmiðstöð. Strákurinn sem þá var í 10unda bekk mætti hér með allavega 2 vini sína í hádegismat á næstum hverjum degi og þegar maður kom heim úr vinnunni voru nokkrir diskar og glös í vaskinum. Skrítið að manni hafi fundist matarreikningurinn hár enda eiga 3 16 ára gamlir drengir sem allir æfa afreksíþróttir ekki í vandræðum með að sporðrenna nokkrum lítrum af mjólk, svo sem einu brauði og skinkupakka svo ekki sé minnst á oststykkin.

Nú er strákurinn kominn í menntaskóla og vinirnir í annan skóla en þeir mæta nú samt hingað nokkur kvöld í viku og chilla. Um daginn kom einn þeirra fram úr herberginu og bað mig um að aðstoða sig með stærðfræðiheimadæmin! Hann hafði ætlað að biðja soninn um þetta en hann hafði sagt að mamma væri sko best í stærðfræði á þessu heimili. Svo sátum við þarna við eldhúsborðið á meðan félagarnir kláruðu borðið í tölvuleiknum og reiknuðum heimadæmi í stærðfræði fyrir 3ja bekk í Versló!. Fyndna var að mamma hans hringdi svo í hann til að undrast um hvar hann væri og þá kom að hann sæti hérna með mér að reikna!

Allavega veit ég það að ég er ekkert voðalega hallærisleg mamma.

Helgin í stórum dráttum

Ég fór á árshátíð Verkfræðingafélags Íslands um helgina, hef alla tíð starfað eitthvað fyrir félagið, en aðeins farið á árshátíð einu sinni áður. Þá fannst mér meðalaldurinn helst til hár en núna var greinilegt að "unga" fólkið hafði safnað saman liði og var ég einmitt í einum slíkum hópi þ.e. árgangar '91-'95 úr Háskólanum, semsagt fullt af "ungu" fólki á besta aldri. Þetta var mjög skemmtilegt, þarna stóð veislustjórinn hún Fjóla sig eins og hetja og svo fóru "Hundur í óskilum" á kostum og ekki voru þeir síðri Milljónamæringarnir með Bogomil Font og Ragga Bjarna. Bara nokkuð gott kvöld.

Í gærkveldi fór ég svo á leikhúsið, tók mig til að keypti ársmiða hjá Borgarleikhúsinu í haust alls 4 sýningar þ.e. 3 fastar og ein valsýning. Mér finnst svo rosalega gaman í leikhúsinu. En allavega fórum við dóttirin á "Hetjur" í gærkveldi. Þetta var nokkuð skemmtilegt leikrit, helst til langdregið og svo hefði ég viljað fá að vita meira um bakgrunn og lífsreynslu þessara manna, en annars mjög góð kvöldskemmtun. Reyndar eru sunnudagskvöldin búin að vera nokkuð heilög undanfarnar vikur því þá eru sýndir í sjónvarpinu einu tveir þættirnir sem ég fylgist með. þ.e. "Pressa" sem kláraðist reynar í gær og "Forbrydelsen" sem er auðvitað algjört möst enda danskur spennuþáttur og ég missi ekki af þeim. Enda frábærir þættir mætti bara nefna Örninn og "Rejseholdet" sem voru líka algjört möst.

Vinurinn

Á efri hæðinni hérna í húsinu býr maður á svipuðum aldri og ég nema hann er þroskaheftur og vinnur í Krónunni við það að sækja kerrur. Hann er vinur minn. Hann fylgist með öllu sem gerist í húsinu, maður kemur varla heim nema hann sé í glugganum að fylgjast með hver sé að koma og fara.

Þegar ég flutti inn fyrir einu og hálfu ári síðan elti hann mig einhvern tímann inn í geymsluna mína sem er uþb. 5 fermetra stór og fyllti upp í dyrnar og spurði hvort ég byggi ein. Mér stóð nú ekki alveg á sama og svaraði því til að ég byggi ekki ein ég byggi með börnunum mínum um leið og ég reyndi að smeygja mér fram hjá honum. Hvar er kallinn? spurði hann þá, ég svaraði því til að hann væri farinn. Nokkrum mánuðum seinna var hann aftur búinn að elta mig í geymsluna og spurði hvort ég væri kominn með nýjann kall, ég sagði svo ekki vera og þá spurði hann hvort ég ætlaði að fá mér nýjann kall eins og hann orðaði það greinilega alveg tilbúinn í jobbið ef á þyrfti að halda. Jæja síðustu vikur hefur hann verið að færa sig uppá skaptið, maður reynir auðvitað að vera kurteis enda er þetta allt vel meint. Hann bauðst til að skipta um slöngu í hjólinu mínu, vildi endilega hjálpa mér að bera inn jólakassana, ég fæ inn um lúguna Krónupenna og uppskriftir úr Rice Crispies pökkum, hann bankaði um daginn og fékk hjá mér Moggann og í síðustu viku kom hann færandi hendi með kremkex sem var útrunnið sem hann hafði fengið í Krónunni.

Hann toppaði þetta eiginlega áðan þegar ég var í Krónunni og spurði hvort ég gæti ekki sótt hann í vinnunna klukkan 19:00?! Ég sagðist vera upptekin!!

Verð að fara að setja honum skýr mörk.

Skýr skilaboð!

Ég á við ákveðið vandamál að stríða. Ég skil ekki óbein skilaboð, kannski er það verkfræðingurinn í mér sem truflar það, eða ég er bara svona einföld.

Ég er sjálf svo hreinskilin, einlæg og trúi alltaf á hið góða í öllum, þar að auki kann ég ekki að ljúga, ekki einu sinni hvíta lygi til að bjarga mér út úr vandræðalegum atvikum! Þetta hafa svo sem yfirleitt verið taldir kostir og reynst mér vel í gegn um tíðina, en á móti þá hef ég líka nokkrum sinnum misskilið skilaboðin eða ekki trúað þeim fyrr en ég fæ þau svart á hvítu.

Þannig að ég þarf skýr skilaboðin, engar dylgjur!

Facebook

Mér var sagt frá þessu fyrirbæri sem facebook er á samkomu um daginn. Ég hafði aldrei heyrt á þetta minnst, en þær voru þarna tvær sem lofuðu þetta í hástert. OK, ég prófaði, skráði mig inn og skoðaði þetta aðeins. Fann enga af mínum nánustu vinum í þessu en bauð annarri þeirra sem hafði sagt mér frá þessu að vera vinur minn. OK, hún gerir það svo skoðaði ég þetta betur og sé að það eru ótrúlegustu hlutir sem fólk er að setja þarna inn, maður gæti sko eytt heilu kvöldunum í að prófa þetta allt saman. Ég er reyndar búin að ákveða að ég ætli nú ekki að gera það, en er enn með reikninginn opinn.

Svo var það fyndna að gamall vinur minn frá Ástralíu sem ég kynntist þegar við vorum skiptinemar á Spáni fyrir næstum 25 árum síðan dúkkar upp hjá mér. Þannig að þrátt fyrir allt þá var þetta nú þess virði. Ætla að halda reikningnum opnum enn um sinn en sjá svo til.

Mér finnst fólk nota þetta soldið eins og markaðstorg fyrir einhleypa. Veit ekki alveg hvort ég er að fíla það. Kannski þetta sé leiðin til að finna þennan eina rétta!!

Veit ekki.

Mjög svo þjóðleg helgi!

Fór á þorrablót Stjörnunnar á föstudagskvöldinu. Saumaklúbburinn ákvað að skella sér enda gamlar Garðabæjargellur. Þekkti þó nokkra en það er greinilegt að það er soldið langt síðan ég bjó í Garðabænum enda komin 18 ár síðan ég flutti þaðan. Þetta var ágætis skemmtun og rann niður nokkuð af rauðvíni og "breezer" og fór laugardagurinn í það að jafna sig og fara yfir atburðarás kvöldsins til að rifja upp hvort maður hafi nú sagt eða gert eitthvað vitlaust! En nei, engar stórar gloríur í þetta sinn. Ég er svo sem ekki vön að gera þær, það eina sem háir mér þegar ég fæ mér í glas er að ég fer iðulega á "trúnó" og tala um líf mitt og tilfinningar sem ég myndi annars ekkert vera að ræða nema við útvalda, ég er ekki þessi týpa sem er að "blammera" fólk, eða tala illa um aðra, það er bara ekki ég. Lenti ekkert á trúnó föstudag!

Það hefur skapast hefð fyrir því hin síðari ár að móðurbróðir minn skipuleggur svona stórfjölskyldu "sammenkomst" nokkrum sinnum á ári og eru það yfirleitt gönguferðir stuttar í mesta skammdeginu en góðar dagleiðir í maí og september og ein útilega á sumrin. Dagskráin er send út með jólakortunum! Þannig var að í gær var skipulögð gönguferð umhverfis Tjörnina í Reykjavík og ferð á Þjóðminjasafnið á eftir. Við söfnuðumst saman þarna á annan tug fólks og barns (þ.e. Skottið mitt var eina barnið í þetta sinn) allir í regngöllum og nú skyldi barist um í rokinu og rigningunni. Þetta gekk ágætlega, hélt reyndar mjög fast í Skottið á brúnni yfir Tjörninni það var svakalegur vindur og hún hefði nú bara getað fokið út á miðja Tjörn. En síðan var Þjóðminjasafnið skoðað með leiðsögn og að lokum fenginn sér kaffi/kakóbolli í kaffiteríunni. Hef ekki komið í Þjóðminjasafnið síðan því var breytt en þetta er mjög svo góð fjölskylduskemmtun, mæli með því við alla.

Óveður

Það er á svona dögum sem ég sakna gamla Terrano jeppans míns, ég hefði ekki látið veðrið stoppa mig í morgun ef ég hefði verið á honum eða á öðrum 4x4 bíl. Maður er einhvern vegin ragari þegar maður er á venjulegum fólksbíl, þó minn Ford Focus sé ótrúlega seigur, þá þorði ég ekki af stað á honum fyrr en í birtingu. En í sveitinni hjá mér sást ekki á milli húsa klukkan 8 í morgun. Svo er þetta nú yfirleitt þannig að það nægir að komast úr af bílastæðinu og uppúr götunni og þá er þetta komið.

Pressa!

Maður veit stundum ekki alveg hvernig maður á að skilja þetta hérna á kaffistofunni, þeim er greinilega mikið í mun að koma mér nú út!
Mér var tilkynnt að það væri nú fótboltamót verðbréfamiðlara á Akureyri um helgina og alveg bullandi tækifæri fyrir mig. Það gekk meira að segja svo langt að þeir voru tveir alveg tilbúnir til að lána mér jeppana sína til að komast nú örugglega norður. Segið svo að maður eigi nú ekki vini ;-)
En nei, ég ætla nú ekki að fara að elta einhverja "verðbréfadrengi" norður á Akureyri, það er alveg á tæru!

Ofur skipulag!!

Hér í vinnunni erum við með svokallað viðverukerfi þar sem við skráum okkur inn og út af skrifstofunni þannig að allir vita hverjir eru inni og hverjir ekki.

Á mánudaginn, fékk ég mígrenikast sem gerist nú ekki oft kannski 1-2 á ári og þurfti að fara heim úr vinnu um 3 leytið þar sem eina lækningin við þessu er að fá að sofna þó ekki sé nema hálftíma eða svo og ekki er nein aðstaða hér í vinnunni til að leggja sig ;-). Jæja ég fór heim og lagði mig og var orðin þokkaleg um kvöldmat. En í "viðveruna" hafði ég skrifað:

"Farin heim, hausinn sprunginn"

Í gær þriðjudag var svo kistulagning og jarðaför afa míns og hafði ég ætlað að mæta í vinnuna frá ca 8-11 en svo vaknaði ég í gærmorgun og var enn hálfslöpp og vissi að það væri erfiður dagur framundan þannig ég hringdi niður í vinnu og sagðist vera heima og færi svo í jarðaför. Ritarinn skrifaði þá í viðveruna:

"Er heima slöpp, jarðaför eftir hádegi"

Kvidindinum hérna í vinnunni fannst þetta nú fulllangt gegnið að ég væri nú bara búin að skipuleggja eigin jarðaför og það án þess að láta þá vita þannig að þeir gætu nú lokað stofunni og mætt!!

Ó Reykjavík, ó Reykjavík, þú yndislega borg......

Þarf ég að segja meira.

Krakkar mig langar líka að vera borgarstjóri, má ég vera næst?

Nýjir tímar

Ég var í klippingu um daginn, klipparinn minn er ung kona, rétt tæplega þrítug, barnlaus og "single". Hún er ótrúleg, hún er að "deita" gæja og er búin að vera að því síðustu mánuðina en biddu fyrir þér þetta er sko ekki kærastinn hennar, hún er bara að "deita" og er enn "single", en samt "deitar" hún ekki aðra á meðan. OK, hvað þýðir það? jú þau tala saman á hverjum degi, hittast nokkrum sinnum í viku en búa í sitthvoru lagi og hún er sko ekki á föstu! Fjölskylda hennar veit ekkert af honum.

Ég og minn fyrrverandi vorum búin að hittast nokkrum sinnum og þá var hann orðinn kærastinn minn. Við bjuggum í sitthvoru lagi í 3 ár áður en við fórum að búa, við hittumst ekki á hverjum degi fyrstu árin en samt var hann alltaf kærastinn minn og fjölskyldan vissi öll af honum og hann var orðinn einn af henni þó að við værum ekki farin að búa. En þetta var raunveruleikinn fyrir rúmlega 20 árum. Tíðarandinn hefur greinilega breyst síðan.

Svo er hún að leggja mér lífsreglurnar varðandi þessi mál. Ég veit ekki hvort maður á að hlusta á hana en þetta er greinilega allt spurning um að tapa ekki "coolinu" og líta ekki út fyrir að vera "desperat" það er svo mikið "turnoff".

OK, þannig að ef maður hittir einhvern sem manni líst eitthvað á, þá má maður ekki segja honum það og maður má ekki hringja í hann, ef hann hefur sagst ætla að hringja, það eina sem stúlka má gera er að bíða! Ef hann hringir ekki af því hann er feiminn, veit ekki hvort maður vill eitthvað hitta hann aftur og er hræddur um að tapa "coolinu" sínu eða virka "desperat" þá er þetta bara "lost game".

Tónlist og handbolti.

Ég og dóttirin fórum í gær á "Jesus Crist Superstar", alveg mögnuð sýning. Þetta er reyndar alvöru þungarokk uppsetning og kannski ekki fyrir viðkvæma, en góð er hún. Þegar ég sat þarna fór ég að hugsa hvað maður hlustar mikið á hina eilífu síbylju sem glymur á manni á útvarpsstöðvum landans og ég fór að hugsa um tónlistina sem dóttir mín hlustar á og þá tónlist sem ég hlustaði á á hennar aldri.

Ég var algjört Led Zeppelin fan á mínum gagnfræða- og menntaskólaaldri, einnig var Pink Floyd í mjög svo miklu uppáhaldi og man ég vel veturinn 1979-1980, þegar ég er á nákvæmlega sama aldri og dóttirin, kom út "The Wall" með Pink Floyd við hlustuðum á hana á hverju einasta kvöldi í marga mánuði, ég kann ennþá flesta textana. Myndin kom út skömmu síðar, ja allavega nokkrum árum, og þá var farið á hana líka nokkrum sinnum. Auk þessa hlustuðum við á Utangarðsmenn, The Doors, Jethro Tull, U2 ofl. ofl. Ég veit eiginlega ekki hvort þetta flokkast undir rokk eða bara klassík?!

En allavega þegar ég skildi og við tókum til í bílskúrnum fórum við með allar gömlu vinyl plöturnar mínar í Sorpu enda hafði plötuspilarinn ekki verið í lagi í mörg ár. Ég fékk bara safndiska í staðin með uppáhalds hljómsveitunum mínum enda er fyrrverandi svona "poppdrengur" ég gat aldrei kennt honum að meta þessa tónlist. Það harðasta sem hann hlustaði á var U2 og Bubbi annars er það bara Sálin. Þið megið ekki misskilja mig, ég fíla Bubba, U2 og Sálina mjög vel enda er ég kannski soldil alæta á tónlist.

Ég er allavega með Pink Floyd safndiskinn í bílnum og hlusta iðulega á hann, um daginn sótti ég dótturina á skátafund og einn af skátunum fékk að fljóta með, ég með diskinn í og auðvitað þarf maður að spila þetta soldið hátt svona til að fíla bassann. Dóttirin, sagði strax við vinkonuna, "þú verður að afsaka hana mömmu og hennar tónlistarsmekk", eftir smástund kom lagið "Money" og þá segir hún allt í einu er þetta Pink Floyd? og það er nefnilega það sem ég segi þeir eru klassískir, í ljós kom að hún þekkti fullt af lögunum en vissi ekki hver spilaði tónlistina.

Af því að við fórum á sýninguna í gærkveldi missti ég auðvitað af handboltaleiknum, ég stillti því videoið á upptöku og ákvað að hlusta ekki á útvarp á leiðinni heim til að heyra ekki úrslitin. Þegar heim var komið var upptakan sett af stað, þarna sat ég í stólnum og fór svo að hrópa á sjónvarpið eins og venjulega þegar ég horfi á handbolta "svona koma nú", "ekki gefast upp", "brjóta á honum", "upp með hendurnar", "æji strákar" osfrv. osfrv. Allt í einu heyrist í dótturinni, "mamma þetta er upptaka þeir heyra ekkert í þér!!"

Súkkulaðikonan

Fór með Skottið í klippingu, förum alltaf á sama stað og það er búin að vera sama konan sem klippir hana síðastliðið árið. Sú er spænsk eða suðuramerísk og heitir Carmen, alveg yndisleg stúlka. Hún er með svona ljóbrúna húð, kolsvart hár og dökkbrún augu og Skottið kallar hana alltaf súkkulaðikonuna!

Stjúptengsl!

Ég fór í bíó um helgina með stelpunum mínum og sáum við "Enchanted" eða "Töfraprinsessan" (skottið segir reyndar törfa....) eins og það leggst upp á íslensku. Þetta var mjög skemmtileg mynd og eins og í öllum alvöru ævintýrum var þarna vonda stjúpan.

Skottið spurði mig í gær hvað væri eiginlega stjúpmamma. Ég útskýrði fyrir henni að þegar pabbi hennar fengi sér nýja konu þá yrði hún stjúpmamma hennar og þegar ég fengi mér nýjan mann yrði hann stjúppabbi hennar. Hún horfið þá á mig íbyggin á svip með brúnu augun sín eins og undirskálar og spurði svo: "Eru þau vond?".

Sem betur fer er nokkuð um stjúptengsl í minni fjölskyldu þannig að nánasta fjölskylda er svolítið eins og bútasaumsteppi, bútar héðan og þaðan. Bróðir minn á tvö börn frá fyrri sambúð sem lauk reyndar fyrir rúmlega 10 árum síðan og konan hans núverandi á einn son frá fyrra sambandi, auk þess sem þau eiga von á barni saman nú á vordögum. Yngri bróðir minn á unnustu og hún á einn son frá fyrra sambandi þannig að næg eru dæmin. Þegar ég var búin að útskýra þetta fyrir skottinu leit hún á mig og sagði, "eignast ég þá tvær mömmur og tvo pabba" og fannst að hún yrði bara svaka rík.

Þessar íslensku fjölskyldur!

Líffæragjafir

Ég hef aldrei skilið þetta vesen með líffæragjafir og er mjög hlynnt þessu sem Bretarnir ætla að fara að gera, þ.e. ef þú hefur ekki fyllt út skjal þess efnis að ekki megi nota líffærin úr þér þá sé það bara sjálfgefið að það megi.

Ég vona svo sannarlega að það verði hægt að nota einhver líffæri úr mér þegar ég dey, ekki nota ég þau! Svo vil ég helst láta bara brenna rest.

Over and out

Hús!

Heyrði í fréttum áðan að húsafriðunarnefnd hefði ákveðið að friða húsin á Laugavegi 4-6 ég skil nú ekki alveg. Mér finnst þessi hús bara ekkert falleg, ég get ekki séð af hverju ekki má rífa þessi hús. Þið megið ekki misskilja mig, mér finnst full ástæða til að friða hús sem hafa einhverja sögu eða eru falleg og merkileg á einhvern hátt, en þetta má nú ekki yfir allt ganga, halda uppá einhverja kofa. Mér finnst líka miklu meira virði að friða götumyndir, þ.e. hafa einhvera stefnu í þessum málum þ.e. friða heilu hverfin eða reyna að hafa einhvert samhengi í þessu. Auðvitað eru mörg merkileg hús á laugarveginum en er þá ekki bara ástæða til að friða alla götuna og halda þessari merkilegu götu óbreyttri. Þarna úir og grúir af alls konar húsum og ef maður labbar laugaveginn þá er mjög gaman að skoða þessi hús hvert ofan í annað. En allavega finnst mér ekki ástæða til að friða þessi hús til að flytja þau burtu, nær væri að friða þau þar sem þau eru.

Knús!

Ég er ein af þeim sem þarf reglulega knús, eitt svona gott bjarnarknús og þá líður úr mér öll spenna og stress. Þetta er sérstaklega mikilvægt ef ég er eitthvað leið og döpur eða óvenju stressuð. Bræður mínir eru ótrúlega góðir í þessu, maður bara hverfur inn í hramminn, fékk nokkur um helgina.

Ekki nóg með það heldur á ég einn góðan vin hérna í vinnunni sem ég get farið til og beðið um gott knús. Ef ég er eitthvað leið fer ég bara inn til hans og það er ekkert sjálfsagðara en að fá eitt gott knús!

Knúsið hvort annað!

Minning

Elskulegur afi minn kvaddi okkur í hádeginu í dag.

Fyrir viku síðan var hann lagður inn á sjúkrahús og þá kom í ljós í hvað stefndi, þannig að ég er eiginlega bara fegin að þetta tók fljótt af. Afi minn vildi nú ekki vera neinum byrði þannig að hann hefur örugglega bara viljað hafa þetta svona.

Ég og krakkarnir heimsóttum hann á þriðjudaginn og var það mjög góð stund sem við áttum með honum þá.

Afi og amma eignuðust 6 börn og eru þau 5 sem lifa nú föður sinn. Afkomendurnir eru tæplega 40 auk fjölda stjúpbarnabarna og stjúpbarnabarnabarna.

Afi minn var merkilegur kall, hann var kennari og starfaði lengst af sem íþróttakennari, mikill íþróttamaður, æfði fimleika með KR á sínum yngri árum og fór m.a. til útlanda að sýna fimleika. Hann var kominn vel yfir fimmtugt þegar hann stóð á höndum og fór niður tröppurnar á Melhaganum á höndum og við krakkarnir horfðum á hann með aðdáun. Ein jólin man ég að hann fékk rafmagnsrakvél í jólagjöf og svo rakaði hann sig og við barnabörnin skyldum svo fara í röð að kyssa hann á kinnina til að finna hvað hann væri mjúkur.

Hann starfaði í fjölda ára sem skógarvörður í Þrastarskógi og hefur plantað mörgum grenitrjánum þar. Þau voru mörg sumrin sem hann og amma og þá kannski sérstaklega amma eyddu í skóginum með krökkunum. Þar áttu þau yndislegt sumarhús rautt og hvítt í fallegu skógarrjóðri og lengi vel fannst mér eins og þetta væri bara sumarhúsið, nákvæmlega eins og sumarhús eiga að vera. Áður en 6 ára bekkur varð skylda í skólum, og í mörgum skólum var nú ekki einu sinni boðið uppá 6 ára bekk, voru amma og afi með smábarnaskóla í risinu á Melhaganum. Þar lærði ég að lesa, skrifa og reikna aðeins 4ra ára gömul.

Alltaf var spennandi að kíkja á jólatréð á Melhaganum hjá ömmu og afa því þetta var það stærsta jólatré sem sást í bænum og alltaf var það úr skóginum. Á Gamlárskvöld hittumst við svo öll hjá afa og ömmu og þar var borðað á langborði lax úr Soginu. Afi elskaði að veiða eins og svo mörgum úr fjölskyldunni.

Krakkarnir hans afa voru og eru mjög vinnusöm og dugleg og hann veitti þeim enga miskunn, sjálfur var hann alltaf í einhverri vinnu á sumrin í skólafríinu, auk þess sem hann sinnti skóginum. Ég var ekki nema 8 ára gömul þegar við vorum í sumarbústað við Álftavatn þar voru bátar og afi plataði mig og frænku mína um borð í einn bátinn. Hann réri honum alveg að Soginu og fór svo úr bátnum og við frænkurnar máttum koma okkur sjálfar heim. Þarna rérum við og rérum en straumurinn í Soginu var mikill og okkur fannst við ekkert komast áfram, en við héldum áfram á sitt hvorri árinni og loksins komumst við af stað og náðum að róa í land við bústaðina en blöðrurnar á höndunum á okkur voru lengi að hjaðna. En þetta þótti afa bara sjálfsagt, stelpurnar skyldu bara spjara sig.

Svona var afi, blessuð sé minning hans.

Mamma!

"Mamma veistu hvað klukkan er, þú berð ábyrgð á að vekja okkur." Þetta segir 14 ára gömul dóttir mín við mig í morgun. Málið var að ég heyrði klukkuna hringja inni hjá henni og heyrði hana slökkva á henni, en hún er bara ekki búin að læra það ennþá að það þýðir ekkert að láta klukkuna hringja hálftíma áður en maður þarf á fætur því þá sofnar hún bara aftur. Hún missti semsagt af fyrsta tímanum í skólanum í morgun, allt mér að kenna.

Sú stutta var að leika sér inni á baðherbergi og komst þar í rakvél sem hún skar sig aðeins í puttann á þá segir hún "mamma maður á að geyma rakvélar í efstu hillunni!"

Og síðasta atvikið sem viðkemur reyndar hundinum en þannig var að í gær fór ég eftir vinnu með hundinn í smá göngutúr, við göngum svona ca 10-15 mínútur og þá komum við að litlum skógi og inni í honum er grasflöt og bekkur, þar leyfi ég hundinum að vera ólarlausum og við leikum okkur í nokkra stund við að elta bolta, togast á og smá svona þjálfun að bíða, leggjast og koma. Alveg eins og þetta á að vera. Í gær aftur á móti þá löbbuðum við inn í skóginn í átt að flötinni þegar ég tek af henni ólina eins og ávallt áður. Hún hleypur nokkrar ferðir fram og til baka eins og hún er vön nema allt í einu kemur hún ekki til baka. Jæja hún hefur fundið eitthvað spennandi hugsa ég og held áfram, er komin að grasflötinni og hvergi sést hundurinn, fór að kalla, dró upp hundanammi og gekk um allt, fór til baka inni í skóginn, óð mýrar og klifraði yfir greinar alltaf kallandi á hana. Hringir ekki síminn, "Mamma hvar ertu?" Heyrðu, heldurðu ekki að hundurinn hafi bara farið heim, þá fann hún mig ekki og fór bara heim! Stelpurnar voru víst lengi að pæla í því hvaða hundur þetta væri sem væri að gelta þarna fyrir utan, áður en þær hleytpu henni inn.

Svo nú er spurningin hvort ég sé yfirhöfuð hæf móðir!!

Afmæli - aldur

Málið er að ég átti afmæli um helgina og hér á mínum vinnustað hefur skapast sú hefð að vinnustaðurinn býður upp á tertu ef einhver á afmæli. Þar með söfnumst við öll fyrir á kaffistofunni og tökum svona stutt kaffi og fáum okkur tertusneið.

Strákarnir hérna eru nú alltaf svo tillitsamir við okkur stelpurnar að það hálfa væri nóg. Einn segir við mig að nú sé ég orðin gömul (tek það fram að hann er alveg heilum mánuði yngri en ég), annar minnist nú á af því að ég sé nú í þessari stöðu sem ég er í, að það sé spurning hvort ég sé komin á síðasta söludag! Þá bætir sá þriðji við, veit ekki alveg hvort hann var að reyna að bæta fyrir það sem hinir sögðu, en hann segir að það sé nú líka spurning um síðasta neysludag!!

Svo kom þetta týpíska hjá enn einum sem ætlaði að reyna að klóra í bakkann hvort þetta væri ekki eins og með ostana og rauðvínið, betra eftir því sem það eldist, svo kom, þar til það verður súrt!!

Jæja, þetta fór úti alls herjar hláturkast og eins og þið vitið þá lengir maður lífið með hlátri þannig að í raun fór ég yngri útaf kaffistofunni en inn á hana.

Hláturinn lengir lífð!

Össur og orkumálastjóri!

Eins og ég kom að hér í gær þá erum við konur í Verkfræðingastétt frekar svekktar með Iðnaðarráðherra þessa dagana, það gekk svo langt að Kvennanefnd VFÍ sendi eftirfarandi á fjölmiðla landsins

Reykjavík 3.janúar 2008

Opið bréf til iðnaðarráðherra

„Stjórn Kvennanefndar Verkfræðingafélags Íslands harmar að gengið hafi verið fram hjá Ragnheiði I.Þórarinsdóttur, aðstoðarorkumálastjóra, við skipan í stöðu orkumálastjóra.
Í jafnréttisáætlun iðnaðarráðuneytis segir að taka skuli mið af

jafnréttissjónarmiðum og að kynjunum skuli ekki mismunað með neinum hætti.

Þá segir að hlutur kynjanna í störfum hjá ráðuneytinu skuli jafnaður eins og kostur er og að þess skuli jafnan gætt að sá umsækjandi sé ráðinn sem talinn er hæfastur til þess að gegna starfi, að teknu tilliti til menntunar og hæfni en án tillits til kynferðis. Séu tveir eða fleiri umsækjendur af báðum kynjum taldir jafn hæfir til ráðningar í auglýst starf skal að jafnaði ráðinn umsækjandi af því kyni sem er í minnihluta á viðkomandi sviði.

Í stefnuyfirlýsingu ríkisstjórnar Sjálfstæðisflokks og Samfylkingar 2007 segir að stefnt skuli að því að jafna stöðu kvenna og karla í nefndum og stjórnunarstörfum á vegum ríkisins.

Af þeim gögnum sem fyrir liggja er með engu móti annað séð en að Ragnheiður hafi verið a.m.k. jafnhæfur umsækjandi og Guðni. Sorglegt er að ráðherra flokks sem sagt hefur að jafnréttismál yrðu sett efst á dagskrá, í nýhöfnu stjórnarsamstarfi, hafi ekki nýtt hér gullið tækifæri til að láta verkin tala."

Undir bréfið rita:

Arna S. Guðmundsdóttir formaður
Msc. byggingarverkfræði
Guðrún Hallgrímsdóttir
Dipl.Ing. matvælaverkfræði
Jóhanna H.Árnadóttir
Msc.rekstrarverkfræði
Kolbrún Reinholdsdóttir
Msc. rafmagnsverkfræði
Sveinbjörg Sveinsdóttir
Dipl.Ing. rafmagnsverkfræði


Ein af vinkonum mínum rakst á þetta í bloggheimum:


"Ég ætla að kíkja á næturbloggið hans Össurar í fyrramálið og gá að því hvort það verður ekki svohljóðandi:

Málum klúðrað mjög ég hef,
mér finnst því að vonum
að ég fái opið bréf
frá öskureiðum konum."

Góðar!

Jafnrétti í hnotskurn!

Það er svo algengt þegar fólk skilur að karlmaðurinn sé fljótur í nýtt samband, það er eins og þeir geti ekki verið einir. Einnig er mikil pressa frá fjölskyldu og vinum með það að fara nú að finna sér nýja konu, nægar séu þær nú á markaðnum.

Aftur á móti finnst mér eins og fólk segi við mig, hvað liggur nokkuð á taktu því nú bara rólega jafnaðu þig almennilega og það er fullt af konum sem finna sér ekkert nýjan maka fyrr en börnin eru flutt að heiman bla bla bla...

Skrýtið, amma mín var ekkja í 56 ár og var ekki við karlmann kennd eftir að afi minn dó, þá var hún einungis 37 ára gömul, reyndar með 2 ung börn. En það var ekkert eðlilegra af því að hún hafði góða að þá "þurfti" hún ekkert að fá sér nýjan mann og þar með var það bara óþarfi.

Ég "þarf" ekkert nýjan mann, ég get alveg séð um mig sjálf, en mér finnst strákar bara svo skemmtilegir að ég vill endilega hafa þá með.

Orkumálastjóri

Nú var Iðnaðarráðherra að skipa nýjan Orkumálastjóra.



Þetta er mál sem mér finnst mér koma við, hann gekk nefnilega framhjá mjög hæfri konu henni Ragnheiði Ingu Þórarinsdóttir til að koma gömlum flokksbróður heim sem var búinn að fá nóg af útlegðinni og vantaði eitthvað "djobb" við hæfi til að flytjast heim frá Svíþjóð. Ég efast ekki um að Guðni Á. Jóhannesson er mjög svo hæfur í starfið ég held að enginn efist um það, en Ragnheiður er ekki síður hæf. En það er sorglegt að ráðherra flokks sem sagt hefur að jafnréttismál yrðu sett efst á blað í stjórnarsamstarfinu hafi ekki nýtt sér gullið tækifæri til að láta verkin tala.

Í jafnréttisáætlun iðnaðarráðuneytisins segir að taka skuli mið af
jafnréttissjónarmiðum og að kynjunum skuli ekki mismunað með neinum hætti.
Þá segir að hlutur kynjanna í störfum hjá ráðuneytinu skuli jafnaður eins
og kostur er og að þess skuli jafnan gætt að sá umsækjandi sé ráðinn sem
talinn er hæfastur til þess að gegna starfi, að teknu tilliti til
menntunar og hæfni en án tillits til kynferðis. Séu tveir eða fleiri
umsækjendur af báðum kynjum taldir jafn hæfir til ráðningar í auglýst
starf skal að jafnaði ráðinn umsækjandi af því kyni sem er í minnihluta á
viðkomandi sviði.

Það er enginn sem dregur það í efa að kvenfólk er í minnihluta í þeim málaflokki sem hér um ræðir.

Jafnframt segir, í stefnuyfirlýsingu ríkisstjórnar Sjálfstæðisflokks og Samfylkingar 2007, að stefnt skuli að því að jafna stöðu kvenna og karla í nefndum og stjórnunarstörfum á vegum ríkisins. Hvenær breytist þetta eiginlega og fólk fer að fara eftir því sem það segir og skrifar?

Áfram stelpur.

Kókosbolla

Já, gleðilegt ár!

Ég er soldið eins og kókosbolla, að utan er ég "hörð", þ.e. sýni bara á mér hina ytri skel, er cool, redda þessu, dugleg osfrv. Að innan er ég svo mjúk, þ.e. einn tilfinningahrærigrautur, grenja yfir bíómyndum, felli tár af stolti yfir börnunum þegar þau sýna sínar bestu hliðar, græt yfir örlögum annarra osfrv. eiginlega algjör grenjuskjóða, en það fá bara þeir sem þekkja mig mjög vel að sjá.